Zechariah 4

Nuer Bible © Bible Society in South Sudan 1998,2012

← Chapter 3 Jump to: Chapter 5 →

1Kä cu jääk Kuɔth in ruac kɛ ɣä rɔ nyɔk kɛ ben, kä cuɛ ɣä ker, ce̱tnikɛ min la raan a kërkɛ ni̱n.

2Kä cuɛ ɣä jiök i̱, “Ɛŋu nɛɛni mɔ?” Kä cua̱ jɛ loc i̱, “Nɛ̈ɛ̈nä cuuŋ lɛmbärä mi da̱a̱p kɛɛliw, a te liɛɛrɛ wi̱i̱dɛ, kä te lɛmbärni bärɔw rɛydɛ, kɛ dup bärɔw ti wä kä lɛmbär.

3Kä te gëkdɛ kɛ jiɛn Ɔ-lip da̱ŋ rɛw, te kɛl kui̱c cuëëc lirä, kä te min dɔ̱ŋ kui̱c caam.”

4Kä cua̱ jääk in ruac kɛ ɣä jiök i̱, “Kɛ ŋuni kɛn ti̱ti̱ kuäärä?”

5Kä cuɛ ɣä loc i̱, “Ji̱n kui̱ci kɛn ti̱ti̱?” Kä cua loc i̱, “Eey kuecä kɛ kuäärä.”

6Kä cuɛ ɣä jiök i̱, “Nɛmɛ ɛ ruac Kuɔth Nhial kɛ kui̱ Dhɛ-ru-ba-bɛl. Kä ciɛ lua̱ŋ kiɛ buɔ̱m, ɛ yiëëdä, ruac ni ɣän Kuoth Nhial in la Ruey Ɣɔaa.

7Kä ɛ ji̱n ŋa lö päm in bum bum? Kä bi ce̱tnikɛ wi̱c muɔ̱ɔ̱n kä Dhɛ-ru-ba-bɛl. Kä bɛ päm gɔŋtɔtdä ka̱m raar, kä bɛ cu rɔal i̱, ‘Kuoth pothɛ! Kuoth pothɛ!’ ”

8Kä cuɛ ŋot kɛ mi bä ruac Kuɔth Nhial kä ɣä, wëë i̱,

9“Ɛn tuk duëël ɛmɛ ci Dhɛ-ru-ba-bɛl ɛ la̱t kɛ tetdɛ, kä bɛ jɛ thuk. Kä ɛ jɛn bia ŋa̱c ɔ jäk ɣä Kuoth Nhial in la Ruey Ɣɔaa kä yɛ.

10Kä ram ɔ bi cäŋ kä mi tɔt cany ɔ, mi wëë Dhɛ-ru-ba-bɛl nɛn a lätdɛ luak, bi lo̱ckiɛn tɛɛth. “Kä kɛn bärɔw ti̱ti̱ kɛ wäŋ Kuɔth Nhial, tin guicɛ wi̱c muɔ̱ɔ̱n kɛɛliw.”

11Kä cua̱ jɛ jiök i̱, “Kä kɛ ŋuni kɛn jiɛn Ɔ-lip da̱ŋ rɛw tɔ̱tɔ̱, tɔ̱ te kɛl kui̱c cuëëc cuuŋä lɛmbärä, kä te min dɔ̱ŋ kui̱c caam ɔ?”

12Kä cua nyɔk kɛ thiec in rɛwdɛ i̱, “Kä kɛ ŋuni kɛn yuan jiaath Ɔ-lip da̱ŋ rɛw tɔ̱tɔ̱, tɔ̱ te gekä mathuuri dääpä da̱ŋ rɛw tin la ka̱mkɛ liɛɛth raar thi̱n ɔ?”

13Kä cuɛ ɣä loc i̱, “Ji̱n kui̱ci ti̱ti̱ kɛ ŋuni?” Kä cua loc i̱, “Eey, kuäärä.”

14Kä cuɛ ɣä jiök i̱, “Kɛ kɛn rɛw tin ca kuany, kɛ ɣöö ba Kuäär ni Kuoth lätikä wi̱i̱ muɔ̱ɔ̱n kɛɛliw.”

← Chapter 3 Jump to: Chapter 5 →