Proverbs 25

Romani Baltic (Библия - Пэ Балтитко Романи чиб (Романэс) 2019)

← Chapter 24 Jump to: Chapter 26 →

1Адалэ́ исын адя́кэ-паць Соломоно́скирэ притчы, савэ́ зачхиндлэ́ Езэкияскирэ мануша́. Езэки́я сыс кра́ли пир Юдэ́я.

2Дава́ исын барипэ́н Дэвлэ́скэ тэ гаравэл дова́ рэ́ндо, со на трэй тэ джинэ́н манушэ́нгэ; нэ барипэ́н кральенгиро исын дрэ дова́, соб (кай) тэ розґалёл саро́ пал дава́ рэ́ндо.

3Сыр болыбэ́н дро вучыпэн, и хор исын пхув, адя́кэ-паць и крали́скиро ило́ нашты́ тэ розґалёс.

4Лэ криг туфта рупэ́стыр, и лэ́стыр выджа́ла кхоро́ (сасудо), со явэ́ла лачхо́ рупунарискэ (рупэскирэ мастероскэ).

5Лэ криг фуе́ манушэ́н крали́стыр, и лэ́скиро троно явэ́ла тэ рикирэлпэ чачипна́са.

6На сыка́в пэс барэ́ манушэ́са анги́л кралье́ндэ, и на тэрдёв пэ штэ́то, саво́ исын ваш барэ́ манушэ́нгэ;

7пал-дова́ со исын фэды́р, ке́ли пхэнэ́на ту́кэ: “Яв вучэды́р адари́к,” сыр тут чхувэ́на тэлэды́р анги́л крали́скирэ барыдырэндэ, конэ́с тырэ́ якха́ дыкхнэ́.

8На джа́ сы́гэс пэ сэ́ндо, пал-дова́ со ту на джинэ́са, со явэ́ла дро ко́нцо (дро яго́ро), ке́ли тыро́ пашатуно ладжакирэла тут.

9Пириракир тыро́ рэ́ндо тырэ́ пашатунэса кокорэса, и на выпхэн чораханыбэн явирэскэ,

10соб (кай) одова́, кон шунэ́ла лэс, тэ на сыкавэ́л сарэ́нгэ тыри́ ладж, и мавлы́н (малва) пал ту́тэ тэ на явэ́л бэдытко (налачхи).

11Лав, со пхэндло́ кэ штэ́то, исын сы́рбы сувнакунэ́ пхаба́ дрэ рупэскирэ кхорэ́ (сасу́ды).

12Лав, савэ́са годо́ ману́ш сыкавэ́ла банг одолэ́скэ, кон кандэ́ла лэс, исын сы́рбы сувнакуны́ чэн и гожакирибэн выкэдынэ́ сувнака́стыр.

13Сыр шылыпэн ивэса дро часо (цы́ро), ке́ли укэдэна гив, исын адя́кэ-паць патяибнаскиро бичхадо́ ману́ш ваш одолэ́нгэ, савэ́ бичхадэ́ лэс; пал-дова́ со ёв сы́рбы панякирэла ди пэ́скирэ ра́скиро.

14Сыр о́блоки и балва́л исын бибрышындэскирэ, адя́кэ-паць исын одова́, саво́ шарэлапэ, со ёв дэ́ла хохано́ да́ро.

15Кон длу́гэс (ґара́) вырикирэ́ла, одова́ сашты́ тэ патякирэл барыдырэ́с, и ковлы чиб пхагирэ́ла кокалы́.

16Ци латхян (ластян) ту авги́н (мэда)? На ада́кицы, кицы́ ту́кэ трэй, соб (кай) ту тэ на пирихас, и тэ на чхадэс.

17На псир бут мо́лы кэ тыро́ пашатуно кхэрэ́, соб (кай) ёв тэ на кхинёл ту́тыр, и, соб (кай) ёв тэ на лэл древа́н тэ на камэл тут.

18Ману́ш, саво́ допхэнэ́ла хохаибэ́н пэ пэ́скирэ пашатунэстэ, исын сы́рбы кило, курта́ла и марибны́тко буст (стрела).

19Зоралэ́с тэ патяс дрэ напатяибнытконэ манушэ́стэ исын сы́рбы на́лачхо данд ци лангалы ґэро́й.

20Тэ багас гиля́ смэнтнонэ илэскэ исын сы́рбы тэ лэс криг лэ́стыр и́дя, ци тэ чхувэ́с шут (уксусо) пэ даб (рана).

21Ко́ли тыро́ вэ́рго исын бокхало, дэ лэ́скэ маро́ тэ хал; ци ко́ли ёв камэ́ла тэ пьел, дэ лэ́скэ пани́ тэ пьел:

22палдава́, кэри дава́, ту кэдэса хачкирдэ́ вангара пэ лэ́скиро шэро́ и Рай Дэвэ́л отдэ́ла мазу́ри (награда) пал дова́, со ту са́нас лачхо́ кэ вэ́рго.

23Паш-ратякири (шылалэ-ригакири) балва́л лыджа́ла кэ брышы́нд, и бэдытко (чораханы) чиб лыджа́ла кэ холямо́ муй.

24Фэды́р исын тэ дживэ́с пэ кунто пэ кхэрэ́скири стрэ́ха (чхаки́н), сыр тэ явэс кхэтанэ́ джувля́са, сави́ чингардэлапэ.

25Сыр шылало пани́ ваш ди, савэ́стэ сыс труш (смэга), адя́кэ-паць исын лачхи́ зан (звесь) дуратунэ́ тхэмэстыр.

26Чачуно́ ману́ш, саво́ пэрэ́ла анги́л фуе́ манушэ́ндэ, исын сыр мэлалы ґанынгори, и блатуны ґаны́нг.

27Дава́ исын намишто тэ хас бут авги́н, адя́кэ-паць и барипэ́н, со ману́ш кокоро́ родэ́ла пэ́скэ, нанэ барипэ́н.

28Кон на рикирэ́ла зор пэ пэ́скиро ду́хо (фа́но), одова́ исын сы́рбы фо́ро, со исын пхагирдо́ тэлэ́, и саво́ исын би вантэнгиро.

← Chapter 24 Jump to: Chapter 26 →