Proverbs 30

Romani Baltic (Библия - Пэ Балтитко Романи чиб (Романэс) 2019)

← Chapter 29 Jump to: Chapter 31 →

1Агуроскирэ годыпнытка лава́, Иакеёскирэ [Якеяскирэ-ю.о.] чхавэ́скирэ, савэ́ пхэндя́ адава́ ману́ш Ифиилоскэ, Ифиилоскэ и Укалоскэ.

2Чачо́, мэ сом бутэды́р набарэ́-годя́киро ману́ш, сыр сарэ́ бура мануша́ (невежды), и мэ на сом годьваро́ ману́ш.

3Мэ на высыклыём годыпнаскэ, и ма́ндэ нанэ джиныбэ́н, сыр свэнтонэндэ.

4Кон ґаздыя́пэ пэ болыбэ́н и гия́ тэлэ́? Кон скэдыя́ балва́л дрэ Пэ́скирэ бурныка (жмени)? Кон учхакирдя́ паня́ идяса? Кон зачхудя пхувья́кирэ яго́ры (краи́)? Саво́ исын Лэ́скиро лав; и саво́ исын Лэ́скирэ-Чхавэ́скиро лав, ко́ли ту джинэ́са?

5Кажно Дэвлэ́скиро лав исын жужо́: ёв исын шчы́то одолэ́нгэ, кон рисёла кэ Ёв тэ зракхэлпэ.

6На причху́в буты́р кэ лэ́скирэ лава́, соб (кай) Ёв тэ на бангякирэл тут, соб (кай) ту тэ на явэс хохано́.

7Пал дуй чачипэна́ мэ мангавас тут, на отпхэнпэ анги́л ма́ндэ анги́л, сыр мэ мэра́ва:

8лэ криг ма́ндыр фрэнта лава́ и хохаибэ́н, на дэ ма́нгэ ни чорипэ́н, ни барвалыпэ́н, чалякир ман марэ́са, со трэй ма́нгэ пэ кажно (сва́ко) дывэ́с:

9соб (кай) мэ тэ на явав древа́н чало, и тэ на отпхэнавпэ Ту́тыр, и тэ на пхэна́в: “Кон исын Рай Дэвэ́л?” Ци, соб (кай) мэ тэ на явав чороро́ и тэ на чорав, соб (кай) мэ тэ на пропатякирав мирэ́-Дэвлэ́скиро лав.

10На калякир лавэ́са дынари́с анги́л лэ́скирэ растэ, соб (кай) ёв тэ на прокошэл тут, и соб (кай) ту тэ на явэс банго́.

11Исын ро́до, саво́ прокошэла дадэ́с, и на шарэла пэ́скирэ да.

12Исын ро́до, саво́ исын жужо́ анги́л пэ́скирэ якха́, нэ ёв исын на мордо пэ́скирэ мэлятыр.

13Исын ро́до, кай ла́кирэ манушэ́ндэ, исын пхутькирдэ́ якха́. Сыр вучэ́с ґаздэ́напэ лэ́нгирэ цымблы (ресницы)?

14Исын ро́до, дрэ саво́ манушэ́ндэ данда́ исын сыр курта́ла, и конэскирэ жанды исын сыр чхурья и скэдынэ́ тэ похан сарэ́са чорорэн пэ пхув и богэн машки́р манушэ́ндэ.

15Ратпибнаскирэстэ (пиявкатэ) [дро началыпэн-р.с.] исын дуй чхая́, савэ́ дэ́на го́дла: ‘Дэ! Дэ!’ Исын трин чачипэна́, савэ́ ние́кхвар нанэ чалэ. Исын штар вешчы, со ние́кхвар на пхэнэ́на: ‘Ухты́лла (до́си).’

16Дава́ исын: маґила (кула), и бибиятэнгири джувлы́; пхув, сави́ нанэ чалы пане́стыр, и яг, сави́ тэ пхэнэ́л: ‘Ухты́лла.’”

17Манушэ́стэ, кон просала дадэ́с, и кон салапэ холямэс, соб (кай) тэ на кандэл пэ́скирэ да, то лэ́скэ кораки, со исын пэ до́ло, выхана лэ́скирэ якха́, и тэрнэ́ орлы (кидорэ) схана лэн сарэ́са.

18Исын трин чачипэна́, со исын древа́н ди́вна ваш ма́нгэ, и исын штар чачипэна́, со мэ на ґалёвава:

19сыр о́рло (ки́до) вурняла пир болыбэ́н; сыр сап кхарэ́лапэ (двигинэлапэ) пир бэ́рга, сыр па́рма (кораблё) кхарэ́лапэ (плывинэла) пир мо́рё (дэрья́в), сыр мурш кэрэ́ла дром кэ патывалы́ чхай.

20Акэ, сыр налачхи джувлы́ кэрэ́ла: ёй ха́ла, и кхосэла пэ́скиро муй, и ёй ракирэ́ла: “Мэ на кэрдём ни саво́ фуипэ́н.”

21Исын трин чачипэна́, со лэ́ндыр пхув издрала, и штар чачипэна́, со ёй нашты́ тэ вырикирэл (тэ пирилыджал):

22ко́ли писха́ри лэ́ла тэ кралинэ́л, и ке́ли дылыно́ исын чало марэ́са;

23ко́ли бипатывакири джувлы́ джа́ла пало́ ром, и ко́ли дына́рица (служанка) лэ́ла ла́кирэ-ранякиро штэ́то.

24А́кэ, штар тыкнэ́ джидалэ, нэ ёнэ исын древа́н годэ́:

25кирья (мурашки), ёнэ исын назоралэ; нэ ёнэ лынаскиро кэдэна хабэ́н пэ́скэ;

26бэргитка кармуса (мышы), савэ́ исын набарэ́-зорьякирэ, нэ ёнэ кэрэ́на пэ́скэ кхэра́ пэ скалы.

27Скочкэндэ (саранчатэ) нанэ кра́ли, нэ ёнэ джа́на анги́л сарэ́ пир линия.

28Мизгирё (пауко), сава джинэ́ла тэ ухтылэлпэ пэ́скирэ лапкэнца, нэ ёв явэ́ла дрэ крали́скирэ фэлатиня́.

29Исын трин джидалэ, савэ́ штавэна райканэс, и штар, савэ́ пир линия джа́на анги́л:

30шчэр, саво́ исын най (са́мо) зоралэды́р машки́р сарэ́ мурдалэ́ндэ, и саво́ на рисёла криг ни конэ́стыр;

31грай, и бузно (козло), и кра́ли, проти конэ́стэ ние́кх нашты́ (на могинэ́ла) тэ ґаздэлпэ.

32Ко́ли ту бигодякирэс шардян пэс кэ вучипэ́н, ци придуминдян биба́хт, чхув пэ́скиро васт пэ муй.

33Кон змарэла тхуд, кодова́ кэрэ́ла ксил, ци кон тасавэла накх, кодова́ ратвалякирэла накх; и адя́кэ-паць кон ґаздэ́ла холын, кодова́ залыджала кошыбэ́н.

← Chapter 29 Jump to: Chapter 31 →