Lamentations 1

Quechuan QXO (Biblia en Quechua del sur de Conchucos)

Jump to: Chapter 2 →

1¡Allaw, Jerusalén marka! Qam kaqchö atskaq runakuna täyaptinpis ¡imanöpatä ushakarquyki! Ñöpata maytsay markapita mas reqishqa kaykarpis kananqa viüda warminömi kaykanki. Atska markakunapa mandaqnin reinanö kashqa kaykarpis kananqa sirviq warminömi kaykanki.

2Paqaskunapa pasaypa llakikurmi ikikyanqaykiyaq waqaykanki. Cäraykipapis yakunörämi weqiki jutun. Kuyanakuyanqaykipis shoqashunaykipä manam kantsu. Kananqa llapan yanasaykikunam chikiyäshunki.

3Judá runakunaqa contrankuna tsariyaptin manam ima ruraytapis puëdiyashqatsu. Juklä nacionman prësu apayaptinmi pasaypa ñakaykäyan. Juklä nacionchö prësu karmi jamaytapis tariyantsu.

4Tayta Diosta adorayänanpä fiestakunamanpis mananam shayämunnatsu. Sión jirkanman aywaq nänikunapis llakikuypämi tsunyaq kaykan. Markaman yaykuna punkukunachöpis manam pipis kannatsu. Sacerdötikunapis pasaypam waqayan. Jipashkunapis alläpam llakikuyan. Maytsaychöpis waqayllam kaykan.

5Jerusalén markataqa alläpa jutsata rurashqa kaptinmi Tayta Dios castigashqa. Tsaymi chikiqninkuna poderninchö tsararaykäyan. Wamrankunatapis apashqa karmi chikiqninkuna kushishqa kaykäyan.

6Sión runakuna puëdiq kayanqanman yärakurpis kananqa poderniynaqnam kaykäyan. Mallaqashqa lluytsu qewata ashiqnömi mandaqninkunapis kaykäyan. Chakinkunatapis qarachayllapanam qatipaqninkunapa puntanta qeshpiykäyan.

7Jerusalén, qamchö täraq runakunata atacayaptin manam pipis janan shärishqatsu. Llapanpis jaqiskiyäshuptikim chikishuqnikikuna asikuyashqa. Qamchö täraq runakuna puntata rïcu kayanqanta yarparmi juklä nacionchöna pasaypa llakikuyan.

8Pasaypa jutsata rurarmi Jerusalénqa impüru rikakushqa. Qallashlla warminö penqakuypä kaykaqta rikarmi puntata respitaq runakunapis kananqa respitayannatsu. Tsaynö rurayaptinmi waqar penqakushqa umpuräkuyan.

9Warmipa killa qeshyan träjin jananyaq ushmaptin penqakuypä kanqannömi Jerusalénpis jutsata ruranqanpita penqakuypä kaykan. Manam ichikllatapis yarpashqatsu ushakänanpä kanqanta. ¡Mana criyiypämi ushakashqa! ¡Manam pipis kuyapashqatsu! Pasaypa llakikurmi nin: «Tayta Dios, conträkuna ushakätsiyämanqanpita llakikuptï kuyapaykallämay».

10Jerusalénpita imaykatapis allinnin kaqtaqa contrankunam apakuyashqa. Jäpa runakuna templuman mana yaykuyänanpä Tayta Dios nikaptinmi llutalla yaykuyashqa.

11Jerusalén runakuna llapanmi waqar mikuyta ashiyashqa. Kawayänanpä mikuyta ashirmi imaykankunatapis rantikuyashqa. Tayta Dios, pasaypa ñakaykaqta rikaykämarqa kuyapaykallämay.

12Jerusalén markam nin: «Nänipa päsaqkuna, shumaq yarpachakuyay. Noqa ñakanqänö ¿pillaqa ñakantsurä? Tayta Diosmi kaynö ñakanäpä pasaypa rabyar castigamashqa.

13«Paymi ciëlupita ninata mandamushqa tullüyaq rupamänanpä. Mana päsanäpämi purinä nänimanpis trampata churapämashqa. Jaqiskamaptinmi pasaypa ñakaykä.

14«Matankächö lasaq yügu wataraykaqnömi jutsa ruranqäkuna lasäman. Jutsata ruranqäpita kikin Tayta Dios castigamaptinmi kallpäpis kannatsu. Conträkunapa makinman jaqiskamaptinmi imanöpa pärapuytapis puëdïtsu.

15«Tayta Diosmi washämaq kallpasapa runakunatapis llapanta ushakätsishqa. Jäpa soldädukunawanmi jövinkunatapis ushakätsishqa. Vïnupä üvata jarur ushaqnömi runakunata Tayta Dios ushakätsishqa.

16«Pasaypa waqaywanmi ñawïpis tsakaskinna. Manam pïnïpis kantsu shoqamänanpä ni yanapamänanpä. Conträkuna vinciyämarmi wamräkunatapis ushakätsiyashqa».

17Makillan tsoqpashqa Sión rugakuptinpis manam pipis kuyapar yanapantsu. Tayta Diosmi mandashqa Jacobta vecïnunkuna ushakätsiyänanpä. Jerusaléntam contrankuna manakaqman churaykäyan.

18Jerusalén markam nin: «Tayta Dios nimanqanta manam wiyakurqütsu. Tsaymi jutsata ruranqäman castigamashqa. Maytsaychö täraq runakuna, imanö ñakanqätapis rikayay. Jövinnïkunata y jipashnïkunatam prësu apayashqa.

19«Kuyanakunqä nacionkunatam yanapayämänanpä rugakurqä. Yanapayämänanpa rantinmi conträ shäriyashqa. Sacerdötikuna y mayor runakunapis ñakarmi mikuyta ashir puriyashqa. Mana tarirmi mallaqaypita jinan markallachö wanuyashqa.

20«Tayta Dios, pasaypa llakikuykaqta rikaykämarqa kuyapaykallämay. Mana cäsukuq kanqäta yarpaptïmi shonqüpis pasaypa tiktikyan. Marka waqtanchömi wamräkunata espädawan wanutsiyan. Marka rurinchöpis wanutsinakuyllam kaykan.

21«Llakikur waqaykaqta wiyaykämarpis manam pillapis shoqamantsu. Castigamanqaykita musyarmi llapan conträkuna kushipäyäman. Noqata castigamanqaykinö paykunatapis castigaykullay.

22«Conträkuna llutanta rurayanqantapis rikaykullay. Jutsata ruranqäpita castigamanqaykinö paykunatapis castigaykullay. Pasaypa llakikuptïmi shonqu nanaypis tsariman».

Jump to: Chapter 2 →