Micah 6

Romani Ursari 2018 (Biblia Ande Chib Romani)

← Chapter 5 Jump to: Chapter 7 →

1Asunen akana so phenel o Del: ¡Uste ja tut e burdonenchar, cher te asunen cho avazi e bare burdura!

2Asunen tumen, burdura ta e barra zurale katar e phuv: O Del ka krisil pe foro, ka krisil e Israele.

3Gia phenel o Del: Phen mange foro murno: ¿so cherdem kai ni pela chuke drago?

4Soke me cherdem te like katar o Ejipto, ikandem tut katar o cher, kai zivia sargo sluga. Ta bichaldem angla tu e Moisese, e Aarone ta e Maria.

5Foro murno, de tut golli so mislila te cherel o Balak, charo katar o Moab, ta so phenda leke o Balaam, chavo katar o Beor. De tut golli kana nakhlan katar o Sitim karing o Gilgal, te llane kai o Del si orta.

6¿Soia ka avav angla o Del te blagosiv le, angla o Del kai si ando miloso? ¿Ka avav angla le telchonenchar iekhe bursenge te dav len kurbano leke?

7¿Ka veselilpe o Del te dav le milia bakre o des milie paia zeitinoke? ¿Mo chavo mai purano, ka dav le kurbano te pochinav pala me ezgode bilache kai cherdem?

8Ioi manusea, o Del phenda chuke, so si o lachipe ta so mangel tutar o Del: te ave orta ta te chere o lachipe te ave lacho, ta te avel tut liubao angla cho Del.

9O Del ikharel e foro, bizaipe si te asunel le: Thoven sama savi si e duk ta ko si gua kai dukhavel.

10¿Ando cher katar o bilacho, si barvalipe kai lia kojaimaia ta pharipe kojamno kai gua si iek gadope?

11¿Ka prostiv gole llene kai phariavel kojaimaia, ta kai si le ambava kojamni?

12E barvale katar gava foro lie but ezgode kojaimaia, ta e llene kai zivin ando foro kojaven, ta lengi chib si kojamni.

13Goleke diem pe tu ta cherdem te suko, ta te zatriv tut pala che ezgode bilache kai cherdan.

14Ka ja ta ni ka chalio, ni ka lelpe tutar e bok. Ka chide lliu, a ka jasarele sa, ta te achela tut fiso, ka cherav te jasarele ando maripe.

15Ka thove simiche ande phuv, a ni ka chide e septelie. Ka ustave e maslinke, a ni ka thove pe tu o zeitino. Ka ustave e drak, a ni ka pie e mol.

16Soke cherdan so phenena o Omri ta e familia katar o Ajab, ta cherdan isto so cherena von. Goleke me ka cherav te avel pe tu ta che llene bari zatrania, ka daran pala tumende, ta o lallao me foroko ka perel pe tu.

← Chapter 5 Jump to: Chapter 7 →