Galatians 6

Marwari Bible

← Chapter 5 Jump to:

1हे भाइयो, अगर कोई मिनख किणी पाप रै कारण पकड़ीज जावै तो थै जो धरमी हो, उणनै नरमाई ऊं संभाळौ अर उणनै धरम मारग माथै पाछौ लाओ अर सावचेत रैवौ के, थै भी किणी परीकसा में नीं फस जाओ।

2थै दुख में एक दूजा रा भार नै उठाओ अर इण तरीका ऊं मसीह रा कानुन नै मानता रौ।

3अगर कोई कीं नीं होवता भी खुद नै घणौ हमजे, तो वो खुद नै धोखो दैवै है।

4हर एक अपणै आप नै देख ले, ताकी थांनै खुद माथै घमण्ड करणै रौ मौकौ मिळेला। पर थांनै एक दूजा री बराबरी नीं करणी चाहीजै।

5क्यूंकै हरैक नै खुद रौ ही भार उठाणौ पड़ै है।

6जिकौ मसीह रा वचन सिखया है, वे जिकौ चौखी चीजों आपरा खनै है, वा सिखावण वाळा नै भी दे।

7अपणै आपनै धोखो मत दो। परमेसर री मजाक नीं उडाई जा सकै। क्यूंकै, मिनख जैड़ौ बोवेला, वो वैड़ौ ही काटेला।

8जिकौ सरीर वासना वास्तै बोवे, वो सरीर रै नास री फसल काटेला। जिकौ पवितर आतमा वास्तै बोवे, वो पवितर आतमा ऊं अनत जीवन री फसल काटेला।

9अपांनै भलाई करता हीमत नीं हारनी है। तो आओ अपां ढ़िला नीं पड़ो ताकी वगत आया फळ पा सकौ।

10इण वास्तै भलाई करणै रौ मौकौ नीं चुकणो, सगळौ साथै भलाई करणी, खास करनै अपणा विसवासी भाइयो साथै।

11देखौ, अब म्हैं कैड़ा मोटा मोटा आखर थौरे वास्तै खुद रै हाथ ऊं लिखूं हूं।

12जिकौ सरीर ऊं दिखाओ करै अर थांनै खतनो कराणै रौ दबाब दे, वे इण वास्तै के, मसीह री सूली रै परचार रै कारण उणौ नै दुख नीं झेलनो पड़ै।

13क्यूंकै, खतना करण वाळा खुद तो मूसा रै कायदे नै मांनै कोनीं, पर थौरो खतनो कराणौ चावै। ताकी वे इण बात माथै घमण्ड करै के, थै उणौरै कैणै ऊं खतनो करायो।

14म्हैं तो सिरफ अपांरा परभु यीसु मसीह री सूली माथै घमण्ड करूं हूं। इण कारण ऊं म्हैं संसार री निजर में अर संसार म्हारी निजर में सूली माथै मर गिया।

15किणी रौ खतनो होयौ के नीं होयौ, इणरौ कोई मतलब कोनीं। पण इण बात रौ मतलब है, के अपां पूरी तरैह ऊं नई सिस्टी बण जाओ।

16इण वास्तै इण रीत माथै चालण वाळा माथै, अर परमेसर रै इजरायल माथै सानति अर दया होती रैह।

17म्हैं विणती करूं के, आगै ऊं कोई म्हनै तंग मत करजौ। क्यूंकै यीसु मसीह रा निसाण म्हारै सरीर माथै लिया फिरूं हूं।

18हे भाइयो, अपांरा परभु यीसु मसीह रौ अनुग्रह थौरी आतमा माथै बण्योड़ो रैवै। आमीन।

← Chapter 5 Jump to: