Zechariah 2

Nuer Bible © Bible Society in South Sudan 1998,2012

← Chapter 1 Jump to: Chapter 3 →

1Ɛ Jɛn min cä waŋdä kap nhial, cua̱ wut mi te tetdɛ kɛ dep thëm nɛn!

2Kä cua̱ thiec i̱, “Kä wi̱i̱nikä?” Kä cuɛ ɣä loc i̱, “Wa̱a̱ thɛm ni Jɛ-ru-tha-lɛm, kɛ ɣöö bä di̱tdɛ kɛnɛ bärɛ ŋa̱c.”

3Kä cu jääk Kuɔth in ruac kɛ ɣä ben, kä cu jääk dɔ̱diɛn mi bä jɛ ben lor ben,

4kä cuɛ jɛ jiök i̱, “Riŋni kä ŋuɛ̈t ɛ mi, jio̱k ni jɛ i̱, ‘Jɛ-ru-tha-lɛm ba wec mi ba ciɛŋ a thil päny, kɛ ɣöö tëë kɛ nɛy ti ŋuan kɛ ɣɔ̱k ti nyin ŋuan.

5Kä ɣän puɔ̱nydä ba̱a̱ päny maac mi wil jɛ, kä ba̱a̱ gɔɔydiɛn rɛydɛ,’ ruac ni ɣän Kuoth Nhial.”

6Kä cu Kuoth Nhial wee i̱, “Biakɛ! Biakɛ! Barɛ rɔ̱ muun kuec caam, kɛ ɣöö cä yɛ däkä tuɔ̱ŋni ɣɔaa da̱ŋ ŋuaan.”

7Bia barɛ rɔ̱ yɛn pɛ̈ɛ̈c tin cieŋ kä Bɛ̈-bi-lɔn, lënyɛ rɔ̱ kä Jɛ-ru-tha-lɛm.

8Kä ɛ jɛn min laar Kuoth Nhial in la Ruey Ɣɔaa ɛ, kɛ kɔr kä min cɛ ɣä jäk kä döör tin ca yɛ pɛc, kɛ ɣöö ramɔ ci yɛ nyɔt ɔ cɛ thiap ni ti̱ey waŋdɛ.

9Kä ɣän bäkɛ thiap nikɛ tetdä, kä bi kɛna pɛ̈ɛ̈c nɛɛni tëë la̱tkɛ kɛ ikä. Kä bia cu ŋa̱c ɛn ɣöö jäk ɣä Kuoth Nhial in la Ruey Ɣɔaa.

10Kä cu Kuoth Nhial wee i̱, “Rɔali kä a lɔcdu tɛth ji̱n nya Dha-yɔn, kɛ ɣöö ɣän a bëëni, kä bä ben cieŋ rɛydun.

11Kä ɛn cäŋ ɛmɔ, bi döör ti ŋuan ben kä Kuoth Nhial, kä bi kɛna nɛɛkɛ. Kä bɛ cieŋ rɛydun, kä bia cu ŋa̱c ɛn ɣöö ɛ jɛn jäk ɣä kä yɛ mɔ.

12Kä bi Kuoth Nhial Juda ka̱n ala wecdɛ mi rɛl rɔ, kä bɛ Jɛ-ru-tha-lɛm cu nyɔk kɛ mi mɛɛkɛ jɛ.”

13Kä pa̱lɛ rɔ̱ piny nhiam Kuɔth Nhial yɛn nɛy diaal, kɛ ɣöö jɛn a bëëni guäth cieŋädɛ min rɛl gɔɔydɛ rɔ.

← Chapter 1 Jump to: Chapter 3 →