1 Timothy 6

Romani Baltic Latin (Biblija - Pe Baltitko Romani čib (Romanes) 2019)

← Chapter 5 Jump to:

1Mek pishárja, savé isyn sýrby tel ĥámo, te kutiakiren pherdés péskire xulan, sob (kaj) Devléskiro lav i Léskiro sykliakiribén te na kaliakiren.

2I odolé, savénde isyn patiaibnaskire xulaja, mek jone te na dykhén vučipnástyr pe lénde, pal-dová so jone isyn léngire pšála, ne mek jone fededýr te dynarinén lénge syr pishárja, pal-dová so čačuné i dróga isyn odolé, savénge isyn léndyr lačhipén. Sykliákir i phen zorjása manušénge pal davá.

3Kóli vari-kon sykliakiréla javír i na patiála dre čačuné amaré Ráskire-Devléskire, Isusóskire Xristosóskire lavá, sob (kaj) dro sykliakiribén te darel Devléstyr,

4to odová manúš isyn phut'kirdo, jov nisó na džinéla, léste isyn nalačhi myslia but te rozduminel i te lydžál sýrby maribén pal lavá, savéndyr džála zevlynypén, košybén, kaliakiriben, nadopatiaiben,

5i čhučé rakiribena maškír manušénde, savénde nane bari godý, i, savé darnape čačipnastyr, jone duminéna, so dar angíl Devléste-davá isyn drom te barvaljon.

6Ne isyn bari l'góta, kóli manušéste isyn dar angíl Devléste i jov isyn drieván rado saréstyr, so isyn léste.

7Pal-dová so ame nisó na jandiam dro davá svéto: davá čačó, so ame nisó na moginasa te las léstyr.

8Ne kóli ame sam čale i uridé, aménge trej i pal davá te parikiras Devléske.

9A manušá, savé kaména te rozbarvaljon, poddenape pe propatiakiriben i peréna dre felý, i dre but dylyné i grehítka tyrdypena, savé lydžána len ke bedytko periben i ke xasibén.

10Pal-dová so zoraló tyrdypén ke lové-davá isyn pérvo drom, so janéla kažno fuipén, isyn but manušá, savé pir bari ĥalkima ke lové otrisine patiaibnastyr i otdyné pes pe bari bída.

11Tu san Devlýtko manúš, naš dalé saréstyr, róde čačipén, róde te kerés lačhipén, jav dro patiaibén, jav dre patýv ke javír manušá, jav vyrikiribnytko i kovlé-ilytko.

12Marpe pal lačhó patiaibén i viéčno džiibén, ke savó tut Devél khardiá, i pal savó tu patyvales priĥalyjan angíl buté jakhitkonende (svidietieliende).

13Me uphenava túke angíl Devléste, Savó déla sareske džiibén, i angíl Isusóste Xristosóste, Savó lačhés priĥalyja Léskiro patiaibén angíl Pontijoste Pilatoste,

14te rakhés priphenybén bibangiakiro i bidošéngiro angíl dová, syr amaró Raj Devél, Isúso Xristóso javéla,

15davá javéla dro dová dyvés, savó uphendia Léske Devél Dad, Bahtiakirdó i Jekhdžinó, sarengire-kral'jengiro Králi i Raj Devél pe saré rande,

16Savó isyn Jekhdžinó, Kon na meréla nijékhvar, Savó dživéla dro dud (svéto), karik nijékh na javéla, Saves nikón manušéndyr na dykhciá i te dykhél na moginéla. Mek te javél Léske viéčno patýv i viéčno zor. Amín'.

17Uphen dalé svetóskire barvalenge, sob (kaj) jone te na ĥazdén pes i te na patián dro péskiro barvalypén, ne fedýr te patial dre džidé Devléste, Savó pherdés déla saró, so trej vaš amarí baht,

18sob (kaj) jone te kerén lačhipén, te barvaljon lačhé rendénca, te den vast iléstyr javirénge te dielinenpe péskire barvalypnasa javire manušénca,

19skedyi péske kučipén; davá isyn lačhó fundámiento i te skedén vaš časo, so javéla vaš dová, sob (kaj) lénde te javél viéčno džiibén.

20Hime, zrákh, so sys dopatiandlo túke, durjov magirdé rakiribnendyr i čhučé rakiribnendyr, i zahale lavéndyr, savé vydžána džinybnastyr, savó ginéna pal čačunó,

21i savó vari-savé manušá priĥalyne les i paldavá jone otginé patiaibnastyr. Mek te javél Devléskiro bahtalypén túsa. Amín'.

← Chapter 5 Jump to: