Lamentations 2

Quechuan QXO (Biblia en Quechua del sur de Conchucos)

← Chapter 1 Jump to: Chapter 3 →

1Pasaypa rabyarmi Siónta Tayta Dios ushakätsishqa. Ciëluchönö kuyayllapä kaykaptinpis chipyaqmi ushakätsishqa. Rabyashqa karmi täkunan templutapis mana kuyapaypa ushakätsishqa.

2Tayta Dios pasaypa rabyarmi Jacobpita miraq runakunapa wayinkunatapis ushakätsishqa. Llapantam chipyaq juchutsishqa. Judá nacionchö llapan murallashqa markakunatapis chipyaqmi juchutsishqa. Tsaynöpam mandakuqkunata y mandar yanapaqkunatapis penqakuyman churashqa.

3Chikimaqnintsik runakuna atacamashqapis Tayta Dios pasaypa rabyarmi soldäduntsikkunata yanapashqatsu. Tsaynöpam llapan soldäduntsikkunatapis wanutsiyashqa. Nina lunyar chipyaq ushaqnömi Israel runakunata ushakätsishqa.

4Imayka contrantsiknömi Tayta Dios flëchakunanta jinchipa sutaskir flëchamarquntsik. Llapan kuyayllapä kaqkunatapis chikimaqnintsiknömi chipyaq ushakätsishqa. Rabyaynin imayka ninanö kaptinmi pasaypa ushakätsimarquntsik.

5Chikimaqnintsiknömi Israel nacionnintsikta Tayta Dios ushakätsishqa. Palaciuntsikkunatapis llapantam juchutsishqa. Amparakunantsik següru pirqashqa markantsikkunatapis llapantam ushakätsishqa. Kuyayllapä Judáchö täraq runakunatapis pasaypa llakikuymanmi churashqa.

6Tsukllata ushakätsiqnömi templuntapis Tayta Dios ushakätsishqa. Ushakätsiptinmi pipis kannatsu Siónchö fiestakunata rurananpä ni jamay junaqkunachö jamananpäpis. Pasaypa rabyar castigaptinmi reypis y sacerdötikunapis ushakäyashqa.

7Altarnintawan templuntapis Tayta Dios manam rikaytapis munannatsu. Marka murällakunatapis juchutsiyänanpä chikiqninkunapa poderninmanmi churashqa. Tsaymi Tayta Diospa templunman yaykur fiestata ruraqnörä pasaypa qayaräyashqa.

8Kikin Tayta Diosmi permitishqa Siónpa pirqankunata juchutsiyänanpä. Juchutsiyänanpä willanakuyanqannöllam chipyaq juchutsiyashqa. Kananqa Jerusalénpa pirqankunapis jiruruypam juchushqa rumikunallana qoturaykan.

9Markaman yaykuna punkunkunapis manam kannatsu. Cerröjunkunapis pakir ushashqam jitaraykan. Mandamaqnintsik reytapis y autoridänintsikkunatapis juklä nacionkunamanmi prësu apayashqa. Tayta Diospa leyninkunata yachatsiq runakunapis mananam kayannatsu. Profëtankunatapis Tayta Dios mananam revelannatsu.

10Siónchö mayor runakunapis upällallam patsachö jamaraykäyan. Pasaypa llakikurmi lütu röpata jatikurkur umankunaman allpata wiñakuyan. Jerusalén jipashkunapis pasaypa llakikurmi urkunkunapis patsaman töpanqanyaq lätaraykäyan.

11Waqaywanmi ñawïpis tsakaykanna. Pëchüpis pasaypam nanaykan. Marka mayïkuna ñakayanqanta rikarmi shonqüpis nanayparä llakikun. Chuchuykaq wamrakuna cällichö mallaqaypita wanuqta rikarmi pasaypa llakikü.

12Tsay wamrakunam mamankunata mañakuyan ima mikuyllatapis qarananpä. Pasaypa mallaqarmi mamankunapa millqayllanchö wanuyan. Guërrachö pelyaq runakunanömi Jerusalén cällikunachö wanuyan.

13Sión, pasaypa ñakanqaykita rikar ¿imatarä nïman? Pasaypa ñakaykanqaykita ¿imamanrä iwalatsïman? ¿Imaman iwalatsiyparä parlapäman qamta shoqanäpä? Juchu aywaqnörämi desgracia päsashurqayki. Tsaynö kaykaqta ¿pirä yanapashunki?

14«Tayta Diosmi revelamashqa» nir profëtaykikuna willayäshunqaykipis manam rasunpatsu kashqa. Rasunpa profëta karqa jutsata rurayanqaykita jaqiyänaykipämi willayäshunkiman karqan. Jutsaykikunata dëjayaptikiqa juk nacionman prësu manam apayäshunkimantsu karqan. Rasun kaqta willayäshunaykipa trokinmi manakaqkunata criyitsiyäshurqayki.

15Nänipa päsaqkunapis kushipäyäshurnikim taqllapäyäshunki. Manakaqman churayäshurnikim wichyapar umankunatapis awirrä niyäshunki: «¿Taqay markachi may markapitapis mas kuyayllapä karqan? ¿Taqay markapitachi maytsaychöpis runakuna kushikuyarqan?»

16Llapan chikishuqnikikunam wasaykita rimayan. Kachkachyarrämi ajanapäyäshurniki niyan: «Imanö karpis chipyaqmi ushakätsirquntsik. Tsaynö ushakashqa kanantam munarqantsik. Munanqantsiknömi ushakätsirquntsik».

17Yarpanqannöllam Tayta Dios castigamarquntsik. Llapan ninqankunatam cumplishqa. Unaypita yarpanqannöllam Jerusalénta mana kuyapaypa ushakätsishqa. Chikimaqnintsikkuna kushipämänantsikpä y makinchö tsararämänantsikpämi permitishqa.

18Sión, yanapashunaykipä Tayta Diosta rugakuy. Paqaspa y junaqpapis weqiki yakunörä aywatsun. Mana päraypa ñawikipis pukayanqanyaq waqay.

19Paqaskunapapis makikita tsoqpakurkur Tayta Diosta rugakuy. Llakikunqaykitapis llapan shonquykiwan waqar willay. Mallaqaypita wamraykikuna cällikunachö mana wanuyänanpä makikita joqarkur mañakuy.

20Tayta Dios, ima päsayämanqantapis tantiyaykullay. ¿Allitsurä kaykan kuyar wätayanqan wamrankunata warmikuna mikuyaptin? ¿Allitsurä kanman sacerdötikunatawan profëtakunata templuchö wanutsiyaptin?

21Wamrakunapis rukukunapis cällikunachömi wanushqa jitaraykäyan. Jövinkunata y jipashkunatapis espädawanmi wanutsirquyki. Pasaypa rabyashqa karmi mana kuyapaypa wanutsirquyki.

22Tukuy niraq ñakaykuna chämunanpämi permitirquyki. Fiestaman runakuna maytsaypitapis shamuqnörämi ñakaykuna shamushqa. Rabyar castigaptiki manam ni jukllayllapis kawaykar quëdashqatsu. Wamra kanqanpita wätayanqätapis conträkunam chipyaq wanutsiyashqa.

← Chapter 1 Jump to: Chapter 3 →