Luke 6

Mossi MPBU (WẼNNAAM SEBRE 2014)

← Chapter 5 Jump to: Chapter 7 →

1Zʋɩf-rãmbã vʋʋsg daar a yembre, a Zeezi dag n pɩʋʋgda pʋto. Bãmb karen-biisã rag n yãgsda kood n tẽgd n wãbdẽ.

2Fariizẽ-dãmbã kẽer soka bãmb yaa: «Yaa bõe tɩ yãmb maand bũmb ning noor sẽn ka kõ tɩ maan vʋʋsg daare?»

3A Zeezi leok-b lame yaa: Yãmb ka karem bũmb ning a Davɩɩd sẽn maan kom sẽn tar yẽnda ne a tũud-n-taasã wakat la?

4Yẽnda sẽn kẽ Wẽnnaam doogẽ wã to‑to n deeg kaset bur paadmã n wãb la a kõ a tũud-n-taasã, baa ne ned sẽn ka tar noor tɩ rɩ, sã n ka maan-kʋʋdbã balã la?

5La a Zeezi yeela bãmb yaa: «Ninsaal Bi-riblã yaa vʋʋsg daarã Zu‑soaba.»

6Zʋɩf-rãmbã vʋʋsg daar a to, a Zeezi kẽe karen-doogẽ wã n zãmsd nebã. Dao n dag n be beenẽ t'a nug‑rɩtg ki.

7Tõog karen-saam-dãmbã ne Fariizẽ-dãmbã dag n gũusda a Zeezi n dat n ges b sã n na n maaga ned vʋʋsg daarã. Dag n yaa sẽn na n yɩl n paam bũmb n dõd a Zeezi.

8La a Zeezi dag n mii b tagsdã. Dẽ, b yeela rao ninga nug sẽn ki wã yaa: «Yik n yals sʋk ka. Yẽnda yik n yaasa yĩngri.»

9Dẽ, a Zeezi yeela bãmb yaa: «Mam sokda yãmba, noor beeme tɩ maan neer vʋʋsgã daar bɩ, bɩ tɩ maan wẽnga? Tɩ fãag ned bɩɩ, bɩ tɩ kʋ-a?»

10Dẽ, a Zeezi wẽnemd n gesa bãmb fãa n yeel raoã t'a tẽeg a nugã. Yẽnda tẽegame la a nugã vʋʋgame.

11Bãmb sũyã puuga wʋsg tɩ b yẽsd ne taab n baood b sẽn na n maan a Zeezi bũmb ninga.

12Wakat-kãnga, a Zeezi kẽnga tãng zug n na n tɩ pʋʋse. La bãmb pʋʋsa Wẽnnaam yʋngã tɛk fãa.

13La beoogã sẽn vẽege, bãmb boola b karen-biisã n tũus bãmb piig la a yiibu, n bool-b tɩ tẽn-tʋmdbã.

14Yaa a Sɩmo bãmb sẽn pʋd a yʋʋr t'a Pɩyɛɛrã, ne a ba-biiga Ãndere, a Zak ne a Zã, la a Filip ne a Bartelemi,

15a Matye la a Toma, la a Alfe biig a Zak ne a Sɩmo b sẽn boond tɩ Zelote,

16la a Zak biig a Zʋʋdaase, ne a Zʋdaas Iskaryo sẽn lebg zãmb soabã.

17A Zeezi yii ne b karen-biisã tãngã zug n sig n yaas tẽnga. Bãmb karen-bi wʋsgã dag n bee be ne neb kʋʋng wʋsg sẽn yi Zʋʋde soolem fãa, la Zeruzalɛm la Tɩɩr tẽn-kɩremse ne Sɩdõ.

18Bãmb dag n waame n na n kelg a Zeezi, la b paam tɩ b yiis b bãasã n maag-ba. Zĩn-dẽgd sẽn dag n namsd-b rãmbã paama maagre.

19La neb kʋʋngã fãa rag n baood n sɩɩsa a Zeezi. Bala, pãng n dag n yit a Zeezi nengẽ n maagd bãmb fãa.

20Dẽ, a Zeezi zẽka b neng n ges b karen-biisã n yeel yaa: bark bee yãmb sẽn yaa naong rãmba zutu, bala, Wẽnnaam soolem yaa yãmb dẽnda.

21Bark bee yãmb kom sẽn tar moasã wã zutu, bala, yãmb na n tɩgame. Bark bee yãmb sẽn yãbd moasã wã zutu, bala, yãmb na la.

22Bark bee yãmb zutu, nebã sẽn na n kisg yãmba, la b bak yãmb toore, la b tʋʋd yãmba, la b tõdg yãmb yʋʋrã, n geelg-a wa bõn-wẽng Ninsaal Bi-riblã yĩnga.

23Bɩ y maan sũ-noog da-kãng n kɩdme, tɩ bõe yãmb keoor na n yɩɩ kãseng arzãn pʋgẽ. Bala, bãmb ba-rãmb dag n maanda Wẽnnaam no-rɛɛsdbã me a woto.

24La yãmb sẽn yaa arzegs rãmba, yãmb na paam toogo, bala, yãmb tara y belsgo.

25Yãmb sẽn dɩt n tɩgd moasã wã, yãmb na paam toogo, bala, kom na n yõka yãmba. Yãmb sẽn laad moasã wã, yãmb na paam toogo, bala, yãmb na n paama sũ-sãang la nintãm.

26Yãmb na paam toogo, nebã fãa sã n pẽgd yãmba, bala, ba-rãmbã rag n maanda belgr no-rɛɛsdbã a woto.

