1 Timothy 4

Romani Baltic Latin (Biblija - Pe Baltitko Romani čib (Romanes) 2019)

← Chapter 3 Jump to: Chapter 5 →

1Dúho (Fáno) mamúj rakiréla, so dro palatunó (posliednjo) časo but manušá mekéna te patián, léna te kandén xohané dúhi i te šunén benglane-duhengiro sykliakiribén;

2kadavá sykliakiribén rosphenena dujemuitka xohaibnarja, savé xasiakirdé sarí ladž, sýrby vari-kon shačkirdiá la,

3i adalé manušá zaphenena te lenpe, i te na xan saró, so sozdyjá Devél vaš dová, sob (kaj) patiaibnaskirenge, i kon udžindiá čačipén, te xan saró parikiribnasa.

4Pal-dová so saró, so sozdyjá Devél, isyn lačhó i saštý saró te xas, kóli ame parikirasa pal xabén,

5pal-dová so saró xabén jačéla žužó pir Devléskiro lav i mangipén.

6Kóli tu javésa te sykliakires kadavá uphenybén pšalénge, tu javésa lačhó khangirjákiro dynári Isusóske Xristosóske, i tu javésa čarado patiaibnaskire lavénca i sykliakiribnasa, savó tu pherdés kerdián ke kónco/iagóro (spolnindian).

7Rakhpe magirdé rakiribnendyr, i phuré-džuvliengire paramysiendyr, ne sykljov te dživés darása angíl Devléste.

8Pal-dová so, kon zalelape péskire muskulenca i masenca, davá léske zorjakirela léskire masá-davá isyn nabaró lačhipén, ne kon dživéla darása angíl Devléste, odová janéla lačhipén pir saró i déla nadiéia dro davá svéto i dre dová, so javéla angíl.

9Kadavá lav isyn patiaibnýtko, jov isyn mol te prilel les,

10vaš davá ame i kerása daja butý i sýrby marasape, so ame čhuvasa nadiéia pe džidé Devléste, Savó isyn sarengire-manušéngiro Zrakhibnari, ne butýr kodolénge, kon patiála dre Léste.

11Phen zoralés davá manušénge i sykliákir len.

12Mek nijékh te na dykhél vučipnástyr pe túte pal tyró ternypen; ne sykáv pes devlytkonesa patiaibnaskirenge dro lav, dro džiibén, dre patýv ke javír manušá, dro dúho (fáno), dro patiaibén, dre žužyma.

13Gin Svénto Čhinybén, podrikir manušén, i sykliákir len ke davá časo, paka me javáva.

14Prilé ilésa taláno, so isyn dre túte, savó sys dynó túke prorokendyr, pir savó kerdé rašaja, kiéli jone čhudé upré vastá pe túte.

15Dykh pal davá, otdé pes pherdés daleske, sob (kaj) te javél bicialy tyrí butý vaš sarénge.

16Dykh ciamkes pal péskiro džiibén i sykliakiribén, ker davá saró časo, kóli tu adiáke javésa te kerés, zrakhésa pes i kodolé manušén, savé šunéna tut.

← Chapter 3 Jump to: Chapter 5 →