1 Chronicles 20

Mossi MPBU (WẼNNAAM SEBRE 2014)

← Chapter 19 Jump to: Chapter 21 →

1Yʋʋm-vẽkrã sẽn zems wakat ning rĩm-dãmbã sẽn yit n kẽnd zabã, a Zoaab tigma tãb-biis wʋsgo, n tɩ sãam Amo nebã tẽnga, la b gũbg Raba tẽngã. Rẽ t'a Davɩɩd paa Zeruzalɛm. La a Zoaab zab n tõoga Raba tẽngã n sãam-a zãnga.

2A Davɩɩd fõka naam maanfã sẽn dag n fõg Amo nebã wẽn-naandg a Milkom zugã. Maanfã zɩslem dag n yɩɩda sãnem kɩlo pis-tã. La kug-neer n dag n be maanfã zugu. Dẽ, b yãka kug-neerã n ning rĩm a Davɩɩd naam puglã zugu. A Davɩɩd ne a nebã wʋka Raba tẽngã teed wʋsg n tall n looge.

3Sã n yaa ne tẽngã nebã, a Davɩɩd yiis-b lame n tɩ kõ-b ra-wãad-sʋʋs ne kɩts la laya, n kɩt tɩ b maan tʋʋm-wɛgla. A kɩtame tɩ Amo nebã tẽmsã fãa me maan a woto. Dẽ zugẽ, a Davɩɩd ne a tãb-bi-sulã fãa lebg n leba Zeruzalɛm.

4Bõn-kãens zugẽ, Israyɛll nebã yika zabr ne Filistẽ-dãmbã Gezɛɛre. La zabrã wakate, Husa tẽng rao a Sibkayi kʋʋ Refayim buudã ned a Sipayi, n ning Filistẽ-dãmbã yãnde.

5Dẽ poore, zabrã ne Filistẽ-dãmbã leb n yikame. La a Yayɩɩr biig a Ɛlhanan kʋʋ a Lami sẽn yaa Gat tẽng rao a Golyaat ba-biigã. A Lami kãndã raoog taglem dag n taa koeer-bõanga.

6Zabr a to leb n zĩnda Gat tẽnga. La nin-wobg a yembr n dag n be beenẽ, n tar nug-bi piig la a yiibu, ne nao-biis piig la a yiibu. Yẽnda me rag n yaa a Harafa yagenga.

7Yẽnda baoo Israyɛll nebã noore, la a Simeya biig a Zonatã sẽn yaa a Davɩɩd ba-biigã kʋʋ yẽnda.

8Gat tẽng nin-bãmbã fãa rag n yaa a Harafa yagense. La a Davɩɩd ne a nebã tõoga bãmb n kʋ-ba.

← Chapter 19 Jump to: Chapter 21 →