2 Samuel 21

Kirundi (Bibliya Yera 1951, 1967 (Burundi))

← Chapter 20 Jump to: Chapter 22 →

1Ku ngoma ya Dawidi hatera inzara, imara imyaka itatu ikurikiranye; maze Dawidi aja kubisiguza Uhoraho. Uhoraho arishura, ati Vyātewe n’ubgicanyi bga Sauli n’inzu yiwe, kuko yishe ab’i Gibeyoni.

2Maz’ umwami ahamagaza ab’i Gibeyoni, arabibabgira. (Kand’ ab’i Gibeyoni ntibār’ abo mu Bisirayeli, ariko bār’ abandurutse ku masigarira y’ Abamori; kandi nah’ Abisirayeli bari barasezeranye na bo kubareka, ariko Sauli yari yagomvye kubahonnya, abitewe n’ishaka yagirira Abisirayeli n’Abayuda.)

3Nuko Dawidi abaza ab’i Gibeyoni, ati Nobakorera iki? Notanga impongano ki, kugira ngo mubone gusabira ishamvu y’Uhoraho umugisha?

4Ab’i Gibeyoni baramwishura, bat’ Ico tugomba kuri Sauli n’ab’ inzu yiwe s’ifeza cank’ izahabu, kandi mu Bisirayeli nta muntu n’umwe tugomba kwica. Na we aravuga, at’ Ico muvuga ni co mbakorera.

5Babgira umwami, bat’ Umuntu yaturanduye, akaturonderera inama yo kutugeseza, kugira ngo ntitugire uburagamo mu gihugu cose c’ Abisirayeli,

6ni muduhe abantu ndwi mu bahungu biwe, tubamanike imbere y’Uhoraho i Gibeya, ahāri kwa Sauli uwo Uhoraho yatoranije. Umwami arabishura, ati Nzobabaha.

7Arik’ umwami Dawidi arēngāna Mefibosheti mwene Yonatani umwuzukuru wa Sauli, kubg’ indahiro bārahiriye imbere y’ Uhoraho, bo na Yonatani nyene, mwene Sauli.

8Nuk’ umwami afata abahungu babiri ba Risipa umukobga wa Aya, yavyaranye na Sauli, Arumoni na Mefibosheti, bo n’abahungu batanu ba Merabu umukobga wa Sauli, yavyaranye na Aduriyeli mwene Baruzilayi Umumeholati;

9abagabura mu maboko y’ab’i Gibeyoni; babamanika ku musozi imbere y’ Uhoraho; bose ukw ar indwi bagwa hamwe, bicwa mw ishuza ry’ igenya, batanguye kugenya sayiri.

10Maze Risipa umukobga wa Aya ahitana amagunira, ayīsasira ku gitandara, ahēra mw ishuza ry’ igenya, ashitsa ku mutasuro, imvura iguye kur’ iyo mivyimba; ku murango ntiyakundira ibisīga vyo mu kirēre ko biyigwako, canke mw ijoro kw ibikōko vyo mw ishamba biyēgēra.

11Maze babarira Dawidi ivyo Risipa yakoze, umukobga wa Aya, incoreke Sauli yari yaragize umugore.

12Dawidi araheza aragenda yaka abantu b’i Yabeshi‐gileyadi amagufa ya Sauli n’aya Yonatani umuhungu wiwe, ayo bāri bārīvye mu kibuga c’i Beti‐shani, ah’ Abafilisitiya bari barayamanitse, kuri wa musi bātsinda Sauli i Gilibowa.

13Akūray’ ayo magufa yabo, maze bakoranya n’amagufa ya ba bandi bamanitswe.

14Nuko bahamba ayo magufa ya Sauli na Yonatani umuhungu wiwe i Sela mu gihugu c’Ababenyamini, mu mva ya Kishi se wa Sauli; nuko bashitsa ivy’ umwami yababariye vyose. Hanyuma y’ivyo Imana ibona guhangaza ico gihugu.

15Bukeye Abafilisitiya bongera gutera Abisirayeli. Dawidi amanukana n’ingabo ziwe, arwanya Abafilisitiya; arateba araruha.

16Maze Ishubi‐benobu, umwe wo mu bana b’Abarefa, yagomba kwica Dawidi; kand’ icumu ryiwe ryar’ iry’ umuringa ririvye shekeli amajana atatu, yari yambaye n’inkota nsha.

17Ariko Abishayi umwana wa Seruwiya aramutabara, asogota uwo Mufilisitiya, aramwica. Maz’ abantu ba Dawidi baramurahira, bati Ntuzosubira na mba kujana natwe mu ntambara, ntuz’ uhave uzimya itara ry’Abisirayeli.

18Hanyuma y’ivyo hongera kuba intambara yo kurwana n’Abafilisitiya i Goba. Sibekayi Umuhushati yica Safu, umwe wo mu Barefa.

19Maze hasubira kuba iyindi ntambara yo kurwana n’ Abafilisitiya aho nyene i Goba. Eluhanani mwene Yare‐oregimu w’i Betelehemu yica Goliyati Umunyegati, uruti rw’icumu ryiwe rwangana n’umwaro ujishirwakw impuzu.

20Bukeye hongera kuba intambara i Gati, kandi hariy’ umuntu muremure w’ikigambati, yar’ afise indegeya ku ntoke no ku mano: intoke n’amano vyose na vyose vyari mirongwibiri na bine; kandi na we yar’ umwe wo mu Barefa.

21Maz’ acokoye Abisirayeli, Yonatani mwene Shimeyi, umuhungwabo wa Dawidi, aramwica.

22Abo bose ukw ari bane bar’ abo mu Barefa b’i Gati; bicwa na Dawidi n’abantu biwe.

← Chapter 20 Jump to: Chapter 22 →