Song of Solomon 6

Mossi MPBU (WẼNNAAM SEBRE 2014)

← Chapter 5 Jump to: Chapter 7 →

1Fo sẽn yaa neer n yɩɩd pagb a taabã, fo noangã kẽnga yɛɛnẽ! Togs tõndo! Fo noangã kẽnga yɛɛnẽ togs tɩ d sõng-f n bao-a?

2M noangã kẽnga a zẽedẽ wã n ta zĩis nins b sẽn sel tɩ-bãooneg sẽn womd biis sẽn tar yũ-noodã zĩigẽ n na n tɩ wãben a rũmsã zẽedã zĩisẽ, la a bao rulg lɛlma.

3Mam yaa m noangã rẽnda, tɩ m noangã yaa mam dẽnda. Yẽnda wãbenda a rũmsã rulg lɛlem sʋka.

4M noanga, fo tara ra-sãnd wa Tɩrsa tẽngã, fo yaa neer wa Zeruzalɛm. Nebã zoeta foom wa tãb-biis wʋsg sẽn zãad b tãb-kaoore.

5Ra ges maam ye. Bala, fo ninã geosg namsda maam. Fo zoobdã yaa wa bʋʋs sẽn be Galaad tãngã zug n sigda.

6Fo yẽnã yaa wa b sẽn tɩ so piis koom n lebg n watẽ. Peosg fãa tara a kĩnkir-taaga. Peosg ka be n ka tar a kĩnkir-taag ye.

7Fo yegdsã wẽnda wa b sẽn bok gernaade, n be fu-bil ning fo sẽn pil f nengã pʋgẽ.

8Rĩm-pogs yaa bãmb pis-yoobe, la pʋg-rɩkdsã yaa bãmb pis-nii, la b ka tõe n sõd pʋg-bi wã n sɛ ye.

9A yembr bal n yaa m walle, n yaa m yam ned menga. Yẽnda yaa a ma bi-pugl-yende. Yẽnda yaa sẽn dog-a yẽnda wã bi-nongre. Pʋg-bi wã yãnd-a lame n yeel t'a tara sũ-noogo, la rĩm-pogsã ne pʋg-rɩkdsã me pẽg-a lame n yeele:

10Ãnda n pukd wa zĩ-yẽegre, n yaa neer wa kiuugu, n yãgd wa wĩntoogo, tɩ nebã zoet-a wa tãb-bi-kʋʋng sẽn zãad b tãb-kaoore?

11Mam kẽnga zẽed zĩigẽ sẽn tar nobse, n na n tɩ ges ko-soodẽ tɩ-tobendã, la m ges reezẽ tɩɩsã sã n tobdame, la gernaad tɩɩsã sã n ningda puudu.

12Mam dag n ka mi ye, la mam wa n mikame tɩ m bee m nebã nin-kãsems saar-dãmb pʋsẽ.

← Chapter 5 Jump to: Chapter 7 →