2 Samuel 21

nyankole

← Chapter 20 Jump to: Chapter 22 →

1Omu busingye bwa Daudi, hakabaho enjara mpango, yaamara emyaka eshatu. Daudi nikwo kwehanuuza ahari Nyakubaho; nawe akamugira ati: N'ahabw'orubanja rwa Saulo n'ab'eka ye ahabw'okuba akaita Abaagibeoni.

2Omugabe nikwo kweta Abaagibeoni. Mbwenu Abaagibeoni bakaba batari Baisiraeli, kureka bakaba bari ab'Abaamoni abaatsigaireho. Abaisiraeli nobu baraabe baabarahiire kutabaita, kwonka Saulo ahabw'eihato ri yaabaire ainiire Abaisiraeli n'Abaayuda, akateeraho kubaita.

3Daudi yaabuuza Abagibeoni ati: Mbwenu mbakorere ki? Kandi nkaabakarabira ki, mukabona kushabira abantu ba Nyakubaho emigisha?

4Abagibeoni baamugarukamu bati: Titurikwenda kukarabirwa efeeza nari ezaabu ahabwa Saulo n'ab'eka ye, kandi ti kyaitu okwita omuntu weena omuri Isiraeli. Nawe ayongyera kubabuuza ati: Nimugira ngu mbakorere ki?

5Bagarukamu omugabe bati: Mbwenu ogwo muntu waatucwekyereize, akacuma enaama y'okutumaraho, ngu tutagira ah'okutuura omu ihanga rya Isiraeli ryona,

6mutuhe abantu mushanju omu baijukuru be, tubahanikire Gibea eya Saulo, owaatoorainwe Nyakubaho. Omugabe abagarukamu ati: Niinyija kubabaha.

7Kwonka omugabe arokora Mefibosheti mutabani wa Yonataani mwene Saulo, ahabw'endahiro ei Daudi na Yonataani mwene Saulo baaragaine nibarahira Nyakubaho.

8Mpaho omugabe aihayo Arumooni na Mefibosheti batabani ba Rizipa, muhara wa Aaya, abu Saulo yaamuzaireho; ataho abatabani bataano ba Merabu, muhara wa Saulo, abu Adirieli mwene Barizilaayi owa Mehola yaamuzaireho;

9abakwatsa Abaagibeoni babahanika omu rushozi, omu maisho ga Nyakubaho. Boona mushanju bafeera hamwe. Bakabaita omu itogyera, ahu abantu batandikira kugyesha baare.

10Reero Rizipa muhara wa Aaya yaihayo ekiguniya, yaakyeyarira aha rukiri, okwiha omu itogyera okuhitsya obu enjura ya katumba yaagwire, ekateera egyo mitumbi. Yaaguma nyomushana naagirinda amahungu kugiteera, na nyekiro naagirinda enyamaishwa kugirya.

11Ku baagambiire Daudi eki Rizipa muhara wa Aaya ekinyanshunju kya Saulo, akozire,

12Daudi yaagyenda yaiha amagufa ga Saulo n'ag'omutabani Yonataani aha Baayabeeshi-Gileadi, abaabaire bagaibire omu mbuga ei Abaabetishani bateeraniramu, ahu Abafilisiti baabahanikire, aha izooba ribaitiireho Saulo Giliboa.

13Atyo yaihayo amagufa ga Saulo n'ag'omutabani Yonataani, kandi baarundaana amagufa g'abo abaahanikirwe.

14Amagufa ga Saulo n'ag'omutabani Yonataani baagaziika Zeela omu kyanga kya Benyamiini, omu kituuro kya Kiishi ishe, kandi baakora byona ebi omugabe yaabaragiire. Ebyo ku byahwaire, Ruhanga yaikiriza ebi baashabiire ensi yaabo.

15Abafilisiti bakagaruka baarwana n'Abaisiraeli. Daudi yaahurura n'abashaija be; baarwanisa Abafilisiti. Haza Daudi yaaruha.

16Mpaho Ishebibenobi, omwe ahari baijukuru b'ebikaaka, ou eicumu rye ryabaire riine oburemeezi bwa kiro nka itaano z'omuringa, kandi ahagatiire rurara nsya, yaayenda kwita Daudi.

17Kwonka Abishaayi mwene Zeruuya yaija, yaamuha emikono, yaarwanisa ogwo Mufilisiti, yaamwita. Reero engabo za Daudi zaamurahiza ziti: Otarihurura naitwe, obundi nyentsya otakaaraaza etabaaza ya Isiraeli.

18Ebyo ku byahwaire, kandi baarwanisa Boobu, n'Abafilisiti. Sibekai Omuhuusha yaita Saafu ow'omu baijukuru b'ebikaaka.

19Haagaruka haabaho orundi rugamba rw'Abafilisiti Goobu, oru Elihanani mwene Yaare-oregimu Omunyabeetelehemu yaitiiremu Goliyaati Omugiiti, ou orubango rw'eicumu rye rwabaire nirwingana empimbi ei barukiraho emyenda.

20Kandi Gaati haabayo orugamba orwabaire rurimu omushaija ekikaaka, aine enkumu mukaaga ahari buri ngaro, n'obukumu mukaaga ahari buri kigyere; byona hamwe makumi abiri na bina, nawe ari mwijukuru w'ebikaaka.

21Ku yaahayiire Abaisiraeli, Yonataani mwene Shimeeyi, mukuru wa Daudi, yaamwita.

22Aba bana bakaba bari baijukuru b'ebikaaka bya Gaati, Daudi n'abagaragwa be baabaita.

← Chapter 20 Jump to: Chapter 22 →