Amos 3

Romani Baltic Latin (Biblija - Pe Baltitko Romani čib (Romanes) 2019)

← Chapter 2 Jump to: Chapter 4 →

1Šunén davá lav, so Raj Devél phendiá proti tuménde, čhavorále Izrailjoskire, proti saró kherítko ródo, savó Me vylydžijom Jegiptóskire phuvjátyr, rakirí:

2“Tumé san jekh kherítko ródo saré rodendyr pe phuv, savéske Me kerdjom patýv, paldavá Me pharés sendiakirava tumen pal saró tumaró čoripén.”

3Ci saštý duj manušá te džán khetané, kóli jone na dorakirenape?

4Ci javéla ščer (liévo) te brilinel dro veš, kóli jov na dykhéla vari-so te roskušel dandenca? Ci javéla te vydel ščer zan péskire xašhátyr (logovostyr) –, kóli jov ničý na uhtyldia.

5Ci saštý čirikly te perél dre felý (pietlia) pe phuv, kóli te na javél felý sietkasa pe láte. Ci ĥazdélape felý phuvjátyr, kóli te na uhtylén nisó lása?

6Kóli te na bašavel zoralés rógo (truba) dro fóro, ci javéna manušá te darén? Kóli isyn bari bída dro fóro, ci davá isyn na Devléstyr, Kon domekcia davá?

7Čačó, Raj Devél na keréla nisó angíl dová, syr Jov sykavéla dová, so Jov pridumindia, Léskire pishar'jénge, prorokenge.

8Ščer lyjá te rykinel – kon na javéla te darel? O Raj Devél phendiá – kon na javéla te angilphenel?

9Poden zvies' (zan) dre baré felatiniá i pe strehi kherengire dro Azoto (pe Filistimija), i dre baré felatiniá (kolová) pe phuv Jegiptóskiri i phenén: “Kedenpe khetané pe bérgi Samarijakire: dykhén pe baró búnto godlenca maškír lénde, i syr pritasavéna manušén odój.”

10“Pal-dová so jone na džinéna, syr te kerén čačunés, – rakiréla Raj Devél, – ‘jone, savé zagaravena kučipén, so jandlé jone dre čori, so jone nahrates čorde, dre léngire baré felatiniá (kolová).’

11Paldavá adiáke rakiréla Raj Devél: ‘Namal javéla trusciál daja sarí phuv! Jov otlela zor léndyr i jov rosčorela léngire baré felatiniá (kolová).”

12Adiáke rakiréla Raj Devél: “Syr o čhupnári (pastyrjo) vytyrdela javír mólo i zrakhéla ščeroskire (lievoskire) móstyr duj kokalý ĥerengire i kotér kaneskiro, adiáke-pac' nábut čhavorén Izrailjoskiren vytyrdena xasibnastyr, savé dživéna ke Samárija pe jagóro (pe krajo) čhuibnaskiro, i savé isyn bešté pe jagóro drogoné pasindliakiro (pe kušetka).

13Šunén i dophenen dro kher Jakovóskiro:” – rakiréla Raj Devél, jangoléngiro-bolybnáskiro Devél,

14“so Me dro dová dyvés pharés sendiakirava Izrailjo pal léskire čoripena, i Me pharés sendiakirava pal altári dre Viefil', i javéna občingirde šyngá (rógi) pe altárjo, i jone peréna pe phuv.

15I Me rozmarava pe koterá ivantytko (zimitko) kher khetané lynaitkone kheresa; i peréna kherá šukaribnasa slonytkone kokalestyr, i na javéna butýr baré kherá”, – rakiréla Raj Devél.

← Chapter 2 Jump to: Chapter 4 →