Zechariah 3

Nuer Bible © Bible Society in South Sudan 1998,2012

← Chapter 2 Jump to: Chapter 4 →

1Kä cu Kuoth Nhial ɣä lɛ nyuɔ̱th bo̱o̱th palä in di̱i̱t ni Jɔ-cua tëë cuŋä nhiam jääkä Kuɔth Nhial. Kä te Cɛy-tan cuŋä kui̱c cuëëc Jɔ-cua gɔɔnyɛ jɛ.

2Kä cu Kuoth Nhial Cɛy-tan jiök i̱, “Ci Kuoth Nhial ji̱ kuɛth Cɛy-tan! Ci Kuoth Nhial in ci Jɛ-ru-tha-lɛm mɛk ji̱ kuɛth. Ɛn Jɔ-cua ɛ mi ce̱tdɛ kɛ tɛ̈ɛ̈ mi kuanykɛ rɛy maac.”

3Kä täämɛ Jɔ-cua tëë cuŋä nhiam jääkä Kuɔth kɛ bi̱i̱ mi lɔw.

4Kä cu jääk Kuɔth nɛy tin te cuŋä nhiamdɛ jiök i̱, “Wuɔcɛ bieyni tɔ̱ lɔathni tɔ̱tɔ̱ puɔ̱ɔ̱nydɛ.” Kä cuɛ Jɔ-cua jiök i̱, “Ɣän cä dueerku woc kä ji̱, kä bä ji̱ moc kɛ bieyni ti gɔw.”

5Kä cua̱ wee i̱, “Akɛ la̱th kɛ kum mi gɔaa wi̱i̱dɛ.” Kä cua jɛ la̱th wi̱i̱dɛ, kä cua jɛ moc kɛ bi̱i̱. Kä te jääk Kuɔth Nhial cuŋä kutdɛ.

6Kä cu jääk Kuɔth Nhial Jɔ-cua jiök i̱,

7“Nɛmɛ ɛ min ci Kuoth Nhial in la Ruey Ɣɔaa ɛ lar, ɛn ɣöö mi guuri ni duɔ̱ɔ̱pdä, kä tiitdi ŋuɔ̱tkä, deri luaakdä yop kä deri rɛy kalɛ tit, kä dëë ji̱ moc kɛ gua̱a̱th rɛy nɛɛni ti te cuŋä ti.

8Kä liŋɛ täämɛ lö bo̱o̱th palä in di̱i̱t ni Jɔ-cua, yɛnɛ mäthniku tin te nhiamdu. Kɛn kɛ ji̱ nyuuthä ti gɔw. Ɣän bä ja̱ŋdä ni yuan jiaath nööŋ.

9Kä nɛnɛ ɣän la̱thä päm kɛl nhiam Jɔ-cua, ɛn päm ɛ mɔ tëë kɛ pek da̱ŋ bärɔw. Kä ɣän bä gɔ̱r, kä bä duer muɔ̱ɔ̱n ɛ mi woc kɛ jɛn cäŋ ɔ kɛl ɔ, ruac ni ɣän Kuoth Nhial in la Ruey Ɣɔaa.

10Kä cu Kuoth Nhial in la Ruey Ɣɔaa ruac ɛn ɣöö ɛn cäŋ ɛmɔ bi ramɔ gua̱n thieekädɛ cɔal thaar jiaathdɛ kɛ mal.”

← Chapter 2 Jump to: Chapter 4 →