Proverbs 18

Romani Baltic (Библия - Пэ Балтитко Романи чиб (Романэс) 2019)

← Chapter 17 Jump to: Chapter 19 →

1Ману́ш, саво́ дурьёла явирэндыр, родэ́ла дова́, со ёв екх кокоро́ древа́н трэбинэла, ёв исын сцял (проти) саро́ годо́ чачипэ́н.

2Дылынинько древа́н на камэ́ла тэ ґалёл джиныбэ́н; нэ соб (кай) екх тэ сыкавэ́л, со исын лэ́стэ пэ ило́ (пэ годы́).

3Екха́тыр пало́ фуипэ́н джа́ла бипатыв; а ке́ли на дэ́на паты́в, тэды и обракирэна.

4Манушэ́скирэ лава́ исын сы́рбы хор панинга́, и сы́рбы годыпнаскири ґанынгори, сави́ исын сы́рбы сы́гно тхадуно ручаё.

5Дава́ исын налачхэ́с тэ явэс пэ фуе́-манушэ́нгири риг, ци тэ равэс тэлэ́ чачунэ́ манушэ́н пэ сэ́ндо.

6Дылынэскирэ ушта́ выкхарэна чинга́рд, и лэ́скиро муй лыджа́ла кэ марибэ́н.

7Дылынэскири чиб исын хасибэ́н ваш лэ́скэ, и лэ́скирэ ушта́ исын сы́рбы фэлы́ ваш лэ́скиро ди.

8Кон гундяринэла (шэпчынэла) пэ кан, лэ́скирэ лава́ исын сыр лачхо́ хабноро, и ёнэ джа́на андрэ́ дрэ маса́.

9Кон исын набутитко пэ пэ́скири буты́, кодова́ исын пшал кодолэ́скэ, саво́ исын хасякирибнаскиро.

10Ра́скирэ-Дэвлэ́скирэ лав исын сыр зоралы́ вучарды́ (башня), чачуно́ ману́ш нашэла дрэ ла́тэ, и тэ́ньчи ёв исын бидаракиро.

11Барвалэ́-манушэ́скиро миштыпэ́н исын лэ́скиро зорало́ фо́ро, и ёв исын сы́рбы вучи́ ва́нта дрэ лэ́скирэ-годякири паты́в.

12Ману́ш задэлапэ анги́л хасякирибэн, и напхутькирибэн янэ́ла паты́в.

13Кон отпхэнэ́ла анги́л, сыр тэ шунэ́л, кодова́ исын дылыно́ и ладж лэ́скэ.

14Манушэ́скиро ду́хо (фа́но) рикирэ́ла джидэс лэс, ке́ли ёв исын насвало́, нэ кон сашты́ (могинэ́ла) тэ ґаздэл (тэ подрикирэ́л) пхагирдо́ ду́хо (фа́но)?

15Барэ́-годя́киро ило́ дорэсэ́ла джиныбэ́н, и годэ́-манушэ́скиро кан родэ́ла джиныбэ́н.

16Манушэ́скиро тала́но кэрэ́ла дрома́ манушэ́скэ, и янэ́ла лэс анги́л барэ́ манушэ́ндэ.

17Пэрвонэстэ, кон ракирэ́ла пэ сэ́ндо, исын барипэ́н анги́л, сыр явэ́ла лэ́скиро пашатуно и зумавэла (пропатякирэла) лэс пхучибнэнца.

18Трэй тэ чхурдэ́н жре́биё, соб (кай) тэ тэрдёл (тэ пириячэл) чинга́рд, ке́ли зоралэ́ мануша́ камэ́на тэ пиризорьякирэн екх екхэ́с.

19Ко́ли ту дукхавэса (росхолякирэса) пшалэ́с, тэды исын пхарэдыр тэ рискирэс палэ лэс, сыр тэ лэл зорало́ фо́ро; и чинга́рд исын сы́рбы састы́р пэ вуда́р дрэ тхагаритко тва́рдыма (букло), савья́са пшал запхандэлапэ ту́тыр.

20Манушэ́скиро кужум чалёла далэ́стыр, со ракирэ́ла лэ́скиро муй, ёв ячэ́лапэ чало пэ́скирэ уштэндыр.

21Дрэ чиб исын зор ваш джиибэ́н, ци ваш мэрибэ́н. Кон камэ́ла тэ ракирэ́л, одолэ́скэ трэй тэ ужакирэл ци екх, ци яви́р.

22Кон латхя́ лачхя ромня́, кодова́ латхя́ лачхипэ́н и дорэсця́ дро́гима Ра́стыр-Дэвлэ́стыр.

23Чороро́ ману́ш ракирэ́ла сы́рбы ёв мангэ́ла, нэ барвало́ ману́ш отпхэнэ́ла бипатывакирэс (дерзкэс).

24Манушэ́скэ, савэ́стэ исын бут дру́ги (мала́), кокорэскэ трэй тэ явэ́л малытко (другитко) кэ яви́р, нэ исын мал, саво́ исын буты́р пашылэды́р ту́кэ тырэ́ пшалэстыр.

← Chapter 17 Jump to: Chapter 19 →