Hebrews 4

Nyankole 1964

← Chapter 3 Jump to: Chapter 5 →

1N'ahabw'ekyo nk'oku endagaano y'okutaaha omu buruhuukiro bwe ekiriho, ka tutiine, omuntu weena omuriimwe atashusha nk'owaaremwa kubuhikaho.

2Ahakuba buzima naitwe tukagambirwa ebigambo birungi nka bo, kwonka ekigambo eki baahuriire tikirabagasiire, ahabw'okuba tikirashangire kwikiriza omuribo.

3Mumanye ngu itwe abaikiriize tutaaha omu buruhuukiro obwo, nk'oku yaagizire ati: Nikyo naagiriire ekiniga nkarahira nti, Tibaritaaha mu buruhuukiro bwangye; n'obu emirimo ye eraabe yaahweire, okuruga aha kuhangwa kw'ensi.

4Ahakuba hariho ahandi ahu yaagambire aha by'ekiro kya mushanju ati: Ruhanga akahuumura emirimo ye yoona aha kiro kya mushanju.

5Kandi hoona omu mwanya ogwo yaagira ati: Tibaritaaha mu buruhuukiro bwangye.

6N'ahabw'ekyo nk'oku hakiriho bamwe ab'okubutaahamu, kandi abaagambiirwe ira obutumwa burungi baaremirwe kubutaahamu ahabw'okutahurira,

7nikyo Ruhanga yaateereireho ekindi kiro, eki yaayetsire “Eri izooba”, naakigambira omuri Daudi bwanyima y'ebiro bingi, (nk'oku kyaheza kugambwa eruguru,) ati: Eri izooba ku muraahurire eiraka rye, mutagangaaza emitima yaanyu.

8Ahakuba kuri noogira ngu Yoshua akabaha oburuhuukiro, Ruhanga takugambire ha kiro ekindi bwanyima.

9N'ahabw'ekyo hakiriho sabato y'okuhuumuriraho ebiikiirwe abantu ba Ruhanga;

10ahakuba omuntu weena otaahire omu buruhuukiro bwa Ruhanga, biri ahuumwire emirimo ye, nk'oku Ruhanga yaahuumwire eye.

11N'ahabw'ekyo ka twezirikye kutaaha omu buruhuukiro obwo, hatagira omuntu weena owaagwisibwa okutahurira okw'omuringo nk'ogwo.

12Ahakuba ekigambo kya Ruhanga kiine amagara n'amaani, kiine obwogi bwingi okukira rurara yoona ey'amoogi abiri, nikicumita kihika ahu kitaanisiza amagara n'omwoyo, ngingo n'omushokooro, kandi kirahuka kucaaka ebi omuntu arikuteekateeka n'ebi amaririire omu mutima gwe kukora.

13Kandi omu maisho ge tihariho kihangirwe ekisherekirwe; kureka ebintu byona bishuurwirwe nibireebwa butunu omu maisho g'Ogwo oshoboorora ebyaitu.

14Mbwenu nk'oku twine Omunyamurwa omukuru rugambwa, owaarabire omu myanya y'omu iguru, Yesu Omwana wa Ruhanga, ka tuhamize kimwe okwikiriza kwaitu;

15ahakuba titwine munyamurwa omukuru otarikubaasa kusaasira hamwe naitwe omu bweremwa bwaitu, kureka twine owaayohiibwe omu miringo yoona nkaitwe, kwonka We atashiishe.

16N'ahabw'ekyo ka twirire haihi n'ekitebe ky'embabazi tutaine bwoba, tubone kuheebwa okusaasirwa, n'okugirirwa embabazi z'okutuhwera ahu turaazeetengyere hoona.

← Chapter 3 Jump to: Chapter 5 →