Deuteronomy 30

Romani Baltic Latin (Biblija - Pe Baltitko Romani čib (Romanes) 2019)

← Chapter 29 Jump to: Chapter 31 →

1I javéla adiáke: kiéli javéna pe túte saré dalé lavá – bahtiakiribén i prokošybén, savé rakirdjom me túke, i tu lésa len ke péskiro iló maškír saré manušénde, maškír savénde rosčhuvela te dživél tut Raj Devél, Devél tyró,

2i risjosa tu ke Raj Devél, Devél tyró, i tu kandesa Léskiri zan, syr me rakiráva túke adadyvés, tu i tyré čhavé saré tyré iléstyr i saré tyré diestyr,

3tedy Raj Devél, Devél tyró riskiréla tyré manušén plienóstyr, i potanginela tut, i nevéstyr skedéla tut saré manušéndyr (narodendyr), maškír savénde Jov rosčhudiá tut te dživél Raj Devél, Devél tyró.

4Usajékh, kóli b tu te javes rosčhudo ke bolybnáskiro jagóro (ke krajo), i odothýr skedéla tut Raj Devél, Devél tyró, i odothýr léla tut,

5i janéla tut Raj Devél, Devél tyró, pe phuv, saví sys tyré-dadengiri, i tu doresesa la, i Jov bahtiakiréla tut, i sozdela tútyr butýr manušén, syr sys tyré dadende.

6I občhinela (paruvela) Raj Devél, Devél tyró, iló tyró i iló tyré-rodoskiro, sob (kaj) túke te javél drógo Raj Devél, Devél tyró, saré tyré iléstyr i saré diestyr tyrestyr, sob (kaj) te dživés túke;

7tén'či Raj Devél, Devél tyró, saré dalé prokošybena piridela pe tyré vergénde (vrogende) i pe odolénde, konéske tu na san drógo, savé tradyne tut,

8a tu risjosa i javésa te šunés zan Ráskire-Devléskiri i te kerés saró pir saré Léskire priphenybená, savé me priphenava túke adadyvés.

9I tén'či butýr déla túke Raj Devél, Devél tyró, dro kažno tyré-vastengiro réndo, dro barjakirdó tyré maséndyr, dro barjakirdó tyré kheritkoné murdaléndyr (skotóstyr), dro barjakirdó tyré-phuvjátyr; pal-dová so nevéstyr javéla te radynélpe Raj Devél pal túte, Jov bahtiakiréla tut, syr Jov radyndiape pal tyré dadende,

10kóli javésa tu te kandes Ráskire-Devléskiri, tyré-Devléskiri zan, te rakhés Léskire priphenybená i uphenybená Léskire, savé sys čhindlé dre daja Zakonoskiri lylvarí, i kóli risjosa tu ke Raj Devél, Devél tyró, saré ilésa tyresa i saré diesa tyresa.

11Pal-dová so davá priphenybén (zapovied'), savó me rakiráva túke adadyvés, nane garadó vaš túke i nane dur;

12jov (priphenybén) na pe bolybén, sob (kaj) te javél saštý (možna) te rakirés: ‘Kon džála upré vaš aménge pe bolybén, i janéla les aménge, i déla aménge te šunas les, i ame spolninasa les?’

13i na pal mórjo (derjáv) jov, sob (kaj) te javél saštý te rakirés: ‘Kon psiréla pal aménde pal mórjo (derjáv), i janéla les aménge, i déla aménge te šunas les, i ame kerása saró pir léste?’

14Davá lav isyn drieván pašýl ke tu: jov isyn dre tyré uštá i dro tyró iló, sob (kaj) te spolnines les.

15Dykh, me adadyvés proponindjom túke (čhurdyjom lav angíl túte) pal džiibén i lačhipén, mulypen (meribén) i čoripén.

16Me, Mójza, savó rakiráva túke adadyvés – te rikires syr Drógima dro iló Ras-Devlés, Devlés tyrés, te psirés pir Léskire dromá, i te kerés saró pir Léskire priphenybená, statúty i zakóny Léskire; i javésa tu dživés i javéla but tumen, i bahtiakiréla tut Raj Devél, Devél tyró, pe phuv, pe saví tu džása, sob (kaj) te les la;

17ne, kóli otrisjola iló tyró, i tu na javésa te šunés, i zablendynesa, i lésa te mangespe javire devlorénge i tu javésa te dynarines lénge,

18to tedy me dáva te džinén tuménge adadyvés, so tumé xasjona, i na javéna ĥará (dlúges) pe phuv, sob (kaj) te les la, vaš saví tu piridžasa Iordáno.

19Sob (kaj) te dosykavav angíl tuménde Me kharáva adadyvés bolybén i phuv: džiibén i mulypen (meribén) me proponindjom túke, bahtiakiribén i prokošybén. Vykede džiibén, sob (kaj) te dživés tu, i ródo tyró,

20i te rikires syr Drógima dro iló Ras-Devlés, Devlés tyrés, te šunés Léskiri zan i te pričhuvespe ke Jov; pal-dová so dro davá isyn džiibén tyró i dluga tyré dyvesá, sob (kaj) te javes túke gara (dlúges) pe phuv, saví Raj Devél sovlahadiá dadénge tyrenge, Avraamóske, Isaakóske i Jakovóske, te del lénge.”

← Chapter 29 Jump to: Chapter 31 →