Micah 7

Romani Ursari 2018 (Biblia Ande Chib Romani)

← Chapter 6 Jump to:

1¡Tesko mange! Sem sargo o lleno kai rodel kana e llene chidie e septelie, ta ni malavel drak ta simochine, me mangava te jav gala purve septelie.

2Ni achen ande phuv llene orta angla o Del, sa aduricharen te cheren e ezgode silnomaia iek avereke thoven o kojaipe.

3Llanen te cheren o bilachipe, o lleno kai gazdaril mangel te chinen e kris ta o krisari chinel e kris prema e love. O lleno barvalo del orba sogo mangel ta cherel so phenel.

4O mai lacho lendar si sargo e karrne, o mai orta si sargo fafurruka. A avel o llive kana ka avel e bari duk, o llive kai phenela le o boñiko kai arakhela. Ondaka samo e burkania ka perel pe lende.

5Na pacha ande so phenel o pharnavo ta na thov chi vera ando lleno kai gazdaril, arak tut katar e diskinia kai sovel pasa tu, na putar cho mui.

6Soke o chavo ni del liubao pe dade, e chorri vazdiniaol pe pi dei ta e bori vazdiniaol pe pi sasuiaia, ta e manuseke dusmanura si isto leki familia.

7A me ka dikhav e Devle, ka aduricharav ando Del kai ka braduil man, mo Del ka asunel man.

8Tu kai san mo foro dusmano, na veselisao pala ma, soke makar pelemtar, pale ka ustav, te truisarel man o truniariko, o Del si mo villelo.

9Cherdem o bilachipe angla o Del, goleke ka terpiv e duk kai ka del man llik kana ka krisil mange ta ka cherel mange o lachipe. O Del ka inllarel man kai o villelo ta ka dikhav leko chachipe.

10Ta i mi dusmanka ka dikhel le, ta ka achel ando lallao. Voi phenela mange: ¿Kaitalo o Gazda cho Del? Ta akana ka dikhav mange sar ustaven la sargo o glibo pe droma.

11Jerusalem, avel o llive kana pale ka vazden che zidura ta ka ave iek foro mai baro.

12Gua llive ka aven tute llene katar suako rig, llene katar e Asiria llik karing o Ejipto, katar o Nilo llik karing o Eufrates, katar e mora llik karing e mora, ta katar o burdo llik karing o burdo.

13E phuv ka avel sargo o pusto pala e dos katar e llene kai zivin ande la, pala e ezgode bilache kai cheren.

14¡Devla arak che foro e bakre katar chi stoka, kai si korkorre ando vos, pasa e phuvia kai den but septelie! Inllar len sargo omanglal, ande zeledina katar o Basan ta o Galaad.

15Cher lenge ezgode devlikane, sargo kana ikandan len katar o Ejipto.

16E phuvia ka dikhen le ta meren lallaimatar pala lengi zor. Ka thoven po va pe po muia, ta ka panden pe kan.

17¡Ka jan e chik sargo o sap, sargo e sapa katar e phuv! Ka izdran daratar kote kai gurudon. Pherde dar ka llan tute kai san amaro Del, ta ka daran pala tu.

18Inai aver Del sargo tu kai prostil o bilachipe ta bristare tut katar e ezgode bilache kai cherda, but cherricha llene achile katar cho foro. Ni jolailo amenchar ostade soke drago leke te prostil.

19Pale ka avel leke zalba amendar, ka prajol amare ezgode bilache, ta ka chudel ande mora sa amare ezgode bilache kai cherdam.

20Ka cherel so achilo po alav e Jakobea ta e Abraamea, so jalan sovel amare puranenge.

← Chapter 6 Jump to: