Ecclesiastes 10

Romani Baltic Latin (Biblija - Pe Baltitko Romani čib (Romanes) 2019)

← Chapter 9 Jump to: Chapter 11 →

1Mulé matlia (muhi) došakirena aptiekaroskiro drab te khosen adiáke, so davá kuč drab léla te khandel kirnypnasa;

2adiáke-pac' i jekh tyknó dylnypén keréla patyvalé manušésa, kon isyn godó i savés javír manušá kutiakirena.

3I davá adiáke-pac' isyn: kiéli dylynin'ko manúš džála vari-savé dromoresa; léske saroiekh na uhtyléla (nádosi) godypén, i jov sykavéla kažnoné manušéske, so jov isyn dylynin'ko.

4Kóli theméskire-barydyreskiro dúho (fáno) ĥazdélape proti túte, na jačkiv (na jačav) péskiro štéto, pal-dová so ramánjo (miro) barydyrésa čhakirela štylés baré gréhi.

5Davá isyn bibáht, so me dykhcjom tel kham, syr themeskiro barydyró délape dukhá.

6Dylnypén čhuvélape angíl baré patyvása; barvalé manušá isyn bešté pe telatuné štéty.

7Me dykhcjom dynar'jén pe grénde, i kralískire čhavén, savé psiréna pezal pir phuv syr dynárja.

8Kon ĥanavela ĥanbín, odová peréla dre láte, i kon phagiréla telé tyno, odolés sap dandyrela.

9Kon vyphagirela bará, odolés bar moginéla te pekavel pale; kon pharavela kaštá, odolés kašt moginéla te dukhavel.

10Kóli tover isyn tempo, i kóli kon na vostrinela čhinybnytko (liezvijo), to manušéske trej butýr te pričhuvel zor. Fedýr godypnasa te dumines pal davá angíl.

11Kóli sap dandyrela manušés angíl, syr te zarakires les, tedy ukrotitieljo uže na trej.

12Lavá godé-manušéngire uštendyr isyn bahtalypén, ne dylynin'koneskire uštá sýrby nakhavena les kokores.

13Léskiro muj léla te rakirél nagode lavá, ne dro kónco (dro jagóro) jov rakiréla sýrby bišereskiro.

14I rakiréla but lavá dylynin'ko, ne nijékh manúš na džinéla, so javéla angíl, kon moginéla te phenél léske?

15Dylynin'ka manušá khiniakirena pes pharé butiasa adiáke, so jone na džinéna, syr te džán pe fóro.

16Bida túke, phuv, kóli tyró králi isyn terné-beršengiro i, kiéli tyré thagárja (kniázi) [kralískire čhavé-ju.o.] xána tasiárles (ránes).

17Bahtalý tu san, phuv, kóli tyró králi isyn baré-rangire rodóstyr i tyré thagárja (kniázi) xána tedy, kiéli trej vaš zoralypén, a na vaš matyben.

18Pal drieván kirne-masengire vastá kheréskiro karkaso peréla, i pir čuče vastá kher thadéla.

19Habén isyn kerdó, sob (kaj) te sanpe, i mol rozradynela džiibén, pe pal lové saštý te les saró davá.

20Na prokoš kralís až i dre godý, na prokoš barvalen dre štúba, kaj sovesa; pal-dová so čirikly dro fáno (vozduho) moginéla te lydžál tyró lav [zan-ju.o.], i vurniaibnytko phakenca sozdyiben (krylato) phenéla pal davá réndo.

← Chapter 9 Jump to: Chapter 11 →