Lamentations 4

Quechuan QXO (Biblia en Quechua del sur de Conchucos)

← Chapter 3 Jump to: Chapter 5 →

1¡Qoripis yanayashqanam kaykan! ¡Mananam chipipinnatsu! Templuta pirqanqan rumikunapis entëru cälli esquïnakunachömi jitaräyan.

2Sión runakuna qori pürupitapis mas kuyaypämi kayashqa. Kananqa mana yachaq runa ruranqan mitu mankanömi kayan.

3Chacalkunapis wawankunata kuyarmi chuchuyan. Peru kuyanqä runakunam sïqa desiertuchö täraq avestruznö wamrankunatapis kuyayantsu.

4Yakunaywanmi chuchuykaq wamrakunapa qallunpis tsakir palagarninman laqakan. Wamrakuna mallaqar mañakuyaptinpis manam pipis kantsu imallatapis qarananpä.

5Alli allillata mikuqkunapis kananqa mallaqaywanmi cällikunachö wanuykäyan. Kuyayllapä wayichö wiñaqkunapis kananqa qanra jitakunachömi taykäyan.

6Sodoma runakuna jutsata rurayanqanpitapis mas peormi marka mayïkuna jutsata rurayashqa. Sodoma markaqa pipis mana atacaykaptinmi illaqpita ushakarqan.

7Rashta y lichi yuraq kanqannömi Jerusalén autoridäkunapis jutsaynaq y alli runakuna kayarqan. Wera kayaptinmi ñawinkunapis saltanarqanrä. Cärankunapis zafiro ruminörämi chipipirqan.

8Kananqa pasaypa yanayashqam kaykäyan. Cällikunachö purirpis mana reqiypämi kaykäyan. Pasaypa uyu kayaptinmi tullunkunapis yupanakuykan.

9Mallaqaywan wanuqkunaqa pasaypam ñakayarqan. Peru guërrachö wanuqkunam sïqa alläpaqa ñakayashqatsu.

10Jerusalénpita yarquyta mana puëdirmi pasaypa mallaqar wamrankunatapis mikuyashqa. Kuyapäkuq warmikunapis wamrankunatam kusinayashqa.

11Jerusalénta tsaynö castigarmi rabyayninta Tayta Dios päsatsishqa. Sión markata ninawan rupatsirmi wayikunata cimientuntinta chipyaq ushakätsishqa.

12Maytsay nacionchö reykunapis ni pï runapis manam criyiyashqatsu chikimaqnintsikkuna Jerusalénta vinciskir yaykayämunanpä kanqanta.

13Tsaynö llapanpis kashqa profëtakuna jutsata rurayanqanpita y sacerdötikuna mana allikunata rurayanqanpitam. Tsaynöllam paykunaqa jutsaynaq runakunatapis wanutsiyashqa.

14Tsay profëtakuna y sacerdötikunam kananqa cällikunachö qapranö tapra tapra puriykäyan. Wanutsiyanqan runakunapa yawarninwan pichukushqa kayaptinmi pipis yatayllapis yataykuyta munantsu.

15Paykunata rikarmi runakuna niyan: «¡Qanra shonqu runakuna, ama yatayämaytsu! ¡Kaypita maypapis aywakuyay!» Tsaynö chikishqa karmi Jerusalénpita qeshpir maytsay nacionkunamanpis aywakuyashqa. Tsay nacionkunachö täraq runakunapis niyanmi: «Kay purikuq runakunaqa markantsikchö ama täyätsuntsu».

16Kikin Tayta Diosmi rabyarnin profëtakunatawan sacerdötikunata Jerusalénpita qarqushqa. Paykunataqa manam yanapannatsu. Tsaymi sacerdötikunatapis ni mayor runakunatapis respitayannatsu.

17Juklä nación soldädukuna yanapamänantsikpä shuyarashqapis manam shayämushqatsu. Shuyarar rikachakuykashqallam ñawintsikpis tsakaskishqa.

18Chikimaqnintsikkuna rikarämashqam cälliman yarquytapis munarquntsiktsu. Ushakänantsikpä höra chämuptinmi wanuypis janantsikchöna kashqa.

19Anka pärinqanpitapis mas ras aywaqmi chikimaqnintsikkuna kayashqa. Jirkakunapapis qatikachämarquntsikmi. Tsunyaqpa qeshpishqapis shuyaraykämarquntsikmi.

20Tayta Dios akranqan mandamaqnintsik reytapis prësum tsariyashqa. Paymi tsapämaqnintsik kashqa. Pay rikamashqa mayqan nacionpis achäquita mana ashipämänantsikpä kanqantam yarparqantsik.

21Uz partichö kaq Edom nación runakuna, ama kushipäyämaytsu. Qamkunamanpis castïgu chämunqam. Tsaymi machashqa qallapächu jitaraq runa penqakuypä kanqannö qamkunapis penqakuypä kayanki.

22Sión runakuna, castïguta chaskirquntsiknam. Yapayqa mananam prësu apamäshunnatsu. Peru edomita runakuna, qamkunatam sïqa jutsata rurayanqaykipita Tayta Dios castigayäshunki. Paymi llapan jutsaykikunata shimpiyäshunki.

← Chapter 3 Jump to: Chapter 5 →