Song of Solomon 3

Mossi MPBU (WẼNNAAM SEBRE 2014)

← Chapter 2 Jump to: Chapter 4 →

1Mam sẽn be m gãagẽ wã ne yʋngã, mam baoo mam sẽn nong-a soabã. Mam bao-a lame la m ka yãnd-a ye.

2Moasã, mam na n yikame n gilg tẽngã n tũ a soayã la m kẽng nebã sẽn sõsdẽ wã, n bao m sẽn nong-a soabã. Mam bao-a lame la m ka yãnd-a ye.

3Gũudb nins sẽn gũud tẽngã sega maam tɩ mam sok-b yaa: «Yãmb ka yãnd mam sẽn nong-a soabã?»

4Mam sẽn loog gũudbã bal yee, la m sẽn yãnd m sẽn nong-a soabã. Mam gãda yẽnda, la m kõn tol n bas-a, hal tɩ m wa tall-a n tɩ kẽ m ma roogẽ, n kẽ sẽn dog-a maamã ro-gãagẽ.

5Zeruzalɛm kom-pugli, mam kota yãmb tɩ y zoe yãgsã la y zoe walsã sẽn be weoogẽ wã, la y ra sak n nek nonglem t'a wakat nan ka ta ye.

6Yaa ãnda n yit we-raoogẽ wa miir ne parfẽ la wisd buud wʋsg bug-zõos sẽn nusdã n watẽ?

7Ad a Salmo gãagã. Israyɛll tãb-bi-gãndaadã sʋka, sẽn yaa-b gãndãad n yɩɩdã pis-yopoe n gũbg yẽnda.

8Bãmb fãa boba sʋʋse, n mi zabre. Ned kam fãa lulga zabr sʋʋg a sɛɛgẽ, b sẽn zoet tɩ neb na n wa ling bãmb ne yʋngã yĩnga.

9Rĩm a Salmo maana a gãagã ne Libã tɩɩs raado.

10B maana a ra-lugdsã ne wanzuri, la b maan a zugã ne sãnem, la b pil a zaoondedgã ne peen-miuugu. La Zeruzalɛm pagbã manega a pʋgã ne nonglem.

11Sɩyõ kom-pugli, yi-y n ges-y rĩm a Salmo sẽn fõgen maanf ning a ma wã sẽn fõgen yẽnda a pʋg-peegrã daar sẽn yaa yẽnda sũ-noog daarã.

← Chapter 2 Jump to: Chapter 4 →