Amos 6

Romani Baltic Latin (Biblija - Pe Baltitko Romani čib (Romanes) 2019)

← Chapter 5 Jump to: Chapter 7 →

1Bida tuménge, kon priléla džiibén lokhes, i savé isyn narakhibnytka (biespiečna) dro patiaibén pe bérga dre Samárija, – tumé, slavutna manušá baré nacyjatyr, ke savé javéla kher Izrailjoskiro.

2Džán duredýr ke Kalne, i dykhén, odothýr džán ke baró Jemafo, i odothýr ke Giefo Filistimlianengiro: ci jone isyn fedýr kadalé tumaré kralipnendyr? Ci léngire miéžy isyn buĥledyr tumaré-phuvjákire miežendyr?

3Bida pe tuménde, savé otčhuvena bibahtaló dyvés, i, savé janéna pašyledýr ke pe, syr javéna te pritasaven tumen.

4Tumé, savé san pašté pe čhuibena, so isyn ĥožakirde slonytkone kokalosa, i tumé potyrdenape pe tumaré dróga pasindlia (ložy). Tumé xána vykedyné bakrén tumaré stadatyr, i thule guruvorén ĥurtostyr.

5Tumé bagana tel gusliengiri (arfakiri) zan (glos), i priduminena vaš péske muzykakire strumiénty syr Davído.

6Tumé p'jena mol (vino) tahtajendyr, i makhenape naj fedyršone makhlunienca (mazienca), ne tumé na piridživena pal dová, so Joza (Iosifo) isyn pritasado.

7Paldavá tumé akaná džána pérva dro pliéno angíl plienonende i, savé tuméndyr akaná isyn bešté pal svenkitka skaminda paš-pasindoj, javéna štyl.

8Raj Devél sovlahadiá Pésa, jangoléngire-bolybnáskiro Devél, Raj Devél i rakiréla adiáke: “Mánge isyn džungaló (brytko), so phutjola Jakovo, i Me bidykhava léskire baré felatiniá (kolová); paldavá Me vydava léskiro fóro i saró, so isyn dre léste.”

9I tén'či javéla adiáke: so kóli deš manušá jačénape dro jekh kher, to i jone meréna.

10I seménca mulengiri, léla javire manušés, savó javéla te xačkirel trúpy, i jov phenéla kodoléske kheréstyr, kon jaciápe džidó: “Ci isyn iščo (inké) vari-kon dro kher?” Tén'ci kodová manúš kheréstyr phenéla: “Nane ‘nikonés.” I daja seménca tedy phenéla: “Rikir péskiri čib! Pal-dová so aménge naštý te priripiras lav Ráskire-Devléskiro.”

11Pal-dová so, ake, Raj Devél priphenela, so Jov phagiréla baró kher (kralipén Izrailjoskiro) ke ruíny, i tyknó kher (kralipén Judejákiro) pe koterá.

12Ci prastána graja pir bérgi? Ci pahinela phuv manúš, odój, pe guruveste? A syr ža tumé piririskirde čačipén dre želučoskiri truta (jado), a bar'iakirdo (plódo) čačipnáskiro dro kirkipen (palyno)?

13Tumé, savé radynénape nisostyr, savé phenéna: “Ame, ž, xaj, na péskire zorjása doresciam péske zoralypén?”

14“Ne, ake, Me, – rakiréla Raj Devél, jangoléngiro-bolybnáskiro Devél, Me ĥazdáva Najudytko nacyja proti tuménde, kher Izraljoskiro, i adalé vérgi tumaré javéna te pritasaven tumen štetóstyr, kaj te džán andré Jemafo, ke sýgno rékica (lenorí) pe čhučé prahi (Aravija).”

← Chapter 5 Jump to: Chapter 7 →