2 Samuel 11

nyankole

← Chapter 10 Jump to: Chapter 12 →

1Omuri katumba, obunaku obu abagabe bahururiramu, Daudi akoohereza Yoabu kuhurura n'abagaragwa be n'Abaisiraeli boona, baita munonga Abaamoni; kandi baagota Raba. Kwonka Daudi yaaguma Yerusalemu.

2Eizooba rimwe, omu mwabazyo, Daudi akaimuka omu kitanda. Ku yaabaire naagyendagyenda aha mutwe gwa nyaruju y'obugabe, yaareeba omukazi naayoga; kandi ogwo mukazi akaba ari murungi munonga.

3Daudi yaatuma ab'okumubuuririza. Omwe yaamugira ati: Manya ni Betisheba, muhara wa Eliyamu, muka Uriya Omuhiiti.

4Daudi nikwo kutuma entumwa, zikamureeta. Akihika owe, Daudi akabyama nawe. Kandi obwo, ogwo mukazi akaba azirukire. Bwanyima yaagaruka owaabo.

5Ku yaamanyire ngu abakire, yaatuma ahari Daudi naamugira ati: Nyine enda.

6Daudi nikwo kutuma ahari Yoabu, ati: Nyoherereza Uriya Omuhiiti. Yoabu nawe yaamumutwekyera.

7Uriya ku yaahikire Daudi, onu yaamubuuza oku Yoabu arikuraara n'engabo ze, n'oku orugamba ruri.

8Bwanyima Daudi yaagira Uriya ati: Irooko oze owaawe, oruhuukyeho! Uriya ku yaarugire omw'omugabe, omugabe yaamukuratsa eby'okumufungurira.

9Kwonka Uriya yaaraara aha irembo ry'ekikaari ky'omugabe hamwe n'abarinzi ba mukama we; yaayanga kuza omu ka ye.

10Ku baagambiire Daudi ku Uriya atataahire owe, Daudi yaamubuuza ati: Tiiwe orugire omu rugyendo? Mbwenu ekikuzibiire kutaaha owaawe ni ki?

11Uriya yaagarukamu Daudi ati: Eshanduukye n'Abaisiraeli n'Abayuda nibiraara omu nsiisira, na mukama wangye Yoabu n'abagaragwa baawe, Nyakusinga, basiisiire omu ishwa. Mbwenu mbe niinye naaza owangye, ndye, nnywe, ndaare n'omukazi wangye? Buso bwawe, ninkakwite, ekyo tindikwija kukikora.

12Daudi nikwo kugira Uriya ati: Yosha aha eri izooba, nyencakare nkuragiire ogyende. Uriya yaaguma Yerusalemu eryo izooba, n'eryakuratsireho.

13Daudi yaamweta yaarya nawe, yaamutereka, yaamusinza; kwonka omu mwabazyo Uriya tiyaaza owe omuka, yaagyenda, yaabyama aha kitanda kye, omu kaju k'abarinzi ba mukama we.

14Ku bwaseesire, Daudi yaahandiikira Yoabu ebaruha, yaagitweka Uriya.

15Omuri egyo baruha yaahandiikamu ati: Mute Uriya omu kaso k'orugamba, ahi barikurwanira munonga. Haza imwe mugarure ebigyere enyima, bamucumite, afe.

16Na Yoabu ku yaabaire naagota orurembo, yaata Uriya omu mwanya ogu yaabaire naamanya ngu gurimu abashaija emanzi.

17Ab'omu rurembo baashohora, baarwana na Yoabu, baita bamwe omu bagaragwa ba Daudi, na Uriya Omuhiiti baamwita.

18Bwanyima Yoabu yaatuma ahari Daudi naamugambira oku orugamba rubaire.

19Kandi yaahabura ou yaatumire ati: Ku oraaheze kuteekyerereza omugabe eby'orugamba byona,

20waareeba yaagira ekiniga, yaakugira ati: Ahabw'enki ku mugiire kurwana mwahika haihi orurembo? Mubaire mutarikumanya ku barikubaasa kubarasha, beemereire aha rugo?

21Mbwenu owaitsire Abimeleki mwene Yerubesheti n'oha? T'omukazi owaayemereire aha rugo akamurekyera eseiso, n'onu akagwa Tebezi? Ahabw'enki muhikire haihi orugo? Obwo omugire oti: Manya omugaragwa waawe Uriya Omuhiiti, nawe afiire!

22Entumwa etyo egyenda. Eija eteekyerereza Daudi byona ebi Yoabu yaagitumire.

23Egyo ntumwa egambira Daudi eti: Abantu batukirize emikono, baija baaturwanisiza omu ishwa. Kwonka naitwe twabagarura enyima, twagyenda tubabingire twabahitsya aha irembo.

24Mpaho ab'amata baarasha abagaragwa baawe nibeema aha rugo. Bamwe aha bairu baawe, Nyakusinga, bafiire; n'omugaragwa waawe Uriya Omuhiiti nawe afiire.

25Daudi agarukamu entumwa ati: Ogire Yoabu oti: Ekyo kitakusaasa; ahabw'okuba rurara eita omuntu, kandi n'obundi eita ondi. Mbwenu hama, orwanise orurembo, orusingure. Naiwe omugumye otyo.

26Muka Uriya ku yaahuriire ngu iba afiire, yaamucurira.

27Ekyosi ku kyarugiremu, Daudi yaatuma, baamureeta omwe, yaaba omukazi we, yaamuzaaraho omutabani. Kwonka eki Daudi yaakozire kyagwisa kubi Nyakubaho.

← Chapter 10 Jump to: Chapter 12 →