Ecclesiastes 12

Romani Baltic Latin (Biblija - Pe Baltitko Romani čib (Romanes) 2019)

← Chapter 11 Jump to:

1I rípir tyré Sozdyibnaskires dre tyré ternypnaskire dyvesá angíl dová, syr javéna pharé dyvesá ke phuripen, i syr javéna dasavé beršá, so tu phenésa pal lénde: “Mánde nane loš (viesjolyma) léndyr.”

2Angíl davá, syr kham i dud, čhon i čergeniá jačéna ciamle, i angíl davá, syr óbloki risjona pale bryšyndestyr;

3angíl dyvesá, syr kherítko rakhibnaskiro javéla te izdral, i syr zoralé muršá javéna te kerén telé šerenca; angíl, syr siavitka (miel'nicytka) bará terdjona dre butý pal dová, so jone javéna kutý manušá, i syr manušá, kon dykhéna pir dalé dudalia (stavni), javéna sýrby dre migla (mrako) te dykhén;

4angíl dová, syr i vudará zaphandena pe vulíca (pe gása), kiéli siavitkoneskiri (phurteskiri) butý na javéla šundly; i kiéli jone javéna te uštén čirikliakire bagaibnastyr, i kiéli saré bagaibnytka čhaja javéna štyl.

5I adalé manušá adiáke-pac' javéna te darén vučipnástyr, i jone javéna te strahandjon te džán pir drom, i léngire balá javéna parné adiáke, syr mindalitko kašt luludjola (cvecinela), i syr skočko (grastoro) na javéla dre rádyma, i syr patýv xasjola sýrby kapiersytko kašt šutjola; pal-dová so manušá javéna te džán ke léngiro viéčno kher, i tén'či léngire rovibnaskire javéna te psirén pir gásy (pir vulícy).

6[Rípir tyré Sozdyibnaskires-ju.o.], angíl dová, syr rupuno šelo košelape, ci syr suvnakunó čaró phadjola, ci syr khoró pharadjola pašýl folahar (fontano), ci syr rota phadjola pašýl ĥanýng;

7i risjola práho dre phuv, kaj sys jov, a dúho (fáno) risjola ke Devél, Kon dyjá les manušéske.

8Harnypén xarnypnastyr”, – phendiá Sykliakiribnáskiro pal Devléste. “Saró isyn xarnypén.”

9I ke dová, so Sykliakiribnáskiro pal Devléste sys godó, jov usajékh sykliakirdiá manušén džinybnaske, i jov rozdykhelas kučes, i rodyja, i jov čhuvelas jekh pal jekh syr trej pritčy.

10Sykliakiribnáskiro pal Devléste rodyja te lathel goža lavá i te začhinel pir čačipén patiaibnytka lavá.

11Godé-manušéngire lavá isyn sýrby suvja [phusadytka bustiá/striély-ju.o.], a léngire pritčy isyn sýrby gvozdi (karfina), so xor zamarnape: jone isyn saré jekhe čhupnaristyr

12I iščo (inké): prirakhpe jekhestyr, míro čháva: džinésa, nane kónco (jagóro) manušéndyr te čhinen lylvaria, i kóli tu drieván but javésa te sykljos, tedy tu khiniakiresa péskire masá.

13Javén, vyšunasa ke kónco (ke jagóro) čačipén pal saró davá: “Dar Devléstyr i ríkirpe ke Léskire priphenybená; pal-dová so dre dalé duj čačipená isyn saró, so trej manušéske.

14Paldová so Devél janéla kažno butý te sendiakirél, i khetané kažnoné garadé keribnasa, ci jov te javél lačhó, ci jov te javél bibahtaló.

← Chapter 11 Jump to: