Judges 14

Mossi MPBU (WẼNNAAM SEBRE 2014)

← Chapter 13 Jump to: Chapter 15 →

1A Samsõ kẽnga Timna, la beenẽ, a yãnda pʋg-sad Filistẽ-dãmbã kom-pugli sʋka.

2La a Samsõ sẽn wa n lebg n kuilã, a yeela a baaba ne a ma yaa: «Mam sẽn kẽng Timna wã mam yãnda pʋg-sad Filistẽ-dãmbã kom-pugli sʋka, kẽng-y n tɩ kos-y-yã-a n kõ-m tɩ m maan m paga.»

3A Samsõ ba wã ne a ma wã yeela yẽnda yaa: «Yaa pag n ka be fo roagdbã kom-pugli sʋk bɩ? Bɩ tõnd buudã fãa sʋka, pag n ka be beenẽ, tɩ fo wa tɩ rat Filistẽ-dãmbã sẽn ka kẽ bãongã biig n maan f paga?» La a Samsõ yeela a baaba yaa: «Kos-y yẽnda n kõ-ma, bala, yaa yẽnda n ta mam yam.»

4A Samsõ ba wã ne a ma wã rag n ka mi tɩ yaa Sẽn-Ka-Saab n maan a woto, n na n tũnug a Samsõ, sẽn na n yɩl n paam n sɩbg Filistẽ-dãmbã ye. Wakat-kãng tɩ yaa Filistẽ-dãmbã n dag n so Israyɛll nebã.

5Dẽ, a Samsõ tũ a baaba ne a ma n kẽng Timna, la bãmb sẽn ta Timna reezẽ tɩɩs pʋtã, gɩgem-poll n yi zĩig pʋgẽ n kelemd n segd a Samsõ.

6Sẽn-Ka-Saab Sɩɩgã siga a Samsõ zugu, la baa ne yẽnda sẽn dag n ka zãad rao-teoogã, a gãda gɩgemdã ne a nus n tak-a n yang wa bulla. La yẽnda rag n ka togs a ba wã ne a ma wã yẽnda sẽn maan bũmb ningã ye.

7A Samsõ kẽng n tɩ sõsa ne Filistẽ-dãmbã pʋg-sadã, la pʋg-sadã rag n taa yẽnda yam.

8Rasem bilf rẽ zugẽ, a Samsõ lebg n dabda Timna n na n tɩ peeg a pagã, n tek n bʋdg n na n ges gɩgem-kɩɩngã. La yẽnda mikame tɩ sĩ-loll n kẽ gɩgem-wɛɛgã pʋg n maan sɩɩdo.

9A Samsõ yãka sɩɩdã n zãad n dɩtẽ la a kẽnda. La yẽnda sẽn ta a ba wã ne a ma wã nengẽ, a yãka sɩɩdã n kõ bãmb me tɩ b rɩ. La a ka yeel bãmb t'a yãka sɩɩdã gɩgem-wɛɛg pʋgẽ ye.

10A Samsõ ba wã kẽnga pʋg-sadã ba-yiri. La a Samsõ maana yi-kãadem tigr-beenẽ. Bala, kom-bɩɩsã rag n minim n maanda a woto.

11Filistẽ-dãmbã sẽn yãnd a Samsõ sẽn wa wã, b tũusa kom-bɩɩs pis-tã n yeel-b tɩ b wa be ne a Samsõ.

12A Samsõ yeela kom-bɩɩsã yaa: «Mam na n wẽe yãmb yel-bũndi, la tigrã rasem a yopoe wã pʋgẽ, yãmb sã n tõog n bilg maam yel-bũndã võore, mam na n kõo yãmb fu-yerd pis-tã ne koab pis-tã.»

13La yãmb sã n ka tõog n bilg maam yel-bũndã võore, yaa yãmb n na n kõ maam fu-yerd pis-tã ne koab pis-tã. La kom-bɩɩsã yeela a Samsõ t'a wẽ a yel-bũndã tɩ bãmb kelgdame.

14A Samsõ yeela bãmb yaa: «Rɩɩb yii rɩt pʋgẽ, la sẽn yaa noog yii pãng soab pʋgẽ.» Maana rasem a tãabo, tɩ kom-bɩɩsã ka tõog n bilg yel-bũndã võor ye.

15Rasem a yopoe wã daare, kom-bɩɩsã yeela a Samsõ pagã yaa: «Belg f sɩdã t'a togs tõnd yel-bũndã võore, sã n ka rẽ, tõnd na n yõoga foom ne f ba wã zak bugum. Yãmb boola tõnd n dat n fã la?»

16A Samsõ pagã rag n yãbda ne a Samsõ wʋsg n yetẽ: «Yãmb kisa maam, y ka nong maam ye. Yãmb wẽe mam buudã kom-bɩɩsã yel-bũndi, n yaool n ka sak n bilg maam a võorã ye.» La a Samsõ yeela yẽnda yaa: «Mam ka tol n bilg-a m ba wã bɩ m ma wã ye. Dẽ wã, na n yɩɩ a wãn tɩ mam na n bilg foom a võore?»

17Pagã yãba ne a Samsõ tigrã rasem a yopoe wã tõre. La rasem a yopoe wã daare, a Samsõ bilga pagã a yel-bundã võore. Bala, pagã rag n namsda yẽnda wʋsgo. Dẽ, pagã rɩka yel-bũndã võor n tɩ togs a buudã kom-bɩɩse.

18Rasem a yopoe wã daare, sẽn deng wĩndgã kõom, tẽnga nebã wa n yeela a Samsõ yaa: «Bõe n yaa noog n yɩɩd sɩɩdo? La bõe n tar pãng n yɩɩd gɩgemde?» La a Samsõ yeela bãmb yaa: «Yãmb sã n dag n ka tallẽ mam nag-sadgã n ko, yãmb dag n kõn bãngẽ mam yel-bũndã võor ye.»

19Sẽn-Ka-Saab Sɩɩgã kẽ a Samsõ, la yẽnda kẽnga Askalon, n tɩ kʋ neb pis-tã beenẽ n wʋk b koabã n wa kõ neb nins sẽn bilg yel-bũndã võorã. Dẽ, a Samsõ lebg n kuila a ba wã yir ne sũ-puugri.

20Woto, b rɩka a Samsõ pagã n wẽneg n kõ a Samsõ zoa ning sẽn yãag-a a Samsõ a yi-kãadmẽ wã.

← Chapter 13 Jump to: Chapter 15 →