Judges 4

Mossi MPBU (WẼNNAAM SEBRE 2014)

← Chapter 3 Jump to: Chapter 5 →

1A Ewuud kũumã zugẽ, Israyɛll nebã leb n maana sẽn yaa wẽng Sẽn-Ka-Saab nifẽ.

2Dẽ, Sẽn-Ka-Saab kɩtame tɩ Kana rĩm a Yabẽ sẽn dag n dɩt naam Hasoor tẽngã tõog Israyɛll nebã. Rĩm a Yabẽ tãb-biisã naab yʋʋr la a Sizera. A Sizera rag n bee Harosɛt-Goyim.

3Rĩm a Yabẽ dag n tara kut saar-dãmb kobs-wɛ, la a rag n namsda Israyɛll nebã n maand-b pãng hal yʋʋm pisi. Dẽ, Israyɛll nebã kelem n boola Sẽn-Ka-Saabo.

4Wakat-kãnga, rẽ tɩ yaa a Lapidot pag a Deboora sẽn yaa Wẽnnaam no-rɛɛsã n yaa Israyɛll bʋ-kaooda.

5A Deboora rag n zĩndida koang ning b sẽn boond t'a Deboora koangã sẽn be Rama ne Betɛll sʋkã tẽngre, n kaood bʋʋdã. Zĩ-kãng bee Efrayiim soolem ning sẽn be tãms sʋkã. La Israyɛll nebã rag n kẽnda yẽnda nengẽ tɩ b kaood bʋʋdã.

6A Deboora kɩtame tɩ b tɩ bool Kedɛɛs sẽn be Neftali soolmẽ wã rao a Abinoam biig a Barak t'a wa. La Deboora yeel-a lame yaa: «Ade, Sẽn-Ka-Saab sẽn yaa Israyɛll Wẽnnaamã kõta foom noor n yetẽ: Kẽng n tɩ yãk neb tus piig Neftali ne Zabulõ buudã sʋka, n tall-b n dʋ Taboor tãngã.

7Mam na n kɩtame tɩ rĩm a Yabẽ tãb-biisã naab a Sizera ne a kut saar-dãmbã, la a tãb-bi-kʋʋngã wa seg foom Kisõ ko-soogã noore, la m na n kɩtame tɩ f tõog-ba.»

8A Barak yeela a Deboora yaa: «Fo sã n na n yãag maam, mam na n kẽngame, la fo sã n ka na n yãag maam, mam ka na n kẽng ye.»

9Dẽ, a Deboora leokame: «Beneere, mam na n yãag-f lame. La bɩ f bãng tɩ f ka na n paam ziir zab-kãngã pʋgẽ ye. Bala, Sẽn-Ka-Saab na n kɩtame tɩ pag tõog a Sizera.» Woto, a Deboora yikame n tũ a Barak n kẽng Kedɛɛse.

10A Barak boola Zabulõ ne Neftali buudã tɩ b wa Kedɛɛse. Yaa neb tus piig n tũ yẽnda, la a Deboora me tũume.

11Kɛn ned a Hebɛɛr sẽn yaa a Moyiis rɛɛmb a Hobaab biigã rag n welgame n bas Kɛɛb nebã n tɩ tilg a fu-roogã Sanayim tɩ-kãsengã sɛɛgẽ, n pẽneg Kedɛɛse.

12B tɩ togsa a Sizera t'a Abinoam biig a Barak rʋʋ Taboor tãngã zugu.

13A Sizera tigma a kut saar-dãmb kobs-wɛ wã, ne neb nins fãa sẽn dag n tũud yẽnda wã Harosɛt-Goyim, tɩ b na n kẽng Kisõ ko-soogã noore.

14Dẽ, a Deboora yeela a Barak yaa: «Yik moasã, bala, yaa rũndã daarã la Sẽn-Ka-Saab na n kɩt tɩ f tõog a Sizera. Sẽn-Ka-Saab na n lʋɩɩ fo taoore.» Dẽ, a Barak siga Taboor tãngã zugu, la neb tus piigã tũu yẽnda.

15Sẽn-Ka-Saab kɩtame tɩ rabeem-kãseng kẽ a Sizera ne a kut saar-dãmbã fãa ne a tãb-biisã fãa. La a Barak kʋ-b-la ne zabr sʋʋga. A Sizera sig n basa a kut saarã n zoe ne nao.

16A Barak riga saar-dãmbã ne tãb-biisã n tɩ tãag Harosɛt-Goyim. La bãmb kʋʋ a Sizera tãb-biisã zãng ne zabr sʋʋga, n ka bas ba a ye tɩ põs ye.

17A Sizera zoee ne nao n tɩ kẽ Kɛn ned a Hebɛɛr pag a Zayɛll fu-roogẽ. Bala, wakat-kãng tɩ Hasoor dĩm a Yabẽ ne Kɛn dao a Hebɛɛr buudã rag n nooma ne taaba.

18A Zayɛll yi n sega a Sizera n yeel-a yaa: «M soaala, zoe-y n wa-y-yã! Wa-y n kẽ-y mam doogẽ wã! Da zoe-y rabeem ye!» A Sizera zoe n kẽe a Zayɛll fu-roogẽ wã, la a Zayɛll baoo fu-goabg n pil a Sizera.

19A Sizera yeela pagã yaa: «M kot-f lame tɩ f kõ-m koom bilf tɩ m yũ, tɩ ko-yũud n tar-ma.» A Zayɛll rɩka waoog ne bĩisim n kõ a Sizera t'a yũ, la a lebs n pil-a.

20Yẽnda leb n yeela pagã yaa: «Yals roogã noor tɩ ned sã n sok foom tɩ ned ka kẽ ka, bɩ f leok-a tɩ ayo.»

21A Sizera rag n yɛɛ hal wʋsgo. Dẽ, a gãandame n gũs gõe-kãsenga. La a Hebɛɛr pag a Zayɛll feooga fu-roogã baaf a yembre, n dɩk zãare, n maag a meng n lams n kolge, n dɩdg a Sizera tʋb-kɩrgã n ka ne baafã t'a sãag n kɩ tẽnga, la a Sizera kiime.

22A Barak sẽn dag n digd a Sizera wã wẽneg n taame, la a Zayɛll yi n seg-a lame n yeele: «Wa-y tɩ m wilg-y rao ning yãmb sẽn baoodã zĩiga. La a Barak sẽn kẽ pagã fu-roogẽ, bõe la wã, a Sizera n ki n dɩga, tɩ baafã ket n sel a yɛgdgã.»

23Badaare, Wẽnnaam kɩtame tɩ Israyɛll nebã tõog Kana rĩm a Yabẽ.

24Zabr ning Israyɛll nebã sẽn zab ne Kana rĩm a Yabẽ wã talla pãnga, hal tɩ b kʋ-a.

← Chapter 3 Jump to: Chapter 5 →