Deuteronomy 13

Romani Baltic Latin (Biblija - Pe Baltitko Romani čib (Romanes) 2019)

← Chapter 12 Jump to: Chapter 14 →

1Kóli javéla maškír túte proróko, ci odová, kon piriphenela suné, i sykavéla túke znamiénii (ĥiertyká) ci dívo,

2i javéla dro čačipén doiá ĥiertýk (znamiénijo) ci dívo, pal savó jov rakirdiá túke, i phenéla: “Javén pal javire devlorende, savén tu na džinésa, i javása te dynarinás lénge”,

3to tu na šun lavá dalé-prorokoskire, ci adaleskire, kon piriphenela suné; pal-dová so pir davá sprobinela tumen Raj Devél, Devél tumaró, sob (kaj) te džinél, ci drógo isyn tuménge Raj Devél, Devél tumaró saré tumaré ileske i saré tumaré dieske.

4Džán pal Raste-Devléste, tumaré Devléste, i Léstyr darén; rakhén priphenybená Léskire, i Léskiri zan šunén, i Léske dynarinén, i ke Jov pričhuvenpe;

5a odolés prorokós ci odolés, kon piriphenela suné te otdén meribnáske pal dová, so jov podrakirelas tumen te otdžan Rástyr-Devléstyr, Devléstyr tumarestyr, Savó vylydžijá tumen Jegiptóskire phuvjátyr, i, Savó vyrakhcia tut pisharibnaskire kheréstyr; ne odová manúš kaméla te riskirél (te zmarel) tut droméstyr, pir savó priphendiá túke te džal Raj Devél, Devél tyró; i adiáke trade krig xolý kokoró péstyr.

6Kóli javéla te podrakirel tut čorahanés tyró pšal; tyré-dákiro čhavó, ci tyró čhavó, ci tyrí čhaj, ci pe tyró čhuibén romný, ci tyró mal, savó isyn drógo vaš túke syr isyn tyró di, rakirí: “Javén i javása te dynarinás javire devlorénge, savén tu na džindian i tyré dadá”,

7odolé-manušéngire devlorénge, savé isyn pašýl túte, pašatunen ke tu ci duratunen tútyr, jekhe-phuvjákire jagoróstyr (krajostyr) ke javír,

8tedy na poddepe léske i na šun les; i mek te na tanginél les tyrí jakh, na tangine les i na sčhakir les,

9ne muliakir (zamar) les; tyró vast angledýr saréndyr bangó te javél pe léste, sob (kaj) te zamares les, a korigedýr (pozžedýr) saré manušéngire vastá;

10mar les barénca ke meribén; pal-dová so jov kamdiá te otriskirel tut Rástyr-Devléstyr, Devléstyr tyrestyr, Savó vylydžijá tut Jegiptóskire phuvjátyr pisharibnaskire kheréstyr;

11i saró Izrailjo šunéla davá, i strahadjola, i na javéna butýr te kerén maškír túte dasavo fuipén.

12Kóli tu šunesa pal vari-savó tyré for'jéndyr, savó Raj Devél, tyró Devél, déla túke vaš džiibén,

13so jačné dre léste nadevlytka manušá maškír túte i lydžiné krig manušén léngire foróstyr, rakirí: “Javén i javása te dynarinás javire devlorénge, savén tumé na džindlé”,

14tedy tu rozrode, dodžin i mištés rosphuč; i kóli davá isyn čačipén, so kerdiápe davá džungalypén (daja brytkima) maškír túte,

15to phusav andré odolé-foróskire manušén kurtalása (miečosa), otdé prokošybnaske les i saró, so javéla dre léste, i kheritkoné murdalén (skoto) leskiren phusav andré kurtalása;

16a saró doresybén léskiro skéde maškír léskiri foruný (plóšča), i shačkir jagása fóro i saró léskiro doresybén dro célo shačkiribén Ráske-Devléske, Devléske tyréske, i mek te javél jov saró viéko dro rosčhurdypen, naštý nikieli nevéstyr te kerés les;

17nisó, so isyn prokošnó, mek te na pričhuvelpe ke tyró vast, sob (kaj) te tykniakirel Raj Devél Péskiri xolý, i te del túke tangipén, i te promangel tut, i te sozdel tútyr butýr manušén, syr Jov sovlahadiá tyré dadénge,

18kóli tu javésa te šunés Ráskire-Devléskiri, tyré Devléskiri zan (glos), rakhi saré Léskire priphenybená, savé akaná rakiráva túke, keri lačhés angíl Ráskire-Devléskire, tyré Devléskire jakhá.

← Chapter 12 Jump to: Chapter 14 →