Ecclesiastes 11

Romani Baltic Latin (Biblija - Pe Baltitko Romani čib (Romanes) 2019)

← Chapter 10 Jump to: Chapter 12 →

1De tyró maró buté manušénge, pal-dová so tu doresesa dáry pale but dyvesá.

2Rosker, so isyn túte, maškír eftá (eftane) manušénde, ci adiáke-pac' maškír ohtó (bidujéngiro deš) manušénde, pal-dová, so tu na džinésa, savó bedypen javéla pe phuv.

3Kóli óbloki isyn pherdé bryšyndesa, tedy jone čhuvéna telé paniá péstyr; i kóli kašt (drévo) peréla ke paš-dyvesýtko rig, ci ke paš-ratítko rig, tedy pe štéto kašt peréla, jov javéla te pasjol.

4Kon dykhéla pe balvál, odová na javéla te počhuvel ziárka dre phuv, i kon dykhéla patyvása pe óbloki, odová na javéla te sčhinel giv.

5Syr tu na džinésa, savé dromésa dúho (fáno) džála, i dová, syr tykné-masengire kokalkicy barjona dre léskire-dákiro per, adiáke-pac' tu i na ĥaljosa Devléskiri butý, Kon keréla davá saró.

6Tasiarlatune (rannjone) zlokostyr počhuv péskiri ziárka dre phuv, ne bel'veliatyr na tangine (na žalin) tyró vast vaš butý, pal-dová so tu na džinésa, so udelape ke mištypén, ci davá réndo, ci dová réndo, ci duj dalé réndy, javéna lačhé.

7Kakaná, dykh. Dud isyn gudló, i gožes isyn jakhenge te dykhén kham;

8ne kóli manúš dživéla but berš, tedy mek jov te radynélpe zoralés kažnoné beršestyr, ne mek jov i te ripirel pal kalé dyvesá, pal-dová, so jone javéna but: saró, so javéla, isyn xarnypén.

9Rádynpe (lošaljov), ternó manúš, tyré ternypnastyr, i mek tyró iló te ĥazdel tyró dúho (fáno) dre dyvesá, kiéli tu san ternó; i psir odój, kaj tyró iló podphenela, i odorík, karik tyré jakhá tyrdenape, ne tu jekh džin, so pal davá saró Devél vykharela tut pe séndo.

10Tén'ci, na tugin dro péskiro iló, i čhuv krig bibáht tyré maséndyr [ločatyr-ju.o.], pal-dová so čhavoripen i ternypen isyn xarnypén.

← Chapter 10 Jump to: Chapter 12 →