Ecclesiastes 3

Romani Baltic Latin (Biblija - Pe Baltitko Romani čib (Romanes) 2019)

← Chapter 2 Jump to: Chapter 4 →

1Vaš saró, so kerélape dro davá svéto (lot), isyn péskiro uliago (pora), i isyn časo (cýro) kažnoné rendoske tel kham;

2i časo te obkošen dová, so isyn počhudo; časo te bijandjon, i časo te merén; te počhuven dre phuv,

3časo te muliakirén, i časo te sastiakiren; časo te phagiren telé, i časo te ĥazdén kher;

4časo te tuginen zoralés, i časo te khelen; časo te rovén, i časo te sanpe;

5časo te oblen, i časo te obrikirenpe oblyibnastyr; časo te čhurdén krig bará: i časo te ukeden bará;

6časo te rodén, i časo te našaven; časo te rakhén, i časo te čhurdén krig;

7časo te riskirén, i časo te syven; časo te javén štyl, i časo te rakirén;

8časo vaš maribén, i časo vaš ramánjo (miro); časo te sykavén patýv, i časo zoralés te bidykhen.

9Savó kófo isyn butiarneske daléstyr, pašýl so jov kerdiá butý pharés.

10Me dykhcjom namilo pharí butý, so Devél dyjá manušéngire čhavénge te kerén pharés.

11Jov kerdiá saró šukár dro péskiro časo, adiáke-pac' Jov dyjá džinybén pal svéto (lot) dre léngire ile; ne saroiekh manúš naštý te ĥaljol dová keriben, so Devél keréla anglypnástyr ke kónco (ke jagóro).

12Me džinóm, so nisó nane fedýr vaš lénge, syr te radynénpe zoralés te kerén lačhipén dro léngiro džiibén;

13i adiáke-pac', sob (kaj) manúš te xal, i te p'jel, i te radynélpe zoralés lačhipnastyr saré léskire butiátyr-davá isyn taláno Devléstyr.

14Me džinóm so, sob (kai) Devél te na kerél, davá javéla pe saré viéki. Nisó naštý te dočhuves ke dová, i nisó naštý te otles daléstyr. Devél džinéla te kerél adiáke, sob (kaj) ame te daras angíl Léste.

15Davá, so isyn, uže sys ĥarym-ĥará, i dová, so javéla, tež uže sys, i Devél janéla pale dová, so sys.

16Adiáke-pac' me dykhcjom tel kham: odój, kaj sendytko štéto, odój isys fuipén. I odój, kaj štéto vaš čačipén, odój sys bibáht.

17Me phendjom dro miro iló: “Devél javéla te sendiakirél čačunó i fujé manušén, pal-dová so odój javéla časo vaš kažno vykedyiben i vaš kažno butý.”

18Me phendjom dro miro iló: “Adiáke isyn manušéngire čhavénca, so Devél sprobinela len, sob (kaj) jone moginénas te dykhén, so jone isyn sýrby murdalá (žyvotna).

19Pal-dová so, so kerélape manušéngire čhavénca, adiáke-pac' kerélape murdalénca: jekh dólia: syr jekh meréla, adiáke-pac' javír muljola.

20Saré džána dro jekh štéto: saré isyn prahostyr, i saré risjona dro práho.

21Kon džinéla, ci manušéngire-čhavéngiro dúho (fáno) džála upré? I ci murdalengiro dúho (fáno), ci jov džála dre phuv?

22I me dykhcjom, so nisó nane fedýr, syr manušéske te radynélpe zoralés léskiro butiendyr, pal-dová so davá isyn léskiri dólia, ne kon janéla les te dykhél, so javéla pal léste?

← Chapter 2 Jump to: Chapter 4 →