bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Quechuan
/
Quechuan QXO (Biblia en Quechua del sur de Conchucos)
/
Luke 7
Luke 7
Quechuan QXO (Biblia en Quechua del sur de Conchucos)
← Chapter 6
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 8 →
1
Runakunata parlapayta ushaskirnam Capernaúm markaman Jesús aywarqan.
2
Tsaychömi Roma capitanpa kuyay sirviqnin pasaypa antsa qeshyaykarqan.
3
Tsay capitannam Jesús ruranqankunata musyaskir Israel mayor runakunata Jesúsman mandarqan shamur sirviqninta allïtsinanpä.
4
Paykuna chaykurnam Jesústa rugakur niyarqan: «Taytay, capitanpa sirviqnintash allïtsipaykunki. Capitanqa alli runa karmi
5
marka mayintsikkunatapis alli rikan. Paymi sinagögatapis shäritsishqa».
6
Tsaynö rugakuyaptinmi paykunawan Jesús aywarqan. Wayiman chaykaptinnam amïgunkunata capitán mandarqan Jesústa niyänanpä: «Taytay, amanash afanakur aywankinatsu. Mana Israel runa kaptinshi wayinmanpis yaykunkimantsu.
7
Tsayshi kikinqa shamushqatsu. Sirviqnin allïnanpä kayllapitash niykunki.
8
Paypis mandaqninpa poderninchöshi kaykan. Tsaynöshi paypa poderninchöna soldädunkunapis kayan. Tsayshi mayqantapis «ayway» niptin aywayan, «shamuy» niptin shayämun y sirviqninta «kayta ruray» niptinpis ruran».
9
Tsayta wiyaykurmi Jesús kushikur paywan aywaykaq runakunata nirqan: «Noqam nï: Paynö criyikuq runataqa Israel runakunachö manam tarirqütsu».
10
Capitán mandanqan runakuna kutiykurnam sirviq allishqana kaykaqta tariyarqan.
11
Tsaypitanam discïpulunkunawan Jesús aywayarqan Naín markaman. Paykunawanmi atska runakunapis aywayarqan.
12
Markaman chaykarnam Jesús tinkurqan atska runakuna ayata apaykaqwan. Tsay ayaqa viüdapa japayllan ollqu wamranmi karqan.
13
Viüda waqaykaqta rikarmi kuyapar Jesús nirqan: «Ama waqaytsu».
14
Tsaynö nir kirmata yataykuptinmi aya apaqkuna ichiskiyarqan. Jesúsnam nirqan: «¡Jövin, shäriy!»
15
Tsaynö niskiptinmi kawaskamur parlar qallaykurqan. Viüdatanam wamran kawashqatana entregarqan.
16
Tsayta rikaykurmi llapan runakuna kushikurnin Tayta Diosta alabar niyarqan: «¡Poderyuq profëtam noqantsikman chämushqa! ¡Tayta Diosmi kuyanqan runakunaman shamushqa!»
17
Tsaymi entëru Judeachö y ñöpan markakunachö Jesús ruranqankunata musyayarqan.
18
Jesús ruranqankunata musyaykurmi Bautizaq Juanta discïpulunkuna willayarqan. Tsaymi ishkay discïpulunkunata qayaskir
19
Señor Jesústa tapuyämunanpä mandar nirqan: «¿Qamkush kanki Tayta Dios mandamunqan Cristo o juktaräkush shuyäyäshä?»
20
Jesúsman chaykurnam niyarqan: «Taytay, Bautizaq Juanmi musyayta munaykan. ¿Qamkush kanki shamunanpä kaq Cristo o juktaräkush shuyäyäshä?»
21
Tapuq chäyanqan höram Jesús alliykätsirqan atskaq qeshyaqkunata, ñakaqkunata, supay ñakatsinqankunata y atskaq qaprakunatapis.
22
Tsaymi Jesús nirqan: «Kutir rikayanqaykikunata y wiyayanqaykikunata Juanta willayay. Qaprakunapis rikayannam. Puriyta mana puëdiqkunapis puriyannam. Leprawan qeshyaqkunapis allïyashqanam. Mana wiyaqkunapis wiyayannam. Wanushqakunapis kawayämushqanam. Pobrikunapis Tayta Diospa alli willakuynintam wiyayan.
23
Yarpäyanqannö mana ruraptïpis mana ajayaypa noqaman yärakamuq runaqa kushishqam kawanqa».
24
Juanpa discïpulunkuna kutiskiyaptinnam runakunata Jesús nirqan: «¿Ima rikaqtä desiertuman aywayarqayki? ¿Carrïzuta vientu kuyutsiqta rikayänaykipäku?
25
Sinöqa ¿ima rikaqtä aywayarqayki? ¿Alli röpashqa runata rikaqku? Musyayanqaykinöpis alli röpashqa runakunaqa reypa wayinchömi kayan.
