Ecclesiastes 5

Romani Baltic Latin (Biblija - Pe Baltitko Romani čib (Romanes) 2019)

← Chapter 4 Jump to: Chapter 6 →

1[2-ju.o.] Na jav sýgno te phenés péskire mósa, i mek tyró iló te na vyphenel sýgno lav angíl Devléste: pal-dová so Devél isyn pe bolybén, ne tu san pe phuv, paldavá na rákir but.

2[3] Paldová so manúš dykhéla suné, kiéli léste isyn but réndy, i dylynin'koneskiri zan pindžkiresa (udžinesa) pir but lavá.

3[4] Kiéli tu sovlahasa Devléske, na tyrde te kerés pir sovláh, pal-dová, so Léske isyn na dróga dylynin'ka: ker, syr tu dyján sovláh.

4[5] Isyn fedýr te na sovlahas, syr te sovlahas, i te na kerés pir sovláh.

5[6] Na domek, sob (kaj) tyré uštá te lydžán loč (plot') te kerél grého, ci, sob (kaj) tedy te phenés Devléskire Jangoloske [bičhaibnaskireske-ju.o.]: “Dro davá me dyjompe dukhá.” Vaš so davá trej, sob (kaj) Devél te xoliasol pe tyrí zan, i, sob (kaj) te xasiakirél tyré-vastengiri butý?

6[7] Pal-dová so odój, kaj but suné dykhéna, odój i but lavá rakiréna, ne saró davá isyn xarnypén. Ne tu dar Devléstyr.

7[8] Kóli tu dykhésa, syr pritasavéna čorores pe phuv, i nahrates riskirena Zakóno i čačipén dre mižeh rig, tedy na divinpe pe davá, pal-dová so vučedýr barydyró dykhéla pal vučé barydyrende, i iščo (inké) vučedýr barydyrá isyn pe lénde.

8[9] I kófo (l'ĥota) phuvjátyr isyn vaš sarénge, i králi kokoró džidjola feldatyr.

9[10] Konéske pir iló isyn rup, odová na javéla čalo rupéstyr, ci, konéske pir iló baró barvalypén, kodoleste na javéla adákicy, kicý léske trej. Saró davá adiáke-pac' isyn xarnypén.

10[11] Syr barjola mištypén, javéla butedýr manušá, kon čaravelape léstyr, i, savó kófo isyn odolénge, konéskiro isyn davá mištypén, syr jekh féni te dykhén pe léste?

11[12] Butiarno isyn sutó gudles, ci jov xála but, ci nábut (kutý): ne baró barvalypén na déla te sovél léske.

12[13] Isyn pharí bibáht, so me dykhcjom tel kham: barvalypén, so manúš prirakhela péske, dukhavela les,

13[14] ci davá barvalypén moginéla te xasjol bibahtalé vakancyjatyr (slučajostyr). A kiéli čhavoró lathelape, jov nisó na doreséla dro vast.

14[15] Syr jov javdiá pe svéto (lot) nango dákire štetóstyr, dasavo-pac' nango jov risjola pale, syr jov javdiá. I jov nisó na léla péskire pharé butiátyr, so jov moginelas te lydžál krig péskire vastésa.

15[16] I davá isyn adiáke-pac' pharí bibáht: dro saró savó manúš javdiá, reh (ukrat) dasavo-pac' jov jačkiréla davá svéto (lot), i, savó kófo javéla léske, so jov kerdiá pharí butý vaš balvál?

16[17] Jov xaja dro ciamlypén dre saré péskire dyvesá buté dukhenca, nasvalypnasa i baré xoliása.

17[18] Ake, so me dykhcjom: davá isyn lačhés i mištés te xal, i te p'jel, i zoralés te radynélpe lačhipnastyr, so isyn saré léskire pharé butiátyr, so jov kerdiá butý pharés tel kham dre saré dyvesá léskire džiibnastyr, so Devél dyjá léske, pal-dová so davá isyn léskiri paš mištypnástyr.

18[19] I adiáke-pac' kažno manúš, konéske Devél dyjá barvalypén i mištypén, i dyjá zor léske te lel davá, i te lel péskiri paš mištypnástyr i zoralés te radynélpe péskire pharé butiátyr-davá isyn léskiro taláno Devléstyr.

19[20] Pal-dová so jov na javéla ŭsády (sak) te ripirel dyvesá léskire džiibnastyr, paldavá Devél i obradynela léskiro iló.

← Chapter 4 Jump to: Chapter 6 →