Song of Solomon 4

Mossi MPBU (WẼNNAAM SEBRE 2014)

← Chapter 3 Jump to: Chapter 5 →

1Ad fo sɩd yaa neere, m zoa, fo sɩd yaa neere! Fo ninã yaa wa wal sẽn be fu-bil ning fo sẽn pil f nengã pʋga. Fo zoobdã yaa wa bʋʋs sẽn be Galaad tãngã zug n sigda.

2Fo yẽnã yaa wa pe-bi b sẽn dat n wõrse, n tall-b n tɩ so koom n lebg n watẽ. Peosg fãa tara a kĩnkir-taaga, peosg ka be n ka tar a kĩnkir-taag ye.

3Fo no-bɩmsã yaa wa gĩs-miuugu, la fo goamã yaa noogo. Fo yɛgdgã yaa wa gernaad b sẽn boke, n be fu-bil ning fo sẽn pil f nengã pʋga.

4Fo yublã yaa wa a Davɩɩd gãosgã b sẽn me n na n bĩng zab-teedo. Gãnd tusrã yaga beenẽ, Gãndaadã gãnd fãa yaga beenẽ.

5Fo bĩis a yiibã yaa wa yãg-bi a yiib sẽn yaa kinkirsi, n wãbd yamd rulg lɛlmã sʋka.

6Sẽn deng zĩig maagre, zĩigã fãa sẽn na n lebg maasem, mam na n zoee n kẽnga tãng ning miir sẽn beẽ wã, la kunkubr ning parfẽ yũug sẽn beẽ wã.

7M noanga, fo yaa neere. Fo ka tar zang ye.

8M pʋg-paala, wa tɩ d loog n bas Libã! Wa tɩ d yi Libã! Yals Amana tãngã zugu, ne Seniir la Hɛrmo tãmsã zutu, n ges gɩgma wã sẽn gãe zĩis ninsã, la tãms nins ãbs sẽn beẽ wã.

9M pʋg-paala, m tão, fo noogda mam sũur wʋsgo. Fo sã n ges maam vugr bal tɩ mam yãnd fo lo-yɛrg a yembr bala, mam sũur yaa noogo.

10M pʋg-paala, m tão, fo nonglmã yaa noogo. Fo nonglmã sãoo reezẽ rãam, fo kaam toay-toayã yũug yaa noog n yɩɩd parfẽ-rãmb buud a taabã fãa.

11M pʋg-paala, fo no-bɩmsã tokda sɩɩdo. Sɩɩd ne bĩisim bee fo zelemdã tẽngre. Fo futã yũug wẽnda Libã yũ-noogã.

12M pʋg-paala, m tão, fo wẽnda zẽed zĩig sẽn tar yãgre, la ko-bundum zĩig sẽn tar lalga, la bulg sẽn page.

13Fo tɩ-tobendã yaa wa gernaad tɩɩs sẽn womd bi-noodo, n tar puud ne kaam.

14A tara parfẽ ne safran la rudum sẽn tar yũ-noogo, la sinamon ne tɩɩs nins b sẽn tar n maand wisdu, la miir ne alowɛs la bũmb nins fãa yũug sẽn yaa noog wʋsgã.

15Fo yaa wa ko-bundum sẽn be zẽed zĩisẽ, la bulg koom sẽn kõt vɩɩm, la ko-zoetem sẽn yit Libã.

16Rɩtg sebgo, yiki! Goabg sebgo, wa! Wa-y n fug-y mam zẽedã zug t'a yũugã piuugi. Bɩ m noangã wa a zẽedã zĩigẽ n dɩ a tɩ-bi-noodã.

← Chapter 3 Jump to: Chapter 5 →