Song of Solomon 8

Mossi MPBU (WẼNNAAM SEBRE 2014)

← Chapter 7 Jump to:

1Fo sã n dag n yaẽ mam tão-raoogo, n yẽsem m ma bĩisã, mam sã dag n yãndẽ-la foom yɩnga, mam dag n na n mokẽ-la foom tɩ ned ka paoog maam ye.

2Mam dag n na n tallẽ-la foom n wa m ma zakẽ tɩ f zãms maam, tɩ mam kõ foom reezẽ rãam sẽn yaa noogo, sẽn maan ne mam gernaad biis koom.

3Bɩ a bas tɩ m kʋgl a goabg nugã, la a mobg maam ne a rɩtgã!

4Zeruzalɛm kom-pugli, mam kota yãmb tɩ y ra nek nonglem t'a wakat nan ka ta ye.

5Ãnda la sẽn yit we-raoogẽ wã n kogl a noangã n watẽ wã? Mam neka foom pom tɩɩgã tẽngre. Yaa beenẽ la f ma rɩk f pʋga. Yaa beenẽ la yẽnda rɩk pʋg n dog foom.

6Kɩt tɩ m yɩ wa bãnd fo sũurã pʋgẽ, la wa bãnd fo kangã zugu. Bala, nonglem tara pãng wa kũum, la nonglem-kãseng yaa toog wa kɩɩm-kulgu. A bug-witmã ka rɩt n kell ye. A zabda wa Sẽn-Ka-Saab bugum.

7Ko-kãsemsã ka tõe n kiis nonglem ye, la kʋɩlsã ka tõe n dɩ-a ye. Ned sã n dat n dɩk a yir paoong fãa n tek ne nonglem, yẽnda ka na n paam bũmb tɩ ka paoogr ye.

8Tõnd tara tão-poak sẽn yaa bilfu, a nan ka pus bĩis ye. Ned sã n bao tõnd tão-poakã n na n kẽ kãadem, d na n maana bõe n kõ tõnd tão-poakã?

9Yẽnda sã n yaa wa lalga, tõnd na n mee wanzuri gãosg a zugu. Yẽnda sã n yaa wa rignoore, tõnd na n pag-a-la ne sɛɛdr da-peko.

10Mam yaa wa lalga, la mam bĩisã yaa wa gãsdo, la mam yaa wa ned sẽn paam vɩ-bãan yẽnda nifẽ.

11A Salmo rag n tara reezẽ tɩɩs pʋʋg Baall-Hamon. Yẽnda rɩka pʋtã n kɩs neb tɩ b gũ. Bãmb ned a yembr fãa wa n kɩsa a Salmo wanzuri ligd-koeems tusr a tɩ-biisã yĩnga.

12Mam reezẽ tɩɩs pʋʋg ning mam sẽn tarã bee mam taoore. Wanzuri ligd-koeem tusrã yaa foom a Salmo n so, la ligd-koeems kobessi wã yaa reezẽ tɩɩs gũudb n so.

13Fo sẽn be zẽed zĩisẽ wã, neb n kelgd foom: Kɩt tɩ m wʋm f koɛɛgã!

14M noanga, zoe wa yãka, zoe wa wal-bil tãms nins sẽn tar yũ-noodã zutu!

← Chapter 7 Jump to: