1 Chronicles 22

Mossi MPBU (WẼNNAAM SEBRE 2014)

← Chapter 21 Jump to: Chapter 23 →

1A Davɩɩd yeelame: Sẽn-Ka-Saab roogã zĩig na n yɩɩ zĩ-kãngã, la yaa ka la b na n maan tẽn-kugr ning Israyɛll nebã sẽn na n maand maoong sẽn yõogd bugmã.

2A Davɩɩd kɩtame tɩ b tigim sãamb nins sẽn dag n be Israyɛll soolmã pʋgẽ wã, n kɩt tɩ kug-pɛɛsdb pees kug-bɛd Wẽnnaam doogã meeb yĩnga.

3Yẽnda leb n segla kut wʋsgo, tɩ b na n tall n maan kaads rignoyã kʋɩlems ne sogdsã yĩnga, la zũud wʋsg me b sẽn ka tõe n mak n bãng a zɩslem,

4ne sɛɛdr daad ka tɛka, bala Sɩdõ ne Tɩɩr nebã rag n zãa sɛɛdr daad wʋsg n wa kõ a Davɩɩde.

5A Davɩɩd dag n yetame: Mam biig a Salmo ket n yaa bi-bilfu, la a nan ka mi bũmb ye. La roogã b sẽn na n me Sẽn-Ka-Saab yĩngã yaool n yaa sẽn na n zẽk b yʋʋrã, la wilg b ziirã tẽmsã fãa pʋse. Dẽ yĩngã, mam na n segla roogã meebo. Woto, a Davɩɩd segla bũmb wʋsg roogã meeb wɛɛngẽ t'a nan ket n vɩ.

6A Davɩɩd boola a biig a Salmo, n yeel-a t'a me roog Sẽn-Ka-Saab sẽn yaa Israyɛll Wẽnnaamã yĩnga.

7A yeela a Salmo yaa: M biiga, mam dag n data ne m sũur fãa, n me roog Sẽn-Ka-Saab sẽn yaa mam Wẽnnaamã yʋʋr yĩnga.

8La Sẽn-Ka-Saab yeela maam yaa: «Fo raaga neb wʋsg zɩɩm, la f zaba zab-kãsemse. Dẽ yĩngã, ka na n yɩ foom n na n me roog mam yʋʋrã yĩng ye. Bala, fo raaga neb wʋsg zɩɩm dũniyã zug mam nifẽ.

9Fo na n doga bi-ribla, la bi-ribl-kãng na n yɩɩ ned sẽn na n wa ne vʋʋsgo. Mam na n kõo yẽnda vʋʋsgo, n kɩt tɩ bɛɛb nins fãa sẽn gũbg yẽnda wã bas-a taale. B na n pʋda a yʋʋr t'a Salmo, la m na n kɩtame tɩ Israyɛll zĩnd ne laafɩ la bãane, yẽnda vɩɩmã tɛka.

10Yaa yẽnda n na n me roog mam yʋʋrã yĩnga. Yẽnda na n yɩɩ mam biiga, la mam na n yɩɩ yẽnda ba. Mam na n kɩtame tɩ yẽnda rĩungã tall pãng Israyɛll soolmã pʋgẽ wakat fãa.»

11Moasã, m biiga, bɩ Sẽn-Ka-Saab zĩnd ne-fo, tɩ f paam tõogre, la f tõog n me Sẽn-Ka-Saab sẽn yaa fo Wẽnnaamã roogo, wa b sẽn dag n yeel fo wɛɛngẽ wã.

12Moasã, bɩ Sẽn-Ka-Saab kõ foom yam la bãngre. Bɩ b kɩt tɩ f naamã tall pãng Israyɛll soolmã pʋgẽ, tɩ f tõog n sak Sẽn-Ka-Saab sẽn yaa fo Wẽnnaamã tõogo.

13Woto, fo sã n sak noy la no-tũuds nins Sẽn-Ka-Saab sẽn dag n kõ a Moyiis Israyɛll yĩngã, fo na n paama tõogre. Dẽ yĩngã, bɩ f paam pãng la raoodo, la f ra zoe rabeem, la f ra yɛɛs ye.

14Sẽn-Ka-Saab roogã meeb yĩnga, mam namsame n segl sãnem zɩslem sẽn ta toand tus pis-tã, ne wanzuri zɩslem sẽn ta toand tus-kẽemd a yembre. Sã n yaa ne zũudã ne kutã, b ka tõe n mak-b n bãng b zɩslmã tɛk ye. Bala, b yaa wʋsgo. Sẽn paas me, mam segla raad ne kuga, la f tõe n kell n bao n paasame.

15Tʋmtʋmdb ka tɛk beeme n na n sõngd foom: kug-pɛɛsdba, kug ne raad zut gʋlsdba, la tʋʋm-mitb toay-toaya.

16Sãnemã ne wanzuri wã la zũudã ne kutã ka tõe n sõd n sɛ ye. Moasã, bɩ f yik n sɩng tʋʋmde, la bɩ Sẽn-Ka-Saab zĩnd ne-fo.

17Dẽ, a Davɩɩd yeela Israyɛll nanambsã fãa tɩ b wa sõng a biig a Salmo. Yẽnda yeel-b lame yaa:

18Dẽ yĩngã, Sẽn-Ka-Saab sẽn yaa yãmb Wẽnnaamã ka be ne yãmb la? B ka kõ yãmb vʋʋsg zĩig fãa la? Bãmb kõo maam tẽn-kãngã nebã fãa tɩ m sooge, la soolmã yaa Sẽn-Ka-Saab ne b nebã n so.

19Bɩ y bao Sẽn-Ka-Saab sẽn yaa yãmb Wẽnnaamã ne y sũyã fãa la ne y yamã fãa, la y me Sẽn-Ka-Saab sẽn yaa Wẽnnaamã roogo. Woto, y na n tõog n talla Sẽn-Ka-Saab kaoolã koglgã ne teed nins sẽn welg toor Sẽn-Ka-Saab yĩngã, n tɩ bĩng roog ning y sẽn na n me Sẽn-Ka-Saab yʋʋrã yĩngã pʋgẽ.

← Chapter 21 Jump to: Chapter 23 →