1 Kings 16

Nyankole 1964

← Chapter 15 Jump to: Chapter 17 →

1Bwanyima ekigambo kya MUKAMA kyaija ahari Yehu mwene Hanani kuhana Baasha, nikigira kiti:

2Nkakwiha omu mucucu, naakukuza, naakugira omwebembezi w'eihanga ryange Israeli; mbwenu ogyendeire omu muhanda gwa Yeroboamu, waasiisisa abantu bangye Abaisraeli, baanyitsa ekiniga n'ebibi byabo.

3N'ahabw'ekyo niinyija kukwihiraho kimwe n'enju yaawe, ngigire nk'eya Yeroboamu mwene Nebati.

4Omuntu wa Baasha weena, origwa omu rurembo, aryariibwa embwa; kandi origwa omu ishwa, aryariibwa amahungu.

5Mbwenu endiijo emirimo ya Baasha yoona, n'ebi yaakozire n'eby'amaani ge, tibihandiikirwe omu kitabo ky'eby'omu busingye bw'abagabe ba Israeli?

6Bwanyima Baasha yaagwejegyera, yaashanga baishenkuru, yaaziikwa Tiruza; Ela omutabani yaategyeka omu mwanya gwe.

7Kandi ekigambo kya MUKAMA kyaraba omuri Yehu mwene Hanani nikhana Baasha n'enju ye, ahabw'obubi bwona obu yaakozire omu maisho ga MUKAMA, naamwitsa ekiniga n'ebi yaakozire n'emikono ye nk'eby'enju ya Yeroboamu, kandi n'ahabw'okucwekyereza egyo nju.

8Omu mwaka gwa makumi abiri na mukaaga ogw'omu busingye bwa Asa omugabe wa Yuda, Ela mwene Baasha akatandika kutegyekyera Israeli omuri Tiruza, yaamara aha ngoma emyaka ebiri.

9Bwanyima omugaragwa we Zimuri, omukuru w'ekicweka kimwe ky'ebigaari bye, yaamugiira omu naama kumurwanisa. Ela ku yaabaire ari Tiruza omu nu ya Aruza omukuru w'ekikaari kye omuri Tiruza, naanywa okuhitsya obu araasinde,

10Zimuri yaatahamu, yaamuteera, yaamugwisaho, omu mwaka gwa makumi abiri na mushanju ogw'omu busingye bwa Asa omugabe wa Yuda, yaategyeka omu mwanya gwe.

11Ku yaatandikire kutegyeka, aherize ati kuza aha ngoma, yaita ab'enju ya Baasha boona; tiyaamutsigira oyetwa omwojo omuri beene waabo nari omuri banywani be.

12Okwo nikwo Zimuri yaacwekyereize ab'enju ya Baasha boona, nk'ekigambo kya MUKAMA eki yaarabize omuri nabi Yehu naahana Baasha, oku kyabaire kiri,

13ahabw'ebibi bya Baasha byona, n'eby'omutabani Ela ebi baakozire, kandi ebi baasiisiise Abaisraeli, bakaitsa MUKAMA Ruhanga wa Israeli ekiniga n'eby'obufamutima byabo.

14Mbwenu endiijo mirimo ya Ela yoona n'ebi yaakozire byona, tibihandiikirwe omu kitabo ky'eby'omu busingye bw'abagabe ba Israeli?

15Omu mwaka gwa makumi abiri na mushanju ogw'omu busingye bwa Asa omugabe wa Yuda, Zimuri akategyekyera ebiro mushanju omuri Tiruza. Obwo engabo zikaba ziteire orusiisira kurwanisa Gibesooni ey'Abafilistia;

16bwanyima engabo ezaabaire ziri omuri orwo rusiisira zikahurira nibagira bati: Zimuri agiire omu naama, yaita omugabe; nikyo Abaisraeli boona bahinduriire Omuri omukuru w'eihe omugabe wa Israeli aha izooba eryo bakiri omu rusiisira.

