Galatians 3

Marwari Bible

← Chapter 2 Jump to: Chapter 4 →

1हे गेलौ गलातियो रा रैवणवाळौ, थांनै कुण वैम में घाल दिया? म्हैं थांनै इतौ साफ बतायो हो के, ज्यूं यीसु मसीह नै थारै सांमै सूली माथै चढ़ाया है।

2म्हैं थौरे ऊं ओहीज जांणणौ चावूं के, थांनै मूसा रै कायदे ऊं परमेसर री आतमा रौ वरदान मिळयो के सुभ संदेस माथै विसवास करणै ऊं?

3कांई थै इता गेला हो के जिकौ कांम थै परमेसर री आतमा ऊं सरू करयौ, उणनै थै सरीर ऊं पूरौ करणौ चावौ?

4कांई थै इता दुख यूं ही उठाया? ऐड़ौ तो कोनीं लागै!

5परमेसर थांनै आतमा रौ दांन दियौ अर थौरे बीच में अचूम्बे रा कांम करै है। वे इण वास्तै करै के, थै मुसा रै कानुन माथै चालो या इण वास्तै के, थै सुभ संदेस माथै विसवास करौ हो?

6ओ यूं ही है, ज्यूं अबराहम रै बारै में सास्तर कैवै है के, “अबराहम तो परमेसर माथै विसवास करयौ अर धरमी मानिजियो।”

7थै ओ जांण लौ जिकौ परमेसर माथै विसवास करै, वे अबराहम रा हाचा वंस है।

8पवितर सास्तर में ओ पैला ऊं इज लिख्योड़ो हो के, परमेसर माथै विसवास करणै ऊं जिकौ यहूदी कोनीं वे भी धरमी बणैला। इण वास्तै परमेसर पैला ऊं हीज अबराहम नै संदेस सुणा दियौ हो के, “थारै ऊं धरती री सगळी जातियो आसीस पावैला।”

9अबराहम विसवास करयौ तो उणनै आसीस मिळी, इण वास्तै जिकौ विसवास करैला, उणनै आसीस मिळैला।

10जिकौ लोग मूसा रै कायदे नै मांनै, उणौ माथै सराप है। क्यूंकै सास्तर में लिखयोड़ो है के, “जिकौ मूसा रै कायदे री किताब में लिखयोड़ी सगळी बातां नै पूरी नीं करै, उण माथै सराप है।”

11पर आ बात सगळौ रै सांमै है के, मूसा रै कायदे ऊं कोई परमेसर रै सांमै धरमी कोनीं रै सकै। क्यूंकै सास्तर कैवै है के, “धरमी आदमी विसवास ऊं जीवतौ रैवैला।”

12मूसा रै कायदे रौ विसवास ऊं की लेवणो देवणो कोनीं। क्यूंकै सास्तर में लिखयोड़ो है के, “जिकौ व्यवस्था रै विधान नै मांनेला, वो उणरै ही माथै जीवता रैवैला।”

13मसीह अपांरै वास्तै सराप नै आप ले लियौ अर मूसा रै कायदे रा सराप रै बदळै अपांनै मोल ले लिया। क्यूंकै सास्तर में लिखयोड़ो है, “जिकौ सूली माथै लटकाइजे, वो सराप में है।”

14ओ इण वास्तै होयौ की, अबराहम री आसीस मसीह यीसु मे दूजी जातियो तांई पुगै, अर विसवास ऊं वा परमेसर री आतमा मिळै, जिण रौ वचन दियोड़ो हो।

15हे भाइयो, म्हैं थांनै एक आम आदमी री ज्यूं कहूं हूं के, मिनखौ में की इकरार रै जावै, तो इण में नीं तो की जोड़ी जे, नीं ही उण में की घटाई जे अर नीं ही उणनै तोड़ सकौ।

16इणरौ मतलब ओ है के, परमेसर वचन अबराहम नै दियौ अर उण ऊं उण रा वंस नै दियौ। सास्तर यूं नीं कैवै के, उणरा वंस रा लोगां नै या घणा जणा नै दियौ। पर सास्तर एक जणा वास्तै कैवै के, थारा वंस नै। यानि यीसु मसीह नै।

17म्हारै कैणै रौ अरथ ओ है के, जिकौ इकरार परमेसर पैला हीज पको कर दियौ हो, उणनै च्यार सौ तीस साल बाद में, मुसा रौ कानुन आन टाळ नीं सकै अर नीं ही उणरा वचन बेकार हो सकै।

18अगर मूसा रै कायदे ऊं बापोती मिळती तो, वचन रौ कीं लेवणो देवणो कोनीं। पर परमेसर री दया ऊं अबराहम नै दियोड़ा वचन ऊं हीज बापोती फोगट में मिळै है।

19तो इण मूसा रै कायदे रौ कांई मतलब है? जिण वंस रै आवणा रौ वचन दियोड़ो हो, उणरै आवणा ऊं पैला तांई मूसा रै कायदे परमेसर रा हुकम नीं मानणा रै कारण दिया हा। ऐ मूसा रै कायदे सरग दूत मूसा नै दिया, जिकौ परमेसर अर मांनखै रै बीच में राजीपो करावण वाळौ हो।

20बीच में राजीपो कराण वाळौ एक तरफ ऊं नीं होया करै, पर वो घणी तरफ ऊं राजीपो करावै। पण परमेसर एक हीज है।

21तो कांई मुसा रै कायदे अर परमेसर रा वचन एक दूजा रा आंमै सांमै है? कदैई कोनीं। अगर मूसा रै कायदे रै रैवता जिन्दगी मिळती, तो मुसा रै कायदे ऊं हीज पाप माफ हो जावता।

22पर पवितर सास्तर कैवै है के, पूरौ संसार पाप रै हाथ में है। ताकी यीसु मसीह माथै विसवास करणै ऊं जिकौ वचन मिळयो है वो, सगळा विसवास करणै वाळा नै मिळ सकै।

23पर विसवास रै आवणा ऊं पैला यानि अपांरै में विसवास परगट होणै ऊं पैला, अपां मुसा रै कानुन री जेळ में हा।

24इण वास्तै जैड़ी तांई अपां मसीह नै नीं मांनया अर विसवास करणै ऊं धरमी नीं बण्या, मूसा रै कायदा ही अपांरा गुरु हा।

25अबै अपां विसवास में हा अर मूसा रै कायदे अपांरा गुरु कोनीं है।

26क्यूंकै अपां यीसु मसीह माथै विसवास करणै ऊं अबै परमेसर रा टाबर हा।

27जिता भी मसीह में बतिस्मो लियौ, वे यीसु मसीह नै धारण कर लिया।

28अबै नीं कोई यहूदी रियौ, अर नीं कोई यूनानी, नीं कोई गुलाम है, नीं कोई आजाद, नीं कोई नर है अर नीं कोई नारी। क्यूंकै अबै थै सगळा मसीह में एक हो।

29अगर थै मसीह रा हो, तो अबराहम रा वंस अर परमेसर रा वचन ऊं थै उणरा वारिस भी हो।

← Chapter 2 Jump to: Chapter 4 →