27La mam yeta yãmba, yãmb sẽn kelgd maamã, tɩ y nong y bɛɛbã, la y maan neb nins sẽn kis yãmbã neere.

28Ning-y neb nins sẽn kãabd yãmb wẽngã zut barka, la y pʋʋs neb nins sẽn maand yãmb wẽngã yĩnga.

29Ned sã n wẽ fo yegd pɛka, bɩ f wẽnemd a to wã me n kõ-a. Ned sã n deeg fo fu-bedre, bɩ f bas-a t'a reeg f fu-bilã me.

30Ned ning fãa sẽn kos foom bũmb bɩ f kõ-a, la ned sã n dɩk fo paoongo, bɩ f ra sok-a ye.

31Bũmb ningã yãmb sẽn dat tɩ nebã maan yãmbã, bɩ yãmb me maan bãmb me a woto.

32Yãmb sã nong neb nins sẽn nong yãmbã bala, bõe bark la yãmb na n paame? Yel-wẽn maandbã me nonga neb nins sẽn nong bãmbã me.

33La yãmb sã n maand neb nins sẽn maand yãmb neerã bal neere, bõe bark la yãmb na n paame? Yel-wẽn maandbã me maanda a woto.

34La yãmb sã n pengd neb nins yãmb sẽn tẽed tɩ b na n paam n lebsa yãmbã bala, bõe bark la yãmb na n paame? Yel-wẽn maandbã me pengda taaba, tɩ b tõe n leb n deeg sẽn zem a woto me.

35La yãmba, nong-y bɛɛbã. Maan-y-b neere, la y peng n da tẽed tɩ b na lebs-y ye. La yãmb keoor na n yɩɩ kãsenga, la yãmb na n yɩɩ Wẽnnaam sẽn be saasẽ-saasẽ wã kamba. Bala, bãmb yaa sõama zɩ-beoog rãmbã ne nin-wẽnsã yĩnga.

36Bɩ y yɩ nimbãan-zoɛtba, wa yãmb ba wã sẽn yaa nimbãan-zoɛtã.

37Da bʋ-y ned bʋʋd ye, la b kõn bʋ yãmb bʋʋd ye. Da kao-y ned bʋʋd ye, la b kõn kao yãmb bʋʋd ye. Maan-y sugri, la b na maan yãmb me sugri.

38Bɩ y kõ la b na kõ yãmba. B na n maka sõama n kõ yãmba, n dĩ, n yegse, n ning tɩ sudgi. Bala, ne makdg ning yãmb sẽn makd n kõt nebã, Wẽnnaam na n maka ne rẽnda n kõ yãmba.

39A Zeezi wẽe bãmb yel-bũnd me n yeele: Zoang tõe n tɛɛ zoang sɩda? Bãmb b yiibã fãa kõn lʋɩ bokẽ sɩda?

40Karen-biig ka yɩɩd a karen-saamb ye. La karen-biig fãa sẽn paam zãmsg n taas lebga wa a karen-saamba.

41Yaa bõe tɩ fo get moogã sẽn be f ba-biigã nifẽ wã, n yaool n ka ne sug-raoogã sẽn be fo mengã rẽndẽ wã?

42Fo sẽn ka ne sug-raoogã sẽn be fo nifẽ wã, fo na n yɩɩ a wãn n yeel f ba-biigã t'a bas tɩ f yãk moogã sẽn be a nifẽ wã? Zãmb soaba, deng n yãk sug-raoogã sẽn be fo nifẽ wã, la rẽ, fo na n yãnda sõama n tõog n yãk moogã sẽn be f ba-biigã nifẽ wã.

43Tɩ-sõng ka be n womd bi-wẽns ye, la tɩ-wẽng me ka be n womd bi-sõama ye.

44Bala, b bãngda tɩɩg fãa a biisẽ. B ka wobd kankam gõaag zug ye, la b ka kaood sib kɛglg zug ye.

45Nin-sõng yiisda bõn-sõng a laog-sõngã bĩngr zĩigẽ sẽn be a sũurẽ, la nin-wẽng yiisda wẽng a laog-wẽngã bĩngr zĩigẽ sẽn be a sũurẽ. Bala, yaa bũmb ning sẽn pid sũurã n yit noorẽ wã.

46Bõe yĩng tɩ yãmb boond maam tɩ Zu-soaba! Zu-soaba! La y ka maand mam sẽn yet yãmb bũmb ninsã?

47Ned ning fãa sẽn wat mam nengẽ n kelgd mam goamã n sakdẽ, mam na n wilga yãmb yẽnda sẽn wẽnd ned ninga.

48Yẽnda wẽnda wa rao sẽn yik n na n me a roogo. Yẽnda tuu bog-zulunga, n yẽbg roogã kugr zugu. La ko-kãseng sẽn wa, ko-zoetmã zoeeme n wẽ roogã, la a ka tõog n miim-a ye, roogã meebã sẽn dag n yaa sõama wã yĩnga.

49La ned ning sẽn wʋmd n ka sakdẽ wã, wẽnda wa rao a yembr sẽn me a roog tom zugu, n ka tuk bok ye. Ko-zoetmã zoee n wẽe roogã, la tao-tao bala, a lʋɩɩme, la ro-kãngã sãoongã yɩɩ kãsenga.

← Chapter 5 Jump to: Chapter 7 →

Recommended Reading

Commentary Luke Commentaries → Devotional Luke Devotional Guide → Get This Bible Mossi MPBU (WẼNNAAM SEBRE ) Study Bible →