17Atyo Omuri yainamuka kuruga Gibesooni n'Abaisraeli boona, baagota Tiruza.

18Zimuri ku yaareebire orurembo rwanyagwa, yaataaha omu kigo ky'omu kikaari ky'omugabe, yaayeyokeza omu nju y'omugabe, yaafa,

19ahabw'ebibi ebi yaakozire, naakora kubi omu maisho ga MUKAMA, naagyendera omu muhanda gwa Yeroboamu, n'ahabw'ekibi eki yaasiisiise Abaisraeli

20Mbwenu endijo mirimo ya Zimuri yoona n'obugomi obu yaagomire, tibihandiikirwe omu kitabo ky'eby'omu busingye bw'abagabe ba Israeli?

21Bwanyima Abaisraeli baayecwamu habiri, ekicweka kimwe kyakuratira Tibuni mwene Ginaasi kumuhindura omugabe, n'ekindi kyakuratira Omuri.

22Kwonka abantu abaakuratiire Omuri baasingura abaakuratiire Tibuni mwene Ginaasi; atyo Tibuni yaafa, Omuri yaaba omugabe.

23Omu mwaka gwa makumi ashatu na gumwe ogw'omu busingye bwa Asa omugabe wa Yuda, Omuri akatandika kutegyeka Israeli, yaategyekyera emyaka ikumi n'ebiri; omuri egyo yaamara emyaka mukaaga naategyekyera Tiruza.

24Bwanyima yaagura ahari Shemeri ekibungo ekirikwetwa Samaria etalanta ibiri z'efeeza, yaakyombekaho orurembo, n'orurembo orwo yaarweta Samaria, naarweterera Shemeri mukama w'ekyo kibungo.

25Omuri yaakora ebirikwangwa MUKAMA, kandi yaakora kubi okukira boona abaamubandiize;

26ahabw'okuba akagyendera omu muhanda gwona ogwa Yeroboamu mwene Nebati, n'omu bibi ebi yaasiisiise Abaisraeli, bakaitsa MUKAMA, Ruhanga wa Israeli, ekiniga ahabw'eby'obufamutima byabo.

27Mbwenu endiijo miromo ei Omuri yaakozire yoona, n'eby'amaani agu yaayorekire, tibihandiikirwe omu kitabo ky'eby'omu busingye bw'abagabe ba Israeli?

28Bwanyima Omuri yaagwejegyera, yaashanga baishenkuru, yaaziikwa omuri Samaria; Ahabu omutabani yaategyeka omu mwanya gwe.

29Omu mwaka gwa makumi ashatu na munaana gw'omu busingye bwa Asa omugabe wa Yuda, Ahabu mwene Omuri akatandika kutegyeka Israeli; yaategyekyera Israeli omuri Samaria emyaka makumi abiri n'ebiri.

30Omu busingye bwe yaakora ebirikwangwa MUKAMA okukira boona abaamubandiize.

31Kandi tiyaakyeta kintu kibi okugyendera omu muhanda gwa Yeroboamu mwene Nebati, yaagaruka yaashwera Yezebeeli muhara wa Isi-baali, omugabe w'Abasidoni, yaagyenda yaaheereza Baali, kandi yaaguma naamuramya.

32Yaayombekyera Baali ogwo eitambiro omu nju ei yaabaire amwombekyeire Samaria.

33Kandi Ahabu yaakora Ashera. Yaakira abagabe ba Israeli boona abaamubandiize okwitsa MUKAMA, Ruhanga wa Israeli, ekiniga.

34Omu busingye bwe Hieli owa Beseeli akombeka Yeriko; ku yaayombekire ati omusingi gwarwo, omwana we w'omujigaijo Abiramu yaafa; kandi ku yaatairemu ati ebiti by'eirembo ryarwo, omwana we wa bucuranda Seguba nawe yaafa, nk'ekigambo kya MUKAMA eki yaarabize omuri Yoshua mwene Nuuni, oku kyabaire kiri.

← Chapter 15 Jump to: Chapter 17 →