Amos 8

Romani Baltic Latin (Biblija - Pe Baltitko Romani čib (Romanes) 2019)

← Chapter 7 Jump to: Chapter 9 →

1Ake, isyn davá, so Raj Devél, sykadiá mánge: ake, khudo (korzina) spialone barjakirdonenca (fruktenca).

2I Jov phendiá: “Amoso! So dykhésa tu?” I phendjom me: “Khudo lynaitkone (spialone) barjakirdenca.” Tén'ci phendiá Raj Devél mánge: “Kónco (jagóro) javdiá pe Miré manušénde Izrailjostyr; i Me butýr na otmekav bang lénge.

3‘I giliá, so bagandle dre felatiniá, jačéna syr zoraló roviben dro dová dyvés’, – rakiréla Raj Devél. But trúpy javéna pir saré štéty, manušá čhurdena javrí len bi lavengiro.”

4Šunén davá, tumé, kon čorjola te nakhavel manušén dre trébima, i te xasiakirél saré čororen pe phuv,

5tumé, savé rakiréna: “Kiéli davá Nevoné-Čhonytko svénko prodžála (končynelape), sob (kaj) aménge javélas saštý (moginelas) te biknas maró, i davá sávato (subóta), sob (kaj) aménge javélas saštý te kofinas amaré parné givesa. Sob (kaj) aménge te tykniakiras efa, i te barjakiras šékieljo, i ame podkerasas ubladýtka (viesy) frentymasa.

6Sob (kaj) aménge javélas saštý te kinas čorores pal rup, i manušés dre trébima pal para curuli (candali), sob (kaj) te biknas nálačho parnó giv?”

7O Raj Devél sovlahadiá Jakovóskire phut'kiribnasa: “Me čačipnása nijékhvar na bistrava pal léngire nalačhé butiá.”

8Ci na léla te izdral phuv pal davá, i kažno (sváko) manúš javéla te tuginel zoralés, kon dživéla pe daja phuv. Ci na ĥazdélape syr šuvlypen sarí daja phuv sýrby reka (len'): so javéla te ĥazdelpe valnenca i te mekel telé jekhátyr (srázu) sýrby reka (len') Jegiptóskiri.’

9“I javéla adiáke dro dová dyvés’, – rakiréla Raj Devél – ‘so Me keráva adiáke, so kham zadžála dro paš-dyvés, so javéla kaló (ciamlo) pe phuv dro jasno dyvés.

10Me paruvava tumaré svénki pe zoralý túga i saré tumaré giliá pe zoraló roviben; i Me janáva žalobna balytka goné pe kažno trušúl, i plieha pe kažno šeró. Me keráva dro da dyvés bari túga pe phuv, savjása obrovena jekhore čhavés, i kónco (jagóro) daleske javéla syr kirko dyvés.

11‘Ake, javéna dyvesá’, – rakiréla Raj Devél, so Me bičhaváva bokh pe daja phuv, na bokh bi mareskiro, na smega pal paní, a javéla truš (žažda) pal lavá Ráskire-Devléskire.

12I manušá javéna te psirén jekhe morjostyr (derjavestyr) ke javír, paš-ratitkoné (sieviernone) rigátyr ke vastóko; jone javéna te prastan odorík i pale te rodén lav Ráskire-Devléskiro, i jone na lathéna les.”

13Dro dová dyvés šukár patyvalé terné čhaja i zoralé tyrne manušá javéna te našaven zor smegatyr,

14savé sovlahana grehosa Samarijaskiresa, savé rakiréna: “Te javél džidó tyró devel, Danjo!” I iščo (inké): “Te javél drom célo ke Virsávija!” Jone peréna i nijékhvar na uštena nevéstyr!

← Chapter 7 Jump to: Chapter 9 →