Song of Solomon 7

Mossi MPBU (WẼNNAAM SEBRE 2014)

← Chapter 6 Jump to: Chapter 8 →

1Sulamit-poaka, lebg n wa, lebg n wa, lebg n wa ka, lebg n wa tɩ d ges-fo. Yaa bõe tɩ y rat n ges Sulamit-poakã wa sul a yiib neb sẽn tigim taab n saoodẽ?

2Nin-kãseng bi-pugla, fo naoã sẽn be fo neooda wã pʋsã yaa neere! Fo gɛy wã yaa gils wa tʋʋm-mitb sẽn maan lo-yɛrg sogdse.

3Fo taoorã yaa wa la-gilg b sẽn ning reezẽ rãam sẽn kalem ne bũmb sẽn tar yũ-noog a pʋga. Fo pʋgã wẽnda ka-rʋr sẽn be rulg lɛlem sʋka.

4Fo bĩis a yiibã yaa wa yãg-bi a yiib sẽn yaa yãk a yembr kamba.

5Fo yublã wẽnda gãosg sẽn me ne wob-yẽna. Fo ninã wẽnda Ɛsbon bãgsã koom sẽn be Bat-Rabim tẽngã rignoore. Fo yõorã wẽnda Libã gãosg sẽn teesd Damaas sẽnẽ.

6Fo zugã wẽnda Karmell tãngã, fo zoobdã yaa wa gĩs sẽn yaa kẽeg haoo. Fo zoobdã bɩrame n vind rĩmã.

7M noanga, m yam neda, fo yaa neere, foom n kõt maam yamleoogo.

8Fo yasrã wẽnda koang tɩɩga, fo bĩisã wẽnda reezẽ-gĩna.

9Mam tagsame tɩ m na n dʋʋ koang tɩɩgã n gãd a wilã. Bɩ f bĩisã yɩ wa reezẽ-gĩna, tɩ fo vʋʋsmã yũug yɩ wa pom tɩɩg biis yũugu,

10tɩ fo noorã goam yɩ wa rã-noogo, t'a pʋdgr yaa naana m noangã yĩnga, n sedgd gõen-gõetba no-bɩmsẽ.

11Mam yaa m noangã rẽnda, la yẽnda yam loee ne maam.

12M noanga, wa tɩ d kẽng weoogẽ n tɩ zĩnd tẽn-bãooneg pʋs ne yʋngo.

13Bɩ d yik pĩnd n kẽng reezẽ tɩɩs pʋtẽ wã, n tɩ ges reezẽ tɩɩsã sã n tobdame n ningd puudu, la gernaad tɩɩsã sã n ningda puudu. Yaa beenẽ la mam na n saag-fo.

14Mandragoor yũug yitame, la tɩ-bi-nood nins fãa sẽn yaa paals la kʋdã bee tõnd dignoyẽ wã. M noanga, mam bĩnga bãmb fo yĩnga.

← Chapter 6 Jump to: Chapter 8 →