Ephesians 3

Dutch Frisian

← Chapter 2 Jump to: Chapter 4 →

1Doawäaje sie etj, Paulus, de Jefangna Tjristus Jesus fe jünt Heide -

2wann jie aundasch jeheat ha von de Vewaultung de Jnod Gottes, dee mie fe jünt jejäft es,

3daut mie derjch eene Openboarung daut Jeheemniss es bekaunt jemoakt worde, aus etj verhäa em korten jeschräwe ha,

4aun däm jie biem läse ertjane miene Ennsejcht enn daut Jeheemniss Tjristi,

5daut enn aundre Jeschlajchta de Säns de Mensche nijch bekaunt jemoakt wort, ausset nü jeopenboat worde es siene heilje Apostel en Profeete derjch däm Jeist;

6daut de Heide Metoawe send en Metjlieda en metdeel ha aun de Vespräatjung enn Tjristus Jesus derjch de froohe Botschoft,

7dän äa Deena etj jeworde sie no de Gow de Jnod Gottes, dee mie jejäft es nom Wirtje von siene Krauft.

8Mie, däm aula jerinjsten von aule Heilje, es dise Jnod jejäft worde, unja de Heide dän onndentjboaren Ritjdom Tjristi too vetjindje,

9en aulem kloa too moake, waut de Vewaultung de Jeheemnese es, daut vonne Eewijchtjeit häa vestoake wea enn Gott, dee aules jeschaufe haft;

10doamet nü de Machthabende en de Jewaulte enn dän himmlische Uate derjch de Jemeende metjedeelt woat dee välsiedje Weissheit Gottes,

11nom eewijen Väanehme, dän hee ütjefeat haft enn Jesus Tjristus, onsem Harrn;

12enn däm wie daut froohe Toovetrüe ha en däm Toogang em Vetrüe derjch dän Gloowe aun am.

13Doawäajen bedd etj, nijch too vezoage bie miene Bedrenjnise fe jünt, dee jüne Ea es send.

14Doawäajen beaj etj miene Tjneee ver däm Voda [onsem Harrn Jesus Tjristus],

15no däm jiedre Vodaschoft enne Himmels en oppe Ead jenant woat,

16daut hee jünt jeeft, nom Ritjdom siena Harlijchtjeit met Krauft jestoatjt too woare derjch sienem Jeist aum ennalijchen Mensch;

17daut Tjristus derjch dän Gloowe enn jüne Hoate wohnt, enn däm jie enne Leew jewartelt en jejrind send,

18doamet jie emmstaund send, too bejriepe met aule Heilje, waut de Breed en Lenj en Huag en Deep es,

19en too ertjane dee de Ertjantnis äwatroffne Leew Tjristi, doamet jie erfällt woare - han too de gaunse Vollheit Gottes.

20Oba däm, dee äwa aules doone kaun, äwa aule Moht mea, aus wie bedde oda vestohne, no de Krauft, dee enn ons wirtjt,

21am es de Ea enn de Jemeende en enn Tjristus Jesus, opp aule Jeschlajchta de Eewijchtjeit de Eewijchtjeite! Amen.

← Chapter 2 Jump to: Chapter 4 →