1 Timothy 2

Romani Baltic Latin (Biblija - Pe Baltitko Romani čib (Romanes) 2019)

← Chapter 1 Jump to: Chapter 3 →

1Angledýr saréstyr, me drieván mangáva tumen, saró časo te mangénpe Devléske, te mangén i te mangénpe Devléske pal javirende te parikirén Léske pal saré manušénde,

2pal kral'jénde i pal saré manušéngire baré rande, sob (kaj) aménge te javél saštypen (vozmožnost'/vakancyja) te dživás štylés i ramanjonés (mirnes) saré devlytkimasa i te lydžán pes pir čačipén;

3pal-dová so davá isyn lačhó i lačhó Zrakhibnariske, amaré Devléske,

4Savó kaméla, sob (kaj) saré manušá te zrakhenpe i te džinén čačipén.

5Pal-dová so Devél isyn Jekh, i jekh isyn maškiratuno (posriedniko) maškír Devléste i manušénde, adavá manúš isyn Isúso Xristóso,

6Savó otdyjá Kokoró Pes, syr vykinybén pal saré manušénde, Jov sys Devléskiro dophenybén svetoske, savó sys dynó dro péskiro časo;

7vaš davá me sómas čhudo syr Devléskiro phenybnaskiro i Apostolo, – me rakiráva tuménge čačipén, me na xohavava, i me som sykliakiribnari pir patiaibén i čačipén Najudénge.

8Me paldavá kamám, sob (kaj) muršá te mangénpe Devléske pe kažno štéto, i sob (kaj) te ĥazdén svénta, otdyné Devléske vastá bi xolynakiro i bi kuninypnaskiro.

9I adiáke-pac' mek džuvliá te ur'jenpe patyvales, i lénde te javén ladž, te na phutjon jekh angíl jekhate drogoné idiasa, suvnakása, ci kučoné barénca, ci balengire gožymasa,

10ne sob (kaj) jone fedýr te kerén lačhé réndy, savé i trej te kerél džuvliáke, saví otdyjá pes Devléske.

11Mek te sykljol džuvlý štylés, i te kandel;

12ne te sykliakirél džuvliáke me na davá vólia, ci te xulainél romesa, ne te javél joj štyl dre khangirí;

13pal-dová so angledýr sys sozdynó Adamo, a korigedýr (pozže) Jeva.

14I sys xohado na Adamo, a džuvlý, pal-dová so joj poddyjape xohaibnaske i pirigija Devléskiro Zakóno.

15Ne joj iavéla zrakhny pir davá, so joj bijanéla čhavorén, kóli joj iavéla duredýr dro patiaibén i dre patýv ke javír manušá i dre patýv lačhé rendénca (dielenca).

← Chapter 1 Jump to: Chapter 3 →