1 Timothy 3

Romani Baltic Latin (Biblija - Pe Baltitko Romani čib (Romanes) 2019)

← Chapter 2 Jump to: Chapter 4 →

1Čačunó isyn lav, kóli kon zoralés kaméla te javél khangirjákiro barydyró (jepiskopo), adavá manúš mangéla te kerél lačhí butý.

2Ne khangirjákire barydyréske trej te javél bidošakireske, jekhe – romniakiro rom, savó džinél pes te rikirél dre vastá, god'varó, te javél léste patýv ke pe, savó priléla manušén ilésa, i te javél lačhó sykliakiribnáskiro (učitieljo);

3te na javél matymari, te na javél zahalo, ne te javél kovlé-ilytko, te javél ramanjono (mírno), te na javél ĥálko ke lové,

4savó isyn xuláj pe péskiro kher, konés čhavé kandéna, lydžána pes pir čačipén;

5pal-dová so, kóli vari-kon nane xuláj dro péskiro kher, syr adavá manúš javéla te dykhél pal Devléskiri Khangirí?

6Te na javél khangirjákiro barydyró odolé manušéndyr, savé naĥara upatiándyne dre Devléste, kadavá savó manúš moginéla te zaphutjol, i te perél tel séndo syr nálačho.

7Léste trej te javél lačhó dophenybén maškír manušénde, savé nane khangirjátyr, sob (kaj) léske te na poperel tel xoliamó saben i dre nalačheskiri felý.

8Khangirjákire butiarnenge (diakonenge) adiáke-pac' trej te javén čačuné, te na javén jone dujemuitka, te na p'jen but mol, i te na javén ĥalka (žadna) ke lové,

9vaš dová, sob (kaj) jone te rakhén sykado patiaibnaskiro garadó čačipén žužé patyvása, savó sys sykado.

10I adasavé manušén adiáke-pac' angledýr trej te propatiakires, i kóli lénde nane nisaví doš, tedy jone moginéna te dynarinén (te služynen).

11Adiáke-pac' i léngire džuvlienge trej te lydžán pes pir čačipén, te na bangiakiren nikonés xohanés, te na p'jen, i te javén patiaibnytka dro saró.

12Khangirjákire butiarneske trej, sob (kaj) jov te javél jekhe-romniakiro rom, savó isyn lačhó xuláj péskire čhavénge i kheréske:

13pal-dová so odolé manušá, savé šukár dynarinena, ke jone isyn baró kutiakiriben i jone murškanés rakiréna pal patiaibén dre Isusóste Xristosóste.

14Kadavá lyl me čhináva túke, i duminava, so me syg javáva ke tu;

15ne kóli me zarikiravpe, sob (kaj) tu te džinés, syr trej te lydžas pes dre Devléskiro Kher, savó isyn džidé – Devléskiri Khangirí, saví isyn šeraló bar i fundámiento vaš čačipén.

16I saré priĥalyne, so baró garadó čačipén isyn dro amaró devlytkimakiro patiaibén: Devél javdiá dre manušýtko loč (plot'), Dúho (Fáno) priĥalyja Les čačunesa, sykadiá Pes Jangolenge, pal Léste rosphendlé maškír saré manušénde, dre Léste upatiandyja svéto i Jov sys lynó upré dre sláva pe bolybén.

← Chapter 2 Jump to: Chapter 4 →