bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Quechuan
/
Quechuan QXO (Biblia en Quechua del sur de Conchucos)
/
Luke 14
Luke 14
Quechuan QXO (Biblia en Quechua del sur de Conchucos)
← Chapter 13
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 15 →
1
Tsaypitanam juk jamay junaqchö mandakuq fariseupa wayinman Jesús mikuq aywarqan. Tsaychö kaykaq runakunanam Jesústa rikaraykäyarqan «mä imatash ruranqa» nirnin.
2
Jesúspa puntanchönam entëru cuerpun jakaykaq runa kaykarqan.
3
Jesúsnam ley yachatsikuqkunata y fariseukunata tapurqan: «Qeshyaykaq runata jamay junaqchö ¿allïtsishwanku o manaku?»
4
Peru paykunaqa manam imatapis parlakuyarqantsu. Tsaymi qeshyaq runata Jesús yataykur allïtsirnin nirqan: «Kananqa wayikipana aywakuy».
5
Tsaypitanam tsay runakunata nirqan: «Mayqaykipapis wamraykikuna o töruykikuna pözuman jeqaptin jamay junaq kaykaptinpis ¿manaku jinan höra jipiq aywayanki?»
6
Tsaynö niptin manam ima niytapis puëdiyarqantsu.
7
Invitanqan runakuna jamakuyänanpä punta puntamanrä aywaqta rikaykurmi Jesús nirqan:
8
«Casaray fiestaman invitayäshuptiki punta puntamanqa ama jamakuyankitsu. Quizasmi qamkunapita mas respitashqa runata invitashqa kanman.
9
Tsaychö jamayaptikim invitayäshuqniki niyäshunki: «Pay jamakunanpä witikuy». Tsaynö niyäshuptikim penqakurnin qepaman aywar jamakuyanki.
10
Tsaypa rantinqa fiestaman invitayäshuptiki qepaman jamakuyanki. Tsaymi invitashuqniki shamur niyäshunki: «Amïgu, mas puntaman päsakamuy». Tsaynö jamatsiyäshuptikim qamwan jamaqkuna respitayäshunki.
11
Allish tukuqkunam penqakuyman churashqa kayanqa. Peru llänu shonqu kaqkunam sïqa alliman churashqa kayanqa».
12
Tsaypitanam wayinman invitaq fariseuta Jesús nirqan: «Pitapis mikuyänaykipä invitarqa ama kuyanakuyanqayki kaqkunallata, ni wawqikikunallata, castaykikunallata ni rïcu kaq vecïnuykikunallataqa invitankitsu. Paykunallata invitaptikiqa rantintaqa qamtapis invitayäshunkim.
13
Tsaypa rantinqa invitanki pobrikunata, ratakunata, wishtukunata y qaprakunata.
14
Paykuna mana kutitsiyäshuptikipis alli ruraq runakuna kawayämunqan junaqmi Tayta Dios kutitsishunki».
15
Tsaymi mësachö Jesúswan jamaraykanqanpita juk runa nirqan: «¡Ima kushishqarä kayanqa Tayta Diospa mandakuyninchö mikuqkuna!»
16
Jesúsnam nirqan: «Juk runash atskaq runakunata invitanä wayinchö mikuyänanpä.
17
Mikuy höranash sirviqninta mandanä invitanqan runakunata ninanpä: «Llapanpis listunam. Jinan hörash aywakulläshun».
18
«Peru tsay invitanqan runakunash rugakuyänä mana aywayänanpä. Tsayshi juknin ninä: «Chakratam tsayrä rantirqü. Tsaymi chakra rikaq aywar shamuyta puëdïtsu. Noqapita ama qallayätsuntsu».
19
«Jukaqnash ninä: «Pitsqa yuntatam rantirqü. Tsaymi yachatsiq aywaykä. Noqapita ama qallayätsuntsu».
20
«Y juknin kaqnash ninä: «Tsayrämi casarakurqü. Tsaymi shamuyta puëdïtsu».
21
«Sirviqnin kutiykurnash runakuna imanö niyanqantapis patronninta willanä. Willaptinshi patronnin pasaypa rabyar sirviqninta ninä: «Pläzakunapa y cällikunapa jinan höra aywar pobrikunata, wishtukunata, ratakunata y qaprakunatapis pushamuy».
22
«Ninqannö pushaykurshi patronninta ninä: «Taytay, nimanqaykinöllam pushamurqü. Tsaynö kaptinpis wayikiman manarämi juntayanrätsu».
23
«Patronninnash ninä: «Nänikunapa y chakrakunapa aywar tarinqayki runakunata wayïman juntanqanyaq rigorpa pushamuy.
24
Noqam nï: Puntata invitanqäkunaqa mananam wayïchö mikuyanqanatsu».
25
Atskaq runakuna qatiräyaptinmi Jesús nirqan:
26
«Pipis discïpulü kayta munarqa mamanta, papäninta, warminta, tsurinkunata, wawqinkunata, paninkunata y kikinpa vïdanta kuyanqanpita noqata mas kuyamätsun. Tsaynö mana kuyamarqa manam discïpulü kayanmantsu.
27
Cruzninta apaqnö mana qatirämarqa manam discïpulü kayanmantsu.
28
«Mayqaykipis wayita rurayänaykipä shumaqrämi yarpachakuyanki ushatsiyänaykipä qellayniki aypanqanta o mana aypanqantapis.
29
Cimientuykullar dëjaskiptikiqa llapan rikaqkunam jamur niyäshunki:
30
«¡Kay runaqa wayita qallaykatsir manam ushatsiyta puëdishqatsu!»
31
«Maski juk rey jukpa contran guërrata rurananpä aywatsun. Manarä aywarmi yarpachakur nin: «Noqapa soldädükunaqa chunka waranqallam (10,000), peru chikimaqnïpaqa ishkay chunka waranqam (20,000). Tsay wallkaqlla soldädükunawan ¿vincishätsurä?»
32
Mana vincinanpä kanqanta tantiyarqa contran rey karullachörä kaykaptinmi manana pelyayänanpä willakuqkunata mandan.
33
Tsaynöllam mayqaykipis imaykaykikunata noqa raykur mana dëjarqa discïpulü kayta puëdiyankitsu».
34
«Kachiqa allim. Qamlaskirqa manam imapäpis välinnatsu.
35
Chakrapä ni wanupäpis mana väliptinmi jitaskintsik. ¡Rinriyuq kaqkunaqa ninqäkunata wiyakuyätsun!»
← Chapter 13
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 15 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24