Micah 5

Romani Ursari 2018 (Biblia Ande Chib Romani)

← Chapter 4 Jump to: Chapter 6 →

1¡Vazde zidura truial tutar Jerusalem, soke avile te den pe tute, ta pe cham ka chalaven pe rovliaia e llene kai krisil ando Israel!

2Tu Belen katar e phuv e Judeaki, san o mai minono foro ande charoina e Judeaki, tutar ka likel gua kai ka gazdaril ando Israel, leki vicha si but purani, katar e llivesa kai si ostade.

3Ta o Del ka mukel len llik kana ka maladol e diskinia kai si khami, ondaka sa e phlal ka irinpe kai e chave katar o Israel.

4Ta o charo ka inllarel pe foro ande zor e Devleki, e dragostimaia ando glamno anav e Gazdako, leko Del. Ta ka zivin smiro, soke leko anav ka avel bariado llik kai e thana mai dur katar e phuv.

5Vou ka anel e pas. Kana e asiriura ka den ande amari phuv, ta ka den ande amare bare chera, ondaka amen ka bichala te marenpe lenchar efta chobanura, ta ojto llene katar e mai preche,

6ta e jarniaia ka zatril e Asiria ta e jarnienchar e phuv katar o Nimrod, ta ka braduil amen katar e asiriura, kana ka aven te den ande amari phuv llik kai e riga kai si mai dur.

7Gola kai ka achen katar o Jakob ande aver phuvia, ka aven sargo kana pechalpeke pe phuv, sargo kana o Del cherel te perel o bursin po zelenipe, kai ni aduricharel ta ni arakhelpe katar o manus.

8Isto gia ka aven gola kai ka achen katar o Jakob maskar e phuvia, ka aven sargo liono maskar e zivirinie dive, sargo liono minono maskar e bakre kai kana nakhel, istarel len ta chinel len pe kotora ta niko nasti nasel.

9Isto gia cho va ka vazdiniaol pe che dusmanura, ta ka zatril sa golen kai marenpe tuia.

10Gia phenel o Del: Gua llive ka mundarav che grasten ta ka zatriv che bordona marimake,

11ka zatriv e forura katar chi phuv, ta ka peravav sa che forura zurale.

12Ka zatriv e llenen kai cheren chirimate, ta ni ka mukav e llenen kai apogodin.

13Ta ka zatriv che slike ta che pechine kai si ande tute, te na blagosin nikada ios e delen kai cherdan che vastenchar.

14Ka ikanav e slike katar e Asera kai si ande tute ta ka zatriv sa che forura.

15Jolinaia ka cherav te pochinen e phuvia kai ni kandie man.

← Chapter 4 Jump to: Chapter 6 →