26
Tsayöraqa ¿ima rikaqtä aywayarqayki? ¿Profëta rikaqku? ¡Awmi! Noqam nï: Paynöqa manam mayqan profëtapis kashqatsu.
27
Juanta mandamunanpämi qellqashqa kaykan: «Nänita pitsaqnö runakuna alistakuyänanpämi willakuqnïta puntaykita mandashä».
28
«Noqam nï: Llapan profëtakunapitapis Bautizaq Juanqa mas tantiyakuqmi. Tsaynö kaptinpis Tayta Diospa mandakuyninman tsayrä yaykuqkunam Juanpitapis mas tantiyayan».
29
(Juan willakunqanta wiyaykurmi impuestu cobraqkunapis Tayta Diosta cäsur Juan bautizananpä aywayarqan.
30
Peru fariseukunawan ley yachatsikuqkunam sïqa Diosta mana cäsur bautizakuyarqantsu.)
31
Mastam Jesús nirqan: «Kanan tiempu runakunata ¿imamanrä iwalatsïman? ¿Imanötä kayan?
32
Paykunaqa pläzachö pukllaq wamrakunanöllam kayan. Tsay wamrakunam qayayar niyan: «Pinkulluta tukayaptïpis manam tushuyankitsu. Llakinaypa cantayaptïpis manam waqayankitsu». Tsay wamrakunanöllam kanan tiempu runakunapis kayan.
33
Bautizaq Juan tantata mana mikuptin y vïnuta mana upuptinmi niyanki: «¡Payqa supaypa poderninchömi kaykan!»
34
Runapa Tsurin mikuptin y upuptinmi niyanki: «¡Kay runaqa mikur y upullarmi purikun! ¡Impuestu cobraqkunapa y jutsasapakunapapis amïgunmi!»
35
Tsaynö niyaptikipis discïpulükuna Tayta Dios munanqannö kawayaptinmi Juanta y noqata Tayta Dios mandayämanqan musyakan».
36
Tsaypitanam juk fariseo runa Jesústa pusharqan wayinchö mikuyänanpä. Chaykurnam mësaman Jesús jamaykurqan.
37
Fariseupa wayinchö Jesús mikuykanqanta musyaykurmi prostitüta warmi alabastro rumipita rurashqa pömuchö perfümin aptashqa charqan.
38
Jesúspa qepanman qonqurikuykur waqaptinmi chakinman weqin juturqan. Tsay jutunqantanam aqtsanwan tsakiskatsir Jesúspa chakinta mutsaykur apanqan perfümita wiñaparqan.
39
Tsayta rikaykurmi Jesústa pushaq fariseo shonqullanchö nirqan: «Kay runa Diospa profëtan karqa kay yataqnin warmi jutsasapa kanqantam musyanman».
40
Tsaynam Jesús nirqan: «Simón, jukta willashayki». Paynam nirqan: «Mä willamay, rabí».
41
Jesúsnam nirqan: «Ishkaq runakunash juk runapa jaqan kayänä. Jukninshi pitsqa pachak (500) junaq arur gänanqannö jaqan kanä. Jukaqnash pitsqa chunka (50) junaq arur gänanqannö jaqan kanä.
42
Imanöpapis pägayta mana puëdiyaptinshi ishkantapis cobranänatsu. Kanan mä nimay. ¿Mayqan kaqtä tsay qellayyuq runata mas kuyanqa?»
43
Simónnam nirqan: «Mas atska jaqan kaqmi». Niptinnam Jesús nirqan: «Allim tantiyarquyki».
44
Tsaynö niskirnam warmita rikärir Simónta nirqan: «Kay warmi ruranqanta ¿rikarquykiku? Wayikiman yaykamuptï manam yakuta qaramarquykitsu chakïta awinäpä. Kay warmim sïqa weqinwan chakïta oquskatsir aqtsanwan tsakitsishqa.
45
Qamqa manam saludamar mutsamarquykitsu. Paymi sïqa wayikiman yaykamunqanpita mana dëjaypa chakïta mutsashqa.
46
Umämanpis manam aceitita wiñamarquykitsu. Paymi sïqa chakïman perfümita wiñamushqa.
47
Tsaymi nï: Kay warmiqa atska jutsankunata perdonaptïmi pasaypa kuyamar tsaynö rurashqa. Wakinkunam sïqa jutsaynaq kayanqanta yarpar janan shonqulla kuyayäman».
48
Warmitanam nirqan: «Llapan jutsaykitam perdonä».
49
Tsaynam mësachö jamaykaq runakuna kikinkunapura ninakuyarqan: «¡Pitä payqa jutsa ruraqkunata perdonananpä!»
50
Jesúsnam warmita nirqan: «Noqaman yärakamunqaykipitam salvakurquyki. Kananqa kushishqana aywakuy».
← Chapter 6
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 8 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24