Lamentations 5

Quechuan QXO (Biblia en Quechua del sur de Conchucos)

← Chapter 4 Jump to:

1Tayta Dios, ima päsayämanqantapis rikaykarqa kuyapaykayällämay. Kay niraq desgraciachö kaykäyaptïqa yanapaykallämay.

2Chakräkunatapis juklä nación runakunam muruyan. Wayïkunachöpis jäpa runakunanam taykäyan.

3Papäniynaq waktsa wamrakunanömi kaykäyä. Mamäpis castaynaq viüdanömi kaykan.

4Kananqa kikïkunapa yakükunatapis rantiyämi. Kikïkunapa yantäkunatapis pägakurrämi yantakuyä.

5Chikimaqnïkunapis tsarin tsarinmi qatikachäyäman. Pasaypa ajyarpis manam jamayta tariyätsu.

6Egipto runakunata y Asiria runakunatam mikuyta alistapäyämänanpäpis rugakuyä.

7Unay castäkunaqa jutsata rurarpis castïguta manarä chaskirmi wanukuyashqa. Paykuna jutsata rurayanqanpitam noqakunana castïguta chaskiykäyä.

8Kananqa esclävu runakunapa poderninchömi kaykäyä. Paykunapa poderninpita jipiyämänanpä manam pïnïkunapis kantsu.

9Tsunyaqpita mikuyta apamurpis asaltantikunapa makinpitam qeshpiyämü.

10Pasaypa mallaqarmi jornu wayllaqnörä fiebriwan achachäyä.

11Siónchö warmikunata y Judá markakunachö jipashkunatapis violarmi ushayashqa.

12Mandaqnïkunatapis makinkunata watarkurmi warkuyashqa. Mayor runakunatapis manam respitayashqatsu.

13Mas kallpayuq runakunatam apayashqa mulinu rumita tumatsiyänanpä. Jövinkunatam yantata apariytapis mana puëdiyanqanyaq aparitsiyashqa.

14Mayor runakunapis marka punkuchö manam jamaräyannatsu. Jövinkuna y jipashkunapis mananam cantayannatsu.

15Kushikuytapis mananam tariyänatsu. Kushikur tushuyänäpa rantinmi wanupakushqanö kaykäyä.

16Umäkunapita corönäkuna shushuqnömi munayyuq kayanqäpis ushakashqa. ¡Ay noqalläkuna! Pasaypa jutsata rurayanqäpitam ñakaykäyä.

17Llakikuywanmi shonqükunapis pasaypa nanan. Waqaywannam ñawïkunapis tsakaskin.

18Sión jirkan pasaypa tsunyaraptinmi munti ashmakunallana puriyan.

19Tayta Dios, ima päsaptinpis qammi sïqa imayyaqpis mandamaqnï rey kanki. Ciëlupitam imayyaqpis mandayämanki.

20¿Imanirtä pasaypa qonqayämarquyki? ¿Imanirtä kaytsika unay dëjayämarquyki?

21Tayta Dios, perdonaykayällämay. Perdonayämaptikim qamllamanna yärakayämushä. Unay kawayanqänö yapay kushishqa kawayänäpä permitiykullay.

22¿Imanirtä rikayämaytapis munankinatsu? ¿Pasaypa rabyashqaku noqakunawan kaykanki?

← Chapter 4 Jump to: