Micah 4

Romani Ursari 2018 (Biblia Ande Chib Romani)

← Chapter 3 Jump to: Chapter 5 →

1Ande llivesa kai ka aven mai angle, ka avel thodo o burdo katar o cher e Devleko upral pe burdura, ta ka avel blagosime pe burdura, ta ka prasten lete sa e phuvia.

2Ta ka aven but phuvia ta ka phenen: aven te lika po burdo e Devleko, kai o cher katar o Del e Jakobeko, ta ka sikavel amen pe droma ta ka phira pe leke droma. Soke katar o Son ka likel o zakono, ta katar o Jerusalem o alav e Devleko.

3Ta o Del ka del pe but phuvia, ta ka ortol phuvia zurale kai si dur, ta von ka cheren pe jarnia sastri kai putaren lea e phuv, ta pe lanse ka cheren len churia bangarde kai chinen o lliu. Ondaka ni ka marenpe e jarnienchar phuv phuviaia, ta ni ka sikon ios te marenpe.

4Suako iek ka besel telal tala po kas drakhako, ta niko ni ka daraven len ios. ¡Gia phenda le o Del kai si le sa e zor!

5Ogola forura kanden pe delen a amen ostade ka kanda amaro Gazda, o Del.

6Gia phenel o Gazda:

7Gua llive ka chidav me bakren kai dukhadem, ta kai langan, chinie ta rispime. Lendar, katar gola kai langan ka vazdav iek foro zuralo. Me, o Del, ka charoiv pe me foro, akana ta ostade.

8Ta tu Jerusalem, kai san o cher zuralo katar o Sion, pale ka avel tut o gazdaripe kai saia tut, e glamni chei kai sana omanglal.

9Akana phen mange: ¿Soke urki gia, sargo iek diskinia kai maladol lake? ¿A so, inai tut charura? ¿O urki soke che llene bizai mule?

10Rov ta urkisar, chorrie katar o Sion, sargo diskinia kai maladol lake, soke akana ka like katar o foro, ta ka zivi ando vos ta i llik kai e Babilonia ka ave. A kotar ka braduil tut o Del, ka braduil tut katar che dusmanura.

11Akana but phuvia chidinaile te marenpe tuia, ta phenen: ¡Te achel o Jerusalem ando lallao! ¡Gia sukar ka avel te dikha amare akhenchar gaia ezgoda!

12A gala phuvia ni pinllaren o mislo e Devleko, ta kai vou chidel len sargo umpe lliu te sai ikanel lendar e kuchorra.

13¡Uste chorrie katar o Sion, ta ikan lendar e kuchorra! ¡Me ka dav tut singa sastrune ta unlle tuchne, te drobo bute foronen! Ta o barvalipe kai ka le lendar, ka de le e Gazdake katar sa e phuv.

← Chapter 3 Jump to: Chapter 5 →