Luke 18

Oromo Bible (WAADAA LAMMATAA) 2013

← Chapter 17 Jump to: Chapter 19 →

1Yesuus uduu hin hifatin hennaa maraa akka faateffatan mammaaka akkana jedhee isaanitti hime.

2Qachaa takka keessa «Abbaan seeraa ka Rabbiin hin sodaanne, ka namallee hin kabajjine tokkotu jira.

3Qachaa san haadha hiyyeessaa takkatu jira. Isiinillee gara isaa dhuftee, ‹Falmii kiyya ka namaan wol himane san naa murteessi› jedha'aa turte.

4Isiin guyyaa hedduu isatti deddeebitee, inni ammoo murtee isi'ii kennuu hin barbaanne. Achiin maayessa ammoo inni yaada ufii keessatti, ‹Yoo Rabbiinillee hin sodaanne, namallee hin saalfanne,

5Haati hiyyeessaa tun waan na dadhabsiiftuuf hennaa maraa dhufa'aa akka na hin rakkifne hin murteessaaf› » jedhe.

6Gooftaanillee akkana jedhe, Eegasuu «Waan abbaan seeraa hamaan sun jedhe dhagayaa'a!

7Rabbi ammoo worra isaaf filataman ka halkanii fi guyyaa gara isaa iyyaniif murtii qajeelaa hin murteessuufii ree?

8Ani isinitti hima, inni dafee murteessaaf. Haata'uu ammoo, Ilmi Namaa hennaa dhufu amantaa lafa irratti argaa laata?» jedhe.

9Yesuus namoota qajeellummaa ufiititti amanan worra kaawwan ammoo guddisanii worra tuffatan akkana jedhee mammaakaan kana itti hime.

10Namoonni lamaan faateffachu'uuf gara mana woyyu'uu dhaqan. Isaanillee tokko Fariisicha kuun ammoo ka qaraxa guuru.

11Fariisichi ka'ee dhaabatee waan yaada garaa ufii akkana jedhee faateffate. ‹Rabbii kiyya, ani akka namoota kaawwanii akka worra saamtotaa, hamootaa, worra seebaru, yookaan akka namicha qaraxa guuruu kana waan hin taaneef si galateeffadha.

12Torbaan keessatti guyyaa lama sooma, waan argadhu maraa irraa kudhan keessaa tokko kennaa kenna› jedhe.

13Namichi qaraxa guuru sun ammoo fagoo dhaabatee ija ufiitiin gara sami'ii ol laaluu sodaatee, ‹Waaqa kiyya! Ani nama cubbama'a naa araarami!› jedhee laphee ufii dhaya'aa ture.

14Ani akkana isiniin jedha. Namicha fariisicha san irra namichi qaraxa guuru sun Rabbiin afo'otti qajeelaa ta'ee gara mana ufii deebi'e, namni ol uf qabu maruu hin salphata. Namni uf salphisu ammoo hin kabajjama.

15Namoonnillee akka inni harka ufiitiin qaqqabee isaan eebbisuuf daa'imman gara Yesuusii fidan. Darasoonni isaa ammoo waan kana arganii, xixanii isaan dhooggan.

16Yesuus ammoo daa'imman gara ufii waamee, daa'imman gara kiyya akka dhufan dhiisa'aanii hin dhoogginaa'a, Jeennanni Rabbii worra akkanaa kanniiniif waan ta'eef.

17Ani dhugamaan isiniin jedha, eennullee jeennata Rabbii akka daa'imaatitti ka hin fudhanne, sirimaa hin galu» jedhe.

18Bulchoota keessaa tokko, «Barsiisaa arjaa'a, jiruu bara baraa argatu'uuf maal godhuu na barbaachisa?» jedhee isa gaafate.

19Yesuusillee, «Maaf arjaa naan jetta? Rabbii tokkicha malee, namni arjaan tokkollee hin jiru.

20Ati seera, ‹Hin seebarin, hin ajjeesin, hin hatin, dharaan hin ragin, Abba'aa fi haadha kee kabajji!› jedhu hin beetta» jedhe.

21Namichillee deebisee, «Ani waan kana maraa ijoollummaa kiyya irraa jalqabee eegeera» jedhe.

22Yesuusillee waan kana dhagayee, «Ammallee waan tokkotu si hafa. Waan qabdu maraa gurguriitii hiyyeeyyi'ii kenni, Sami'itti hin duroomtaa. Koottuu na faana deemi!» jedhe.

23Inni ammoo haga kana dhagayeen maayessa dureessa waan ta'eef, guddisee gadde.

24Yesuusillee akka inni guddisee gadde argee, akkana jedhe, «Worra dureeyyi'iif, jeennata Rabbii galuun attamitti rakkisa'a!

25Dureessi gara jeennata Rabbii galuu irra, gaalli qaalawa limmo'oo keessa hulluuqutu irra salpha'a» jedheen.

26Worri waan kana dhagayan, «Eegasuu eentu fayyuu danda'a ree?» jedhan.

27Inni ammoo, «Wonti namaaf hin danda'amne Rabbiif hin danda'ama» jedhe.

28Pheexroosillee, «Kunoo, nu waan maraa dhiifnee sifaana deemneerra» jedheen.

29Innillee, «Ani dhugamaan isiniin jedha, namni waan jeennata Rabbiitiif jedhee, mana ufii, maatii ufii, obboleeyyan ufii, haadhaa fi abbaa yookiin ijoollee ufii ka dhiise,

30Bara kanaaf adunyaa dhuftutti eennullee ka dachaa hin arganne hin jiru» isaaniin jedhe.

31Yesuus kudha lamaanuu gara ufii waamee, akkana isaaniin jedhe, «Amma gara Yeruusaalemii deemna wonti Ilma Namaa ka raattotaan barreeffame maruu hin raawwatama.

32Ilma namaa worra Yihuudota hin taaneef dabarsanii hin kennaniin, isaanillee itti baldan asii fi achi daddarba'aa itti tufan.

33Haga isa dhaananiin maayessa hin ajjeesan, guyyaa saddaffa'aatitti hin ka'a» isaaniin jedhe.

34Isaan ammoo waan kana maraa keessaa tokkollee hin hubanne. Hiikkaan dubbii sanii isaan jalaa waan dhokatee tureef wonti inni dubbate sun isaanii hin galle.

35Yesuus hennaa gara Iyaarikoo dhiyaate namichi ballaan tokko karaa irra taa'ee kadhata'aa ture.

36Innillee akka namoonni baay'een karaa san irra lufa'aaran dhagayee, wonti kun maal? jedhee gaafate.

37Isaanillee, «Yesuusii Naazireetiititu karaa kana lufa'aara» jedhanii itti himan.

38Innillee, «Yesuus, Ilma Daawitii na maari!» jedha'aa iyye.

39Worri afo'otti deemaa turan akka inni cadhisu xixaniin. Inni ammoo, «Ilma Daawitii na fayyisi!» jedha'aa guddisee iyye.

40Yesuusillee dhaabatee, namicha ballaa gara isaa akka fidan ajaje. Hennaa gara isaa dhiyaate,

41Yesuus, «Maal akka sii godhu barbaadda?» jedhee isa gaafate. Innillee deebisee, «Gooftaa kiyya, arguu barbaada» jedhe.

42Yesuus deebisee, «Argi! amantaan kee si fayyiseera» jedheen.

43Ijji isaallee yoosuu argitee, Innillee Rabbiin galateeffata'aa Yesuusiin faanaa deeme. Gumiin sun maruu haga waan kana argan Rabbiin galateeffatan.

← Chapter 17 Jump to: Chapter 19 →