Numbers 23

Macedonian 2006 D - (Свето Писмо: Стандардна Библија 2006 (со Девтероканонски Книги))

← Chapter 22 Jump to: Chapter 24 →

1Тогаш Валаам му рече на Валак: „Изгради ми овде седум жртвеници и приготви ми седум телиња и седум овни.“

2Валак направи така, како што рече Валаам; и принесоа Валак и Валаам по едно теле и по еден овен на секој жртвеник.

3И му рече Валаам на Валак: „Застани при својата сепаленица, а јас ќе појдам; можеби ќе се јави Господ пред мене, и што ќе ми открие, ќе ти кажам.“ И замина на осамено место.

4И му се јави Бог на Валаам, а Валаам Му рече: „Јас подигнав седум жртвеници и принесов по едно теле и по еден овен на секој жртвеник.“

5И му вложи Господ збор во устата на Валаам и рече: „Врати се при Валак и речи вака.“

6И се врати при него, а тој стоеше при својата сепаленица, тој и сите моавски кнезови.

7И ја изусти оваа своја песна: „Од Арам ме натера Валак да дојдам, од источните планини царот моавски ме повика: дојди, проколни ми го Јаков, и дојди, проколни ми го Израил!

8Како да проколнам некого кога Бог не го проколнува? Како да прокажам некого кога Бог не прокажува?!

9Од врвот на карпите го гледам, од ридовите го набљудувам: ете народ кој живее осамен и не се вбројува меѓу народите.

10Кој ќе го изброи семето на Јаков и кој ќе го пресмета бројот на народот израилски. Да умре душата моја, како што умираат праведниците, и крајот мој да биде како нивниот!“

11И му рече Валак на Валаам: „Што ми направи? Јас те повикав да ги проколнеш непријателите мои, а пак ти, ете, ги благословуваш.“

12Тој одговори и рече: „Не требаше ли да го кажам токму она, што Господ го вложи во устата моја?“

13И Валак му рече: „Дојди со мене на друго место, од каде што ќе видиш, но само дел од него ќе видиш, а нема целиот да го видиш; и проколни ми го оттаму.“

14И го одведе на едно стражарско место на врвот од Фазга, и изгради таму седум жртвеници, и принесе по едно теле и по еден овен на секој жртвеник.

15И му рече Валаам на Валак: „Стој тука при сепаленицата своја, јас, пак, ќе одам да Го прашам Бога.“

16И го сретна Бог Валаам, и му вложи слово во устата негова, па рече: „Врати се кај Валак и кажи му така.“

17И се врати кај него, а тој стоеше при својата сепаленица, а заедно со него и сите моавски кнезови. И му рече Валак: „Што вели Господ?“

18Тој го започна своето кажување и рече: „Стани Валак, слушај и внимавај, сине Ципоров!

19Бог не е човек, та да се колеба, ниту е син човечки, па да се изменува. Што ќе каже, па да не го изврши, или што ќе рече, па да не се збидне?

20Ете, доведен сум да благословувам: ќе благословувам, и никако поинаку.

21Не се гледа мака кај Јаков, и не се гледа несреќа во Израил; Господ Бог е со него, и борбениот царски повик е со него.

22Бог го изведе од Египет: тој е брз како еднорог:

23нема магии кај Јаков, нема волшепства во Израил; некогаш ќе речат за Јаков и за Израил: ете, што направи Бог!

24Ете, еден народ се подигна како лавица и се исправи како лав; нема да легне, додека не го изеде пленот свој и додека не се напие од крвта на победените.“

25И му рече Валак на Валаам: „Ни со клетва не го проколнувај, ни со благослов не го благословувај.“

26И одговори Валаам и му рече на Валак: „Нели ти реков – што ќе рече Господ, тоа и ќе го извршам.“

27И му рече Валак на Валаам: „Дојди, ќе те одведам на друго место; ќе Му биде секако угодно на Бога, и оттаму ќе ми го проколнеш.“

28И го поведе Валак Валаама на врвот од Фегор, што се протега спрема пустината.

29И му рече Валаам на Валак: „Изгради ми овде седум жртвеници и приготви ми седум телиња и седум овни.“

30И Валак направи, како што му рече Валаам, и принесе по едно теле и по еден овен на секој жртвеник.

← Chapter 22 Jump to: Chapter 